Visiting Teaching—usa ka Sagrado nga Buluhaton

Tun-i kini nga materyal sa mainampuon nga paagi ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.

Hugot nga Pagtuo, Pamilya, Kahupayan

Isip mga visiting teacher, kita adunay mahinungdanon nga espirituhanong misyon nga tumanon. “Ang bishop, kinsa mao ang gi-orden nga magbalantay sa ward, dili posible nga makabantay sa tanan nga karnero sa Ginoo sa usa ka higayon. Siya nagsalig sa dinasig nga mga visiting teacher sa pagtabang kaniya.”¹ Ang pagtinguha ug pagdawat og pagpadayag kon si kinsa ang i-assign sa pagbantay sa matag sister importante kaayo.

Ang inspirasyon magsugod samtang ang mga sakop sa kapangulohan sa Relief Society mainampuong maghisgot sa mga panginahanglan sa mga indibidwal ug mga pamilya. Dayon, uban sa pagtugot sa bishop, ang kapangulohan sa Relief Society mohatag sa buluhaton sa paagi nga ang mga sister makasabut nga ang visiting teaching usa ka importanting espiritwal nga responsibilidad.²

Ang mga visiting teacher matinud-anong makaila ug mohigugma sa matag sister, motabang kaniya sa paglig-on sa iyang pagtuo, ug moserbisyo kon gikinahanglan. Sila motinguha og personal nga inspirasyon aron masayud kon unsaon pagtubag ang espiritwal ug temporal nga mga panginahanglan sa matag sister nga ilang bisitahan.³

“Ang visiting teaching mahimo nga buluhaton sa Ginoo kon ang atong gipunting ang mga tawo kay sa mga porsiyento. Sa tinuod, ang visiting teaching dili gayud mahuman. Kini mas paagi pa sa kinabuhi kay sa buluhaton.”⁴

Gikan sa mga Kasulatan

Mateo 22:36–40; Juan 13:34–35; Alma 37:6–7

Gikan sa Atong Kasaysayan

Si Sister Eliza R. Snow, ang ikaduhang magtatambag sa kinatibuk-ang Relief Society, mitudlo, “akong gikonsiderar ang katungdanan sa visiting teacher nga usa ka taas ug balaan nga katungdanan. Iyan gitambagan ang mga visiting teacher “nga mapuno sa Espiritu sa Dios, sa kaalam, sa pagpaubos, sa gugma” sa dili pa sila mobisita sa mga panimalay aron sila masayud ug matubag ang espiritwal nga mga panginahanglan ingon man usab ang temporal nga mga butang. Siya miingon, “Basin bation ninyo nga mamulong sa kalinaw ug kahupayan, ug kon makita ninyo ang sister nga kulang na og kadasig, gaksa siya diha sa imong dughan sama sa imong buhaton sa pagpainit sa bata [kaniya] diha sa imong dughan.”⁵

Samtang kita magpadayon uban sa hugot nga pagtuo sama sa gibuhat sa nag-una nga mga sister sa Relief Society, maanaa kanato ang Espiritu Santo ug madasig aron masayran unsaon sa pagtabang sa matag sister nga atong gibisitahan. “Mangita [kita] og kaalam imbis sa gahum,” miingon si Sister Snow, “ug makaangkon [kita] sa tanang gahum sa kaalam nga anaa [kanato] nga [atong] magamit.”⁶