Gusto Kong Molingkod sa Sabakan ni Jesus

Pangalan gipugngan

Kwatro anyos lang ang among apo nga lalaki sa dihang gikuha siya sa polis sa kilid sa highway. Siya miingon nga siya padulong sa balay sa iyang Lola, mga lima ka milya (8 km) kalayo.

Kini mao ang ikaduhang higayon nga milayas siya sa dili malipayong panimalay, naningkamot nga makaabut kanako. Sa nagsunod nga pipila ka bulan, nakaamgo ko nga ang responsibilidad sa pagpadako sa akong apo nga lalaki ug sa iyang duha ka manghud nga mga babaye ingon nga mapasa ngari kanako—usa ka ideya nga dili ko andam nga dawaton.

Ang akong bana ug ako naningkamot pag-ayo sa pagpatubo sa among mga anak diha sa mga baruganan sa ebanghelyo, apan sa kaulahian ilang gisalikway kadto nga mga baruganan. Kapin sa 50 na ang akong edad ug mibati nga ako aduna nay katungod sa pagbuhat sa mga butang nga akong ganahan. Gihambin nako ang tumong sa akong bana ug nako nga mag-misyon kon siya moretiro na. Ang ideya nga mag-grocery uban sa gagmayng mga bata, pag-andam og mga pagkaon, pagpanlaba og daghan kaayo, ug sa umaabot nga adlaw mag-amuma og mga tin-edyer nakapahilak kanako.

Usa ka hapon, hinoon, usa ka butang ang nakapausab sa akong gibati. Usa ka gamay nga butang ang nakapasaput sa akong apo, busa ako siyang gipalingkod sa akong sabakan ug gipahiran ang iyang mga luha. Samtang ako siyang gikuptan, kami naghisgut sa dakong gugma ni Jesus ngadto kaniya. Sa duol adunay kalendaryo sa bong-bong nga nagpakita sa mga painting sa Manluluwas, busa gitagsa-tagsa namo og tan-aw kadtong nindot nga mga litrato.

Ang akong apo nainteresado kaayo sa paghulagway sa Manluluwas nga naglingkod sa may pultahan nga bato nga Iyang gisabak ang gamay, brown og buhok nga babaye. Sa painting, ang Manluluwas ug ang bata nagpakita nga malinawon. Ang akong apo mitan-aw og maayo, mitudlo sa babaye, ug gitawag kini sa pangalan sa iyang igsoon.

“Giunsa ni Katie paglingkod sa sabakan ni Jesus, Lola?” nangutana siya. “Gusto usab kong molingkod sa Iyang sabakan!”

“Dili ka karon makalingkod sa sabakan ni Jesus, palangga, apan makalingkod ka sa akong sabakan,” miingon ko. “Si Jesus nag-andam og mga lola alang sa gagmayng mga bata aron sa paghigugma kanila ug pagkupot kanila ug pag-amuma kanila kon sila nagkinahanglan niini.”

Sa kalit lang ang akong kasingkasing nakadawat sa umaabot nga mohigugma—sama sa paghigugma sa Manluluwas—sa tulo ka pinalanggang mga bata kinsa nanginahanglan kanako. Sila dili na palas-anon apan talagsaon nga panalangin ug oportunidad nga makaserbisyo sa atong Ginoo.

Mapasalamaton ko kanunay sa malumong kalooy sa Dios nga gihatag kanako nianang hapona. Kini nakapausab sa akong kinabuhi ug nagpadayon sa paglig-on ug pagpanalangin sa among panimalay.