Kon ang Maayong mga Plano Napakyas
Ang pagplano sa kaugmaon importante, ilabi na para sa mga young adult. Apan unsa ang mahitabo kon ang labing maayo nga mga plano wala mosaler?
Si Jung Sung Eun sa Korea wala makapasar sa eksamin aron mahimong magtutudlo. Si Tina Roper sa Utah, USA, natangtang sa trabaho nga iyang gilauman nga mahimong kabuhian. Si Todd Schlensker sa Ohio, USA, nakadawat og espiritwal nga kumpirmasyon nga magminyo apan ang iyang engagement natapos. Si Alessia Mazzolari (pangalan gipugngan) sa Italy mitapos sa iyang gituohan nga mao ang hingpit nga relasyon.
Walay gusto nga mosangput ngadto sa “plan B.” Apan bisan kon ang atong mga plano mapakyas, ang Langitnong Amahan dili mobiya sa Iyang mga anak. Adunay daghang mga paagi aron ang kinabuhi mamaayo. Inig-abut sa panahon, atong makita nga ang mga babag nga nakapausab sa atong mga plano naghatag kanato og mga pagtulun-an ug kasinatian (tan-awa sa D&P 122:7) ug modala ngadto sa usa ka kahimtang nga mas maayo.
Pagtukod og Karakter, Dili Résumé
Si Sung Eun nagkugi og maayo aron matuman ang iyang dugay nang pangandoy nga mahimong magtutudlo. Siya mipasabut, “Tungod kay naningkamot ko pag-ayo sa tanan nakong gibuhat, halos kanunay nako nga maangkon ang akong gipangandoy ug giampo.” Apan kana wala mahitabo sa dihang mikuha siya sa eksamin sa kwalipikasyon sa usa ka magtutudlo. “Sa dihang nahagbong ko,” siya miingon, “mibati ko nga nawala ang tanan nakong damgo sa usa lang ka adlaw.”
Si Tina sa sinugdanan wala mabalaka sa diha nga ang lain nga kompanya mipalit sa kompanya nga iyang gitrabahoan. Ang bag-ong organisasyon misaad kaniya og posisyon nga molungtad, busa mibalhin siya paduol sa iyang trabahoan nga may dakong paglaum sa usa ka bag-ong trabaho. Sa dihang gitangtang siya sa kompaniya mga pipila lang ka bulan ang milabay, mibati siya nga “nawala, naglibug, nagguol, ug nahadlok.”
Imbis nga mag-focus og maayo sa paghimo sa ilang mga résumé, si Sung Eun ug Tina nakaamgo nga sila maka-focus usab sa pagtukod sa ilang karakter. Silang duha nakakaplag og paghupay pinaagi sa pagtuon sa ebanghelyo ug pag-ampo.
“Si Apostol Pablo usa ka talagsaong higala nga mitabang kanako nga magmapailubon ug mopadayon sa pagsagubang sa mga hagit,” miingon si Sung Eun. “Siya sa kanunay may positibong kinaiya ug andam nga nagpaabut kon unsa ang giandam sa Dios alang kaniya, kaysa maglaum para sa iyang kaugalingong timing.
“Nakakat-on ko og usa ka butang gikan sa iyang ehemplo: ang panahon sa pagpaabut dili lang proseso nga kinahanglan natong sination aron makaangkon sa atong gusto. Hinoon, kini usa ka proseso diin kita mamahimo kon unsa ang gusto sa atong Langitnong Amahan alang kanato pinaagi sa mga kausaban nga atong gihimo.”
Nakaplagan ni Tina nga ang kausaban nga iyang gikinahanglan pag-ayo mao ang pag-usab sa panglantaw. “Natingala ko nga nahibaloan nga akong gisukod ang bili sa akong kaugalingon sa kalibutanong mga ideya,” nahinumdon siya. “Mibati ko nga bililhon tungod sa akong trabaho ug posisyon, nga nangawala ra. Nakaplagan nako karon ang bili sa akong kaugalingon diha sa mahangturong mga kamatuoran nga ako anak nga babaye sa Langitnong Amahan ug ako adunay balaanong potensyal. Kini nga mga kamatuoran dili mawala.”
Sila si Tina ug Sung Eun miangkon nga samtang ang pagtukod og karakter dili sa kanunay makahimuot, ang mga bunga sa personal nga kalamboan maayo gayud. Si Sung Eun miingon, “Ang sunod nga tuig human ko nahagbong sa eksamin sa kwalipikasyon sa magtutudlo dili lamang ang pinakasakit ug pinakaguol nga panahon, kini usab mao ang pinaka bililhon. Mas nakasabut ko sa mga kalisud sa mga katawhan ug nagtinguha nga motabang kanila nga kinasingkasing nga katuyoan ug pag-amuma.”
