Ang Pasidungog ug Order sa Priesthood
Ang mga Yawe sa Priesthood
“Niadtong 1976 usa ka kinatibuk-ang komperensya sa area gipahigayon didto sa Copenhagen, Denmark. Pagkahuman sa panapos nga sesyon, si Presidente Spencer W. Kimball [1895–1985] nagtinguha sa pagbisita sa Vor Frue Church, diin ang Thorvaldsen nga mga estatuwa sa Christus ug sa Napulog Duha ka mga Apostoles nagbarug. …
“Sa atubangan sa simbahan, sa luyo sa altar, nagbarug ang pamilyar nga estatuwa nga Christus nga ang Iyang mga kamot gibukhad paatubangan ug daw gitunol, ang mga kamot nagpakita sa agi sa mga lansang, ug ang samad sa Iyang kilid makita kaayo. Sa kada kilid nagbarug ang mga estatuwa sa Apostoles, si Pedro diha sa atubangan sa tuo ug ang ubang mga Apostoles han-ay nga nagsunod.
“Kadaghanan sa among grupo duol sa luyo sa kapilya uban sa tigbantay. Nagbarug ako sa unahan uban ni Presidente Kimball atubangan sa estatuwa ni Pedro uban ni Elder Rex D. Pinegar ug Johan Helge Benthin, presidente sa stake sa Copenhagen.
“Diha sa kamot ni Pedro, nga hinimo sa marmol, mao ang usa ka hugpong sa bug-at nga mga yawe. Si Presidente Kimball mitudlo ngadto sa mga yawe ug mipasabut kon unsay gisimbolo niini. Dayon, sa usa ka lihok nga dili gayud nako makalimtan, siya milingi ngadto kang Presidente Benthin ug uban sa wala maandi nga kalig-on mitudlo kaniya ug miingon, ‘Gusto ko nga imong sultihan ang tanan sa Denmark nga ako ang naghupot sa mga yawe! Naghupot kami sa tinuod nga mga yawe, ug amo kining gigamit matag adlaw.’
“Dili gayud ako makalimot niana nga pamahayag, kana nga pagpamatuod gikan sa propeta. Ang impluwensya gamhanan sa espirituhanong paagi; ug ang epekto sa impresyon pisikal.
“Milakaw kami ngadto sa luyo sa kapilya diin nagbarug ang nahibilin nga grupo. Nagtudlo ngadto sa mga estatuwa, si Presidente Kimball miingon ngadto sa buotan nga tigbantay, ‘Kini patay na nga mga Apostoles.’ Nagtudlo ngari nako, miingon siya, ‘Ania aduna kita’y buhi nga mga Apostoles. Si Elder Packer usa ka Apostol. Si Elder Thomas S. Monson ug Elder L. Tom Perry mga Apostoles, ug ako usa ka Apostol. Kami ang buhi nga mga Apostoles.
“‘Nakabasa ka kabahin sa mga Seventy diha sa Bag-ong Tugon, ug ania ang duha sa buhi nga mga Seventy, sila si Elder Rex D. Pinegar ug Elder Robert D. Hales.’
“Ang tigbantay, kinsa hangtud nianang higayuna wala magpakita og emosyon, sa kalit mitulo ang mga luha.
“Mibati ako og talagsaon kaayo nga kasinatian.”2
Ang Priesthood Dili Matunga
“Ang priesthood labaw pa kaysa mga office niini. Kon ang usa ka tawo unang makadawat sa Aaronic o Melchizedek Priesthood, kini ihatag kaniya pinaagi sa pagpandong sa mga kamot. Human mahatag ang priesthood ngadto kaniya, siya i-orden ngadto sa office sa priesthood. Ang awtoridad sa tanang office nagagikan sa priesthood.
“Ang priesthood dili matunga. Ang elder naghupot sa samang gahum sa priesthood sa usa ka Apostol (tan-awa sa D&P 20:38). Kon ang usa ka tawo modawat sa priesthood, nadawat niya ang kahingpitan niini. Hinoon, may mga office sa priesthood—mga dibisyon sa awtoridad ug responsibilidad. Ang usa ka tawo mahimong mogamit sa iyang priesthood sumala sa katungod sa katungdanan diin siya gi-orden o gi-set apart. …
“Si kinsa kadtong naghupot sa Melchizedek Priesthood o sa mas taas nga priesthood naghupot usab sa tanang awtoridad sa Aaronic o sa mas ubos nga priesthood.”3
Ang Preparatory Priesthood
“Ang katinuod nga kini gitawag nga mas ubos nga priesthood wala gayud makamenos sa kamahinungdanon sa Aaronic Priesthood. Ang Ginoo miingon nga kini gikinahanglan sa Melchizedek Priesthood. (Tan-awa sa D&P 84:29.) Si bisan kinsa nga naghupot sa mas taas nga priesthood kinahanglang mobati nga napasidunggan sa pagpahigayon sa mga ordinansa sa Aaronic Priesthood, kay kini may dakong espirituhanon nga kaimportante.
