Ang Prophets.LDS.org Nagpakita og Bag-ong mga Biography sa Buhing mga Apostoles

Bag-ong mga biography sa mga sakop sa Korum sa Napulog Duha ka mga Apostoles gisugdan sa pagpublikar pagka-Pebrero sa prophets.lds.org, ubos sa seksyon nga giulohan og “Meet today’s prophets and apostles.” Ang mga biography sa mga sakop sa Unang Kapangulohan anaa na sa site sukad niadtong Oktubre 2011. Ang mga biography hubaron sa nagkalainlaing mga pinulongan sa tibuok tuig kutob sa itugot sa mga kapanguhaan. Kasagaran sa impormasyon gipublikar na diha sa Liahona sa nagkalainlaing mga pinulongan.

“Ang pagkasayud sa ilang pagkabata, mga katuigan sa pag-eskwela, kinabuhi sa pamilya, ug mga trabaho sa wala pa sila matawag sa pagka-apostoles makatabang kanato nga makita ang kamot sa Ginoo sa ilang kinabuhi ug mahimong laing saksi kon sa unsang paagi Siya motawag ug mopadako sa ordinaryo nga mga lalaki ug mga babaye sa pagserbisyo sa gingharian,” miingon si Elder Paul B. Pieper sa Seventy. Ang mga biography molakip sa impormasyon ug mga istorya sa kinabuhi sa matag lider, apan labaw sa tanan, mopakita kini kon giunsa sila pag-andam sa Ginoo sa pagserbisyo.