Ang mga ehemplo ni Ammon ug sa iyang igsoong mga lalaki sa Basahon ni Mormon mipakita kang Tina kon sa unsang paagi ang Ginoo milig-on sa iyang pagtuo aron sa pagtabang kaniya nga makab-ut ang iyang tibuok potensyal. “Ang plano sa Ginoo mao nga ang mga Nephite moluwas sa ilang igsoon nga mga Lamanite imbis nga mogamit og espada sa pagsulbad sa problema,” siya mipasabut. “Ang mga anak nga lalaki ni Mosiah gihatagan og buluhaton nga nagkinahanglan og dakong pagtuo, apan gisaaran usab sila nga kon ilang agwantahon ang ilang kasakit nga mapailubon, sila magmalampuson (tan-awa sa Alma 26:27). Ang pagpailub mao ang usa sa akong pinakalisud nga pagsulay tungod kay gusto nakong masabtan ang akong tibuok plano—apan nakaamgo ko nga ang plano sa Langitnong Amahan ug timing alang kanato sa kanunay mao ang pinakamaayo.”
Pagsunod sa mga Kasugoan Bisan Unsa pa ang Mahitabo
Si Todd nag-atubang og maayong kaugmaon sa iyang pagpauli gikan sa misyon. Samtang nag-eskwela, naila-ila niya ang usa ka talagsaong batan-on nga babaye. Human sa pipila ka bulan nga pagpanguyab ug usa ka espiritwal nga kumpirmasyon, si Todd mi-propose ug gidawat sa babaye. Nagplano sila nga ang ilang kasal inig-tapos sa ting-init, ug sila namauli aron mag-andam.
“Tulo ka semana human nga nanamilit kami sa usag-usa didto sa eskwelahan, iyang gitapos ang among plano sa pagpakasal,” mihinumdon si Todd. “Ang tumang kasubo dili paigo sa pagpahayag sa akong mga pagbati. Adunay daghang wala matubag nga mga pangutana sa akong hunahuna; dili gayud masabut. Nakadawat ko og kumpirmasyon diha sa balay sa Ginoo, ug karon ang among relasyon natapos. Ang akong pagpamatuod nasulayan gayud pag-ayo.
“Sa walay swerte, sa mga tuig human sa panagbulag, dili ko makabuntog niini. Wala ko masayud kon ako makasalig pa ba og usab sa pagbati sa kumpirmasyon. Kanunay kong nagsalig sa Ginoo ug naghimo sa akong pinakamaayo sa pagsunod sa mga sugo,” siya nagpadayon. “Ingon og nakawang lamang.”
Si Alessia usab naghunahuna nga ang iyang relasyon sa usa ka batan-ong lalaki mao na gayud. “Ang among istorya nindot kaayo, nga bisan kami nakasinati og normal nga mga kalisud sama sa nasinati sa managtiayon, naghunahuna kami nga ang among relasyon dili matapos,” siya mihinumdom.
Sa dihang nag-mission ang hinigugma ni Alessia, ang pagkalagyo lisud kaayo kaysa gituohan ni Alessia. “Samtang wala siya, mas naila nako ang akong kaugalingon. Nakaamgo ko nga daghang mga butang sa akong kinabuhi ang wala pa masakto ug sa kasagaran mipaluyo ko sa binata nga mga ideya kaysa magpaubos sa akong kaugalingon ug atubangon ang reyalidad,” mihinumdom siya. “Nagpuyo ko nga ingon og sama sa fairy tale, daw ang gugma paigo aron mahimong sakto ang tanan, ug sa kanunay kini makapabaliwala kanako sa labing importanting mga butang.”
Sa gihapon, si Alessia nagdahum og malipayong panaghiusa ug padayon nga relasyon inig-uli sa iyang hinigugma gikan sa misyon. Apan, sa iyang pag-uli, silang duha nag-date lang og kadiyot dayon nagbulag. “Kadto mao ang usa sa labing pait nga higayon nga akong mahinumduman,” miingon si Alessia.
Sa ilang isigka kasinatian, sila si Todd ug Alessia sa katapusan nakaamgo nga bisan tuod ang usa ka mahinungdanon nga relasyon sa ilang kinabuhi nausab, dili sila makabiya sa ilang pagkamasulundon ug pagdapig sa Ginoo. Siya nahimo nilang angkla sa dihang ang tanan nagkausab ug dili na sigurado.
“Ako walay tubag nganong nakadawat ko og kumpirmasyon nga magminyo, ug wala kini mahitabo,” mihinumdom si Todd. “Apan nakaamgo ko nga dili kini igsapayan. Ang mahinungdanon mao nga ako aduna gihapoy pagtuo ni Kristo, ug akong gigamit kana nga pagtuo sa pagsalig sa bisan unsang giplano sa Ginoo alang kanako.”