“Ako, isip sakop sa Napulog Duha ka mga Apostoles, nakapasa sa sakrament. Isiguro ko kaninyo nga mibati ko nga napasidunggan ug napamainubsanon nga dili ikahulagway sa pagbuhat sa kanang gikonsiderar sa uban nga balik-balik nga buluhaton. …
“Sa kaaran sila naglaum sa pag-ula ni Kristo pinaagi sa seremonya sa sakripisyo. Kita mohinumdom sa samang panghitabo pinaagi sa ordinansa sa sakrament.
“Ang sakripisyo sa una, ug ang sakrament karon, nakasentro ni Kristo, ang pagpaagas sa Iyang dugo, ug ang pag-ula nga Iyang gihimo alang sa atong mga sala. Ang awtoridad sa pagpahigayon niining mga ordinansa sa una ug karon anaa sa Aaronic Priesthood.
“Kini sagrado gayud nga responsibilidad ug naglakip kaninyo sa panag-igsoonay niadtong mga sulugoon sa Ginoo sa kaaran. Dili ikatingala nga atong bation ang kamapainubsanon kon kita moapil sa mga ordinansa nga may kalabutan sa Aaronic Priesthood. …
“Ang pipila kaninyo nga naglingkod karon diha isip mga deacon, teacher, ug priest sa umaabut molingkod dinhi isip mga Apostoles ug propeta ug modumala sa Simbahan. Kinahanglan nga maandam kamo.
“Sa tinuoray sakto ang pagtawag sa Aaronic Priesthood nga preparatory priesthood.”4
Usa ka Pagdapit ngadto sa mga Prospective Elder
“Ang office sa elder usa ka calling sa dignidad ug pagpasidungog, espiritwal nga awtoridad ug gahum. Ang termino nga ‘prospective’ nagpasabut nga paglaum ug pagkamalaumon ug posibilidad. Karon mamulong ko kanila, nahibalo nga may daghan pang uban nga kining mensahe magamit. …
“Kon kamo mobalik sa palibut diin ang espiritwal nga mga kamatuoran ang gihisgutan, dali ninyong mahinumduman ang mga butang nga inyong gituohang nakalimtan. Mapadayag ang mga butang nga natago sulod sa daghang mga tuig nga wala gamita ug dili aktibo. Mopaspas ang inyong abilidad sa pagsabut niini. …
“Kon kamo mobalik sa pagpakig-uban sa mga Santos, sa dili madugay inyong masabtan pag-usab ang diwa sa inspirasyon. Ug mas paspas kaysa inyong gipaabut, ingon og wala ra kamo mipalayo. Hilabihan gayud ka mahinungdanon alang kaninyo ang pagkaamgo nga kon kamo mobalik, mahimo nga ingon og wala lang kamo mipalayo. …
“Moabut ang panahon nga mobati kamo nga nahingpit ug angay sa Iyang simbahan ug sa Iyang gingharian. Dayon inyong mahibaloan kon unsa kamo ka kinahanglanon dinhi ug unsa kagamhanan ang inyong tingog sa kasinatian sa pagluwas sa uban.”5
Mga Calling sa Priesthood
“Ang usa ka balaang tawag mas labaw pa kaysa usa ka imbitasyon o hangyo. Kini usa ka tawag gikan sa Ginoo pinaagi sa Iyang pinili nga sulugoon. Daghang mga tuig na ang milabay, si Presidente Spencer W. Kimball, kaniadto presidente sa usa ka stake didto sa Arizona, adunay kasinatian kabahin unsaon pagtawag. Bakante ang posisyon sa pagkapresidente sa organisasyon sa Young Men sa stake. Si Presidente Kimball mibiya sa iyang desk sa usa ka banko, milakaw og pipila ka mga building sa dalan ug misulod ngadto sa usa ka opisina, ug miingon, ‘Jack, ganahan ka ba nga mamahimong presidente sa Young Men sa stake?’
“Si Jack miingon, ‘Oh, Spencer, ayaw gani pagbinuang diha.’
“Siya miingon, ‘Wa’ ko magbinuang oy, Batan-on ka pa, ug makaduyog ka pa sa mga batan-on. Mamahimo kang usa ka maayo nga presidente.’
