Mensahe sa Unang Kapangulohan
Anaa Kanunay sa Tunga-tunga
Sa daghang mga kalendaryo sa kalibutan, ang Hulyo nagtimaan sa tunga-tunga sa tuig. Samtang ang sinugdanan ug katapusan sa mga panghitabo saulugon ug hinumduman, ang tunga-tunga sa kanunay dili mabantayan.
Ang mga sinugdanan mao ang mga panahon sa paghimo og mga resolusyon, sa pagmugna og mga plano, sa pagdugang og kusog. Ang mga katapusan mao ang mga panahon sa pagpahulay ug maghimong maglakip sa mga pagbati sa kalampusan o kapakyasan. Apan sa eksaktong panglantaw, ang pagkonsiderar sa atong kaugalingon nga anaa sa tunga-tunga sa mga panghitabo makatabang kanato nga dili lang mas makasabut sa kinabuhi apan makapuyo usab niini nga mas makahuluganon.
Ang Tunga-tunga sa Misyonaryo nga Buhat
Kon mamulong ko sa atong batan-ong mga misyonaryo, kanunay nako silang sultihan nga anaa sila sa tunga-tunga sa ilang mga misyon. Bisan pa kon miabut lang sila sa miaging adlaw o mouli pagkasunod adlaw, hangyoon nako sila sa paghunahuna sa ilang kaugalingon nga anaa kanunay sa tunga-tunga.
Ang bag-ong mga misyonaryo mahimong mobati nga sila wala pa kaayoy kasinatian aron mahimong epektibo, mao nga dili sila kaayo makasulti o makalihok nga may pagsalig ug kaisug. Ang sinati na nga mga misyonaryo kinsa hapit na matapos ang ilang misyon mahimong mobati og kaguol nga hapit na matapos ang ilang misyon, o mahimong mawad-an og gana sa pagtrabaho samtang mamalandong kon unsa ang ilang buhaton human sa ilang misyon.
Bisan unsa pa ang mga sirkumstansya ug bisan asa sila nagserbisyo, ang tinuod mao nga ang mga misyonaryo sa Ginoo nagpugas matag adlaw og dili maihap nga mga liso sa kamaayo. Ang paghunahuna nga sila anaa kanunay sa tunga-tunga sa ilang mga misyon makapadasig ug makapaabtik niining matinud-anong mga representante sa Ginoo. Sama nga mahitabo kini sa full-time nga mga misyonaryo, mahitabo usab kini kanatong tanan.
Kita Anaa Kanunay sa Tunga-tunga
Kining kausaban sa panglantaw dili lang usa ka paglipat sa hunahuna. Adunay lalum nga kamatuoran sa ideya nga kita anaa kanunay sa tunga-tunga. Kon atong tan-awon sa mapa ang atong lokasyon, kita matintal sa pagsulti nga kita anaa sa sinugdanan. Apan kon atong klarohon gyud sa pagtan-aw, bisan asa pang dapita kita anaa lamang sa tunga-tunga sa dako nga lugar.
Kon ingon niini kabahin sa lugar, mao usab kini sa panahon. Mahimong mobati kita nga anaa sa sinugdanan o katapusan sa atong kinabuhi, apan kon kita molantaw asa na ta dapit karon diha sa kahangturan—kita makaamgo nga ang atong espiritu anaa na lapas sa atong kapasidad sa pagsukod ug, tungod sa hingpit nga sakripisyo ug Pag-ula ni Jesukristo, ang atong kalag maanaa sa kahangturan—kita masayud nga kita sa tinuoray anaa sa tunga-tunga.
Bag-ohay lang nadasig ko nga usabon ang lapida sa lubnganan sa akong mga ginikanan. Tungod sa panahon ang lubnganan ingon bati na tan-awon, ug mibati ko nga ang bag-ong lapida mas maayo alang sa ilang talagsaon nga kinabuhi. Sa dihang akong gitan-aw ang mga petsa sa pagkatawo ug pagkamatay nga anaa sa lapida nga gisumpay sa kasagarang gibaliwala nga gamay nga dash, kining mubo nga simbolo sa panahon sa kinabuhi nakapahunahuna ug nakapabati kanako og daghang maanindot nga mga panumduman. Ang matag usa niining bililhon nga mga panumduman nagpakita og higayon sa tunga-tunga nga panahon sa kinabuhi sa akong ginikanan ug sa akong kinabuhi.
Bisan pila pa ang atong edad, bisan asa pa kita, kon adunay mga hitabo sa atong kinabuhi, kita anaa kanunay sa tunga-tunga. Dugang pa, kita hangtud sa hangtud anaa sa tunga-tunga.
Ang Paglaum nga Maanaa sa Tunga-tunga
Oo, adunay mga higayon sa mga sinugdanan ug mga katapusan sa tibuok natong kinabuhi, apan kini mga timailhan lamang sa dalan sa talagsaong tunga-tunga sa atong mahangturong kinabuhi. Dili igsapayan kon kita anaa sa sinugdanan o sa katapusan, kon kita batan-on o tigulang, gamiton kita sa Ginoo alang sa Iyang mga katuyoan kon ato lamang ibaliwala ang bisan unsang panghunahuna nga mobabag sa atong abilidad sa pagserbisyo ug motugot nga ang Iyang kabubut-on mohulma sa atong kinabuhi.
Ang Salmista miingon, “Kini mao ang adlaw nga gibuhat sa Ginoo; niini [kinahanglang] managmaya ug managkalipay kita” (Salmo 118:24). Si Amulek nagpahinumdom kanato nga “kini nga kinabuhi mao ang panahon alang sa mga tawo sa pagpangandam sa pagsugat sa Dios; oo, tan-awa ang adlaw niini nga kinabuhi mao ang adlaw alang sa mga tawo sa paghimo sa ilang mga buluhaton” (Alma 34:32; emphasis gidugang). Ug usa ka mambabalak misulat, “Ang kahangturan—naglangkob sa mga Karon.”1
Ang pagkaanaa kanunay sa tunga-tunga nagpasabut nga ang dula dili gayud matapos, ang paglaum dili gayud mawala, ang kapildihan dili mao ang katapusan. Dili igsapayan kon asa kita o unsa ang atong mga sirkumstansya, ang kahangturan sa mga sinugdanan ug sa mga katapusan anaa pa sa atong unahan.
Kita anaa kanunay sa tunga-tunga.
Pagtudlo Niini nga Mensahe
Ikonsiderar sa paghisgut uban sa pamilya kon sa unsang paagi sila “anaa kanunay sa tunga-tunga,” bisan kon sila nagsugod o nagtapos og usa ka butang. Awhaga sila sa pagbuhat sa ilang pinakamaayo sa ilang mga kalihokan karon, dili magpabilin sa nangagi o magpaabut sa mosunod nga kalihokan or proyekto. Mahimo ninyong isugyot nga sila makapili og usa ka butang nga ilang buhaton isip usa ka pamilya sa pagtuman niining tambag ug magsabut og petsa nga ilang laumon nga matuman ang ilang tumong.
LITRATO PINAAGI SA © Shutterstock
The Lord’s Harvest, by Marilee B. Campbell; mga paghulagway pinaagi ni Bryan Beach