Si Alessia nasayud gyud nga ang hingpit nga pagdapig ngadto sa Ginoo makahatag kaniya sa kalig-on nga iyang gikinahanglan. “Nasabtan nako nga miabut na ang higayon nga ako mohukom kon unsa nga matang sa tawo ako gusto nga mamahimo,” siya miingon. “Magpadayon ba ko nga mopuyo nga kulang sa tinguha, o magsugod ba ko sa dalan paingon nga mahimong tinuod nga disipulo ni Kristo? Gusto nakong mas mailhan Siya, tinuoray nga higugmaon Siya, ug maningkamot nga mahimong mas maayo nga tawo pinaagi sa pagsunod sa Iyang mga sugo—dili sa gawas lamang apan sa akong kasingkasing uban sa lunsay nga pagkamatinuoron.”
Pagpalambo og Paglaum sa Umaabot ug Hugot nga Pagtuo ni Kristo
Human makasinati niining wala damha nga mga kapakyasan, kining upat ka mga young adult nanlimbasug sa pagpangita og kaisug nga magpuyo sa karon ug magplano og usab alang sa umaabot. Apan ilang nakaplagan nga ang ilang hugot nga pagtuo sa Ginoo milambo.
Si Sung Eun nakahinumdom nga human nahagbong sa iyang eksaminasyon, ang pagsulay sa bag-ong mga butang nahimong lisud. Ug dayon adunay importante kaayo nga pagkadiskobre: “Nakaamgo ko nga ang tinuod nga kapakyasan mao ang maghunahuna kanunay sa nangagi ug dili maningkamot nga mosulay sa paghan-ay sa mga butang. Mihukom ko nga imbis magpadayon nga magguol, akong gihimong oportunidad sa pagkat-on kining lisud nga panahon. Ang akong abilidad sa pagsabut sa kinabuhi sa kinatibuk-an milapad ug milalum, ug nakakat-on ko nga ang pagtapos sa usa ka butang makapasugod sa laing butang.” Mikuha siya og usab ug nakapasar na sa eksamin ug karon “usa ka malipayon nga magtutudlo nga malingaw nga mogahin og panahon uban sa mga estudyante matag adlaw.”
Si Tina mipili nga mosalig nga adunay giandam alang kaniya, bisan tuod lisud nga moatubang sa umaabot nga walay kasiguroan. “Mihukom ko nga moeskwela og balik, ug nagtuon ko og field sa art ug teknolohiya, nga ganahan kaayo kong magkat-on apan wala ko sa gikinahanglan nga mga kahanas,” siya nagpasabut. “Andam nakong magsugod og laing hagit sa kinabuhi, mas maayo, salamat sa kaalam sa akong Langitnong Amahan.”
Si Todd nagpadayon sa pagpakig-date sulod sa unom ka tuig ug naningkamot nga mopalambo og pagsalig sa Ginoo. Bisan kon siya nakailaila og mga babaye nga iyang giganahan pag-ayo, kinahanglan niyang buntugon ang iyang mga pagduhaduha gikan sa nangagi sa pagguba sa iyang mga paglaum alang sa umaabot. “Ang pagpangita og determinasyon nga dili magpadala sa akong mga pagduhaduha sa unom ka tuig dili sayon,” miingon siya. “Apan determinado ko sa paningkamot nga ipakita sa akong kaugalingon nga misalig gyud ko sa Ginoo ug sa Iyang mga pagdasig, bisan tuod nasuko ko Kaniya sa una.” Usa ka bag-ong relasyon sa katapusan ang misangput ngadto sa kaminyoon sa templo.
“Kanunay kong matingala nganong ang Ginoo mopanalangin kanako og usa ka tawo sama ka maayo sa akong asawa nga dugay man ko nga nanlimbasug aron hingpit nga mosalig sa mga pagbati sa Espiritu,” namalandong si Todd. “Kini pagpamatuod alang kanako nga ang Ginoo nagpaabut sa pagpanalangin kanako, apan sumala kanunay sa Iyang panahon.”
Si Alessia, pinaagi sa pagpahinungod pag-usab sa iyang kaugalingon ngadto sa Ginoo, mipalambo og halawum ug personal nga pagpamatuod. “Ang plano sa kaluwasan nahimong mas makahuluganon alang kanako, ug ang akong mga pakigsaad nahimong mas moepekto ug halawum. Ang Pag-ula ni Kristo dili lang usa ka teyoriya o usa ka butang nga akong nabasahan, tingali sa taphaw lang. Ang kausaban sa kasingkasing nahitabo sa sulud, ug ako adunay sigurado nga saksi.” Karon, siya miingon, siya mibati nga sama sa usa ka bag-ong tawo.
Dili igsapayan sa mga panghitabo sa panaw sa kinabuhi, ang katapusang destinasyon sa kinabuhing dayon mao ang gusto sa Langitnong Amahan alang sa Iyang mga anak (tan-awa sa Moses 1:39). Ang uban gani mahimong molantaw nga ang “plan B” mao ang yanong paagi sa paghimo sa Iyang “plan A” nga matinuod.
Mga paghulagway pinaagi ni Neil Webb