Doktrina ug mga Pakigsaad 135:3.

Sa wala pa siya mapatay, si Propeta Joseph Smith mipadangat og daghang butang nga makapanalangin sa tanang katawhan.

3 Si Joseph Smith, ang Propeta ug Manalagna sa Ginoo, nakahimo og daghan pa, gawas lamang kang Jesus, alang sa kaluwasan sa mga tawo niini nga kalibutan, kay ni bisan kinsa nga tawo nga nakapuyo dinhi. Sa mubo nga pagpuyo sulod sa bayente ka tuig, gipadangat niya ang Basahon ni Mormon, diin iyang gihubad pinaagi sa gasa ug gahum sa Dios, ug nahimong instrumento sa pagmantala niini sa duha ka kontinente; mipadala sa kahingpitan sa walay katapusan nga ebanghelyo, nga dala niini, ngadto sa upat ka suok sa kalibutan; mipadangat sa mga pagpadayag ug mga sugo nga naglangkob sa basahon sa Doktrina ug mga Pakigsaad, ug daghan pang maalamon nga mga dokumento ug mga instruksyon alang sa kaayohan sa mga anak sa tawo; mipundok sa liboan nga mga Santos sa Ulahing mga Adlaw, mitukod og usa ka bantugan nga siyudad, ug nagbilin og dungog ug pangalan nga dili gayud mabuntog. Siya nagpuyo nga halangdon, ug siya namatay nga halangdon diha sa mga mata sa Dios ug sa iyang mga katawhan; ug sama sa kasagaran nga pinili sa Ginoo sa karaan nga mga panahon, misilyo sa iyang misyon ug sa iyang mga buhat uban sa iyang kaugalingon nga dugo.

Manalagna

Usa ka manalagna:

Gihatagan sa katungod nga makakita gamit ang espirituhanong mga mata “mga butang nga dili makita sa kinaiyanhong mga mata” (tan-awa sa Moises 6:35–38).
Usa ka tigpadayag ug usa ka propeta (tan-awa sa Mosiah 8:13–16).
Nahibalo sa nangagi, karon, ug sa umaabut.

Nakahimo og Daghan pa

“Ang buhat diin si Joseph Smith nahilakip wala malimitahi niini nga kinabuhi lamang, apan may kalabutan usab sa kinabuhi nga moabut, ug sa kinabuhi nga miagi. Sa ato pa, may kalabutan kini niadtong kanhi nabuhi dinhi sa kalibutan, sa mga buhi karon, ug ngadto sa mga nagsunod kanato. Kini … may kalabutan … sa tibuok tawhanong pamilya gikan sa kahangturan ngadto sa kahangturan.”

Presidente Joseph F. Smith (1838–1918), Mga Pagtulun-an sa mga Presidente sa Simbahan: Joseph F. Smith (1998), 15–16.

Gasa ug Gahum sa Dios

Gihubad ni Joseph Smith ang Basahon ni Mormon “pinaagi sa kalooy sa Dios, sa gahum sa Dios” (D&P 1:29) ug “sa mga pamaagi nga giandam na kaniadto” (D&P 20:8), lakip sa Urim ug Thummim.

Dungog ug Pangalan nga Dili Mabuntog

“Bisan tuod nga ang mga panghitabo niadtong Hunyo 27, 1844 [Pagpatay ni Joseph ug ni Hyrum Smith], mga masulub-on nga trahedya, nahatagan kita og kahupayan sa atong pagkaamgo nga ang Pagkamatay ni Joseph Smith dili maoy katapusang hugna niini nga asoy. Bisan tuod nga kadtong nagtinguha sa iyang kinabuhi mibati nga mahagsa ang Simbahan kon wala siya, ang iyang gamhanang pagpamatuod sa kamatuoran, ang mga pagtulun-an nga iyang gihubad, ug ang iyang pamahayag kabahin sa mensahe sa Manluluwas nagpadayon karon diha sa mga kasingkasing sa mga miyembro sa [Simbahan] sa tibuok kalibutan, kinsa namahayag nga siya usa ka propeta sa Dios.”

Presidente Thomas S. Monson, “Si Propeta Joseph Smith: Magtutudlo pinaagi sa Ehemplo,” Liahona, Nob. 2005, 69.

Misilyo sa Iyang Misyon ug sa Iyang mga Buhat pinaagi sa Kaugalingon Niyang Dugo

Basaha ang mga pulong sa himno nga “Pagdayeg sa Tawo” (Mga Himno ug mga Awit sa mga Bata, nu. 50) ug dayon isulat sa inyong journal ang inyong mga pagbati mahitungod ni Propeta Joseph Smith.