“Unya nahitabo ang unsay para ni Presidente Kimball usa ka bati nga panag-istoryahanay tungod kay si Jack mibalibad sa tawag. Mibalik siya ngadto sa banko, ug milingkod sa iyang desk, napungot tungod sa iyang kapakyasan. Unya iyang nahunahunaan ang angay niyang buhaton. Mibiya siya sa iyang desk, miadto na pud didto—sa samang opisina, sa samang tawo—gitawag niya sa iyang tibuok pangalan, ug miingon, ‘Sa miaging Dominggo ang stake presidency nagmiting aron sa pagtuki kabahin sa bakanteng posisyon sa presidente sa Young Men. Nag-ampo kami kabahin niini, nag-istoryahanay kabahin niini. Sa katapusan, nangluhod, nangutana mi mahitungod niini ug nakadawat og inspirasyon gikan sa Ginoo nga ikaw ang angayng pagatawagon. Isip usa ka sulugoon sa Ginoo, ania ako dinhi aron sa paghatud niana nga tawag.’
“Si Jack mitubag, ‘Nan, Spencer, kon ingon anaon nimo pagkasulti.’
“Ug siya miingon, ‘Ako nagsulti nimo sa ingon ana nga paagi.’”6
“Ang tanan kinahanglan nga masayud nga ang call labaw pa sa imbitasyon o hangyo, gani labaw pa kay sa buluhaton. Kasagaran kita makadungog ingon ini nga ekspresyon, ‘Ako gihangyo sa pagserbisyo isip magtatambag sa kapangulohan sa elders korum.’ Mas tarung unta kon isulti, ‘Gitawag ko sa pagserbisyo isip magtatambag.’
“Wala kita mag-apas sa mga office sa Simbahan para sa atong kaugalingon. Hinoon kita motubag sa call kinsa nagdumala kanato. Responsibilidad sa nagdumala kanato nga mainampuong mokonsulta sa Ginoo sumala sa Iyang kabubut-on kabahin sa posisyon sa Simbahan. Dayon ang baruganan sa pagpadayag magamit. Ang call i-extend sa nagdumala kinsa naglihok alang sa Ginoo.”7
Ang Ka Mahinungdanon sa Pag-orden
“Ang priesthood itugyan pinaagi sa ordinasyon, dili sa yanong paghimo og pakigsaad o pagdawat og panalangin. Kini mao na sukad sa sinugdanan. Dili igsapayan kon unsa ang mahimong giasumer o gipasabut o gihunahuna gikan sa bisan unsa nga nasulti o nasulat, sa nangagi o karon, ang piho nga pag-orden ngadto sa office sa priesthood mao ang paagi, ang bugtong paagi, sa una pa o sa karon nga pagtugyan.
“Ug ang mga kasulatan nagklaro niini nga ang bugtong balido nga pagtugyan sa priesthood naggikan sa ‘usa kinsa adunay pagtugot, ug nahibaloan sa simbahan nga siya adunay pagtugot ug na-orden pinaagi sa mga pangulo sa simbahan’ [D&P 42:11]. …
“Ayaw kalimti kining usa ka yano, klaro nga baruganan: Ang priesthood sukad pa ug kanunay itugyan pinaagi sa pag-orden niadtong naghupot og eksaktong awtoridad, ug nahibaloan sa Simbahan nga siya naghupot niini. Ug bisan nga ang priesthood natugyan na, ang indibidwal walay katungod sa labaw nga katungdanan diin siya na-orden. Kadtong mga limitasyon magamit usab sa katungdanan diin ang usa ka tawo gi-set apart. Ang walay pagtugot nga mga pag-orden o pag-set apart walay natugyan, ni gahum o awtoridad sa priesthood.”8
Ang Gahum sa Priesthood
“Nakahimo kita og maayo kaayo sa pagpang-apud-apod sa awtoridad sa priesthood. Kita adunay awtoridad sa priesthood nga naestablisar sa hapit bisan asa. Kita adunay mga korum sa mga elder ug mga high priest sa tibuok kalibutan. Apan ang pagpang-apud-apod sa awtoridad sa priesthood miuswag, nga sa akong hunahuna, nag-una pa sa pagpang-apud-apod sa gahum sa priesthood. Ang priesthood walay kalig-on nga maanaa unta niini ug dili mabatunan ang kalig-on hangtud nga ang gahum sa priesthood lig-ong natisok diha sa mga pamilya nga mao gayud unta ang angay. …
“Ang awtoridad sa priesthood anaa kanato. Human sa tanan nato nga pakig-correlate ug pag-organisar, ato na karong responsibilidad sa pagpalihok sa gahum sa priesthood sa Simbahan. Ang awtoridad sa priesthood madawat pinaagi sa pag-orden; ang gahum sa priesthood madawat pinaagi sa matinud-anon ug masulundon nga pagpuyo sa pagtahud sa mga pakigsaad. Kini mapalambo pinaagi sa pagbansay ug paggamit sa priesthood diha sa pagkamatarung.
“Karon, mga amahan, pahinumduman ko kamo sa sagrado nga kinaiya sa inyong mga calling. Kamo adunay gahum sa priesthood nga gikan gayud sa Ginoo aron sa pagpanalipud sa inyong panimalay. Adunay mga higayon nga ang bugtong nga nagbarug isip panalipud tali sa inyong pamilya ug sa pagsamok sa kaaway mao kana nga gahum. Makadawat kamo og panudlo gikan sa Ginoo pinaagi sa gasa sa Espiritu Santo.”9
“Ang gahum nga inyong madawat mag-agad kon giunsa ninyo paggamit kining sagrado, dili makita nga gasa.
“Ang inyong katungod maggikan pinaagi sa inyong pag-orden; ang inyong gahum maggikan sa pagkamasulundon ug pagkatakus. …
“Ang gahum sa priesthood naggikan sa pagbuhat sa inyong buluhaton sa ordinaryong mga butang: pagtambong og mga miting, pagdawat og mga buluhaton, pagbasa sa mga kasulatan, pagtuman sa Pulong sa Kaalam.”10
Tinuod nga mga Sulugoon sa Ginoo
“Wala kita makadungog kabahin sa mga yawe sa priesthood nga gigamit sa ubang mga Kristiyanong simbahan. Daw lain paminawon nga gihulagway kita sa uban nga dili Kristiyano nga kita ra man gani ang adunay katungod ug organisasyon nga Iyang gi-establisar.
“Ang kasamtangang Napulog Duha ordinaryo ra kaayo nga mga tawo. Dili sila ikahingangha sa tagsa-tagsa, sama sa orihinal nga Napulog Duha, apan sa tiningub ang Napulog Duha adunay dakong gahum.
“Naggikan kami sa nagkalain-laing mga trabaho. Kami mga scientists, mga abogado, mga magtutudlo.
“Si Elder [Russell M.] Nelson usa ka pioneer sa pag-opera og kasingkasing. …
“Pipila niini nga Korum mga sundalo kaniadto—usa ka sailor, marines, mga piloto.
“Naghupot sila og nagkalainlaing mga katungdanan sa Simbahan: mga home teacher, mga magtutudlo, mga misyonaryo, mga presidente sa korum, bishop, mga presidente sa stake, mga presidente sa mission, ug pinakaimportante, mga bana ug mga amahan.
“Silang tanan mga estudyante ug mga magtutudlo sa ebanghelyo ni Jesukristo. Unsay nakapahiusa kanamo mao ang among gugma sa Manluluwas ug sa mga anak sa Iyang Amahan ug ang among pagsaksi nga Siya nagbarug isip pangulo sa Simbahan.
“Hapit tanan sa Napulog Duha naggikan sa mapainubsanong gigikanan, sama sa unsay nahitabo sa dihang ania pa Siya dinhi. Ang buhi nga Napulog Duha gihiusa diha sa pangalagad sa ebanghelyo ni Jesukristo. Sa dihang ang tawag miabut, ang matag usa mipadaplin sa iyang mga pukot, maingon ta, ug misunod sa Ginoo.”11
“Ako mopamatuod kaninyo nga ang 14 ka tawo diin ako kauban nga gi-orden sa tinuoray mga Apostoles. Sa pagpahayag niini, dili ako mosulti og sobra kay sa unsa ang gitudlo sa Ginoo, dili sobra kay sa unsa ang gipadayag ngadto ni bisan kinsa nga nagtinguha sa kinasingkasing ug tinuod nga katuyoan alang sa indibidwal nga pagsaksi sa Espiritu.
“Kini nga mga tawo tinuod nga mga sulugoon sa Ginoo; sunda ang ilang tambag.”12
Usa ka Apostolikanhon nga Saksi
“Daghan mga gikinahanglan nga kulang ako. Daghan kaayo sa akong mga paningkamot sa pagserbisyo nga kulang. Adunay usa lamang ka butang, usa ka gikinahanglan nga makapasabut niini. Sama kang Pedro ug sa tanan niadtong kinsa giordinahan sukad niana, ako aduna niana nga pagsaksi.
“Ako nasayud nga ang Dios mao ang atong Amahan. Iyang gipaila ang Iyang Anak, si Jesukristo, ngadto kang Joseph Smith. Ako mamahayag kaninyo nga ako nasayud nga si Jesus mao ang Kristo. Ako nasayud nga Siya buhi. Siya natawo sa tunga-tungang panahon Siya nagtudlo sa Iyang ebanghelyo ug gisulayan. Siya nag-antus ug gilansang sa krus ug nabanhaw sa ikatulong adlaw. Siya, sama sa Iyang Amahan, adunay lawas nga unod ug bukog. Siya mihimo sa Iyang Pag-ula. Kaniya ako mosaksi. Kaniya ako usa ka saksi.”13
Pagpahiuli sa Melchizedek Priesthood, ni Walter Rane © IRI.
Paghulagway sa litrato pinaagi ni Cody Bell
Paghulagway sa litrato © IRI