Ang imong pagpamatuod tingali mas lig-on pa kay sa imong nahibaloan.
Naglingkod ka panahon sa miting sa pagpamatuod. Samtang nagtan-aw ka sa mga miyembro sa kongregasyon nga mibarug ug mipamatuod, imong gibati nga ingon og ikaw kinahanglan usab. Apan unsay imong isulti? Ug unsa kaha kon makahilak ka samtang naa ka sa atubangan? O unsa kaha kon dili ka makahilak? Makapangutana ka kon ikaw duna ba gayud kahay pagpamatuod. O tingali dili ka sigurado kon unsay imong pagpamatuod. Aniay pipila ka mga sumbanan nga makatabang kanimo nga masayud kon unsa ang pagpamatuod ug unsa ang dili.
Ang Pagpamatuod Usa ka Kombiksyon, Kahibalo, o Pagtuo sa usa ka Kamatuoran
“Ang Lunsay nga Pagpamatuod” (Alma 4:19) magsugod sa lunsay nga pagtuo. Ang imong pagpamatuod usa ka espirituhanong saksi kon unsay imong gituohan o nahibaloan nga tinuod (tan-awa sa D&P 80:4). Kon mopakigbahin ka sa imong pagpamatuod, ang pinakalunsay ug pinaka-impluwensyal nga mga parte moabut gikan sa mga pulong sama sa nahibalo, nagatuo, ug nagapamatuod. Kon malitok nimo kini uban sa sinseridad nga, “nahibalo ko nga ang Basahon ni Mormon tinuod,” makabaton ka og gahum sa pag-usab og mga kinabuhi ug makadapit sa Espiritu sa pagtandog sa uban.
Hunahunaa nga duna kay kahon nga puno sa mga piraso sa puzzle nga gihimo alang lamang gayud kanimo. Pinaagi sa paggamit sa litrato nga naa sa atubangan sa kahon, misulay ka sa pagporma sa puzzle. Kon ang duha ka piraso sa puzzle mohaum, nahibalo ka nga magkauban kini. Ang mga pagpamatuod naglihok sa sama nga paagi. Samtang duna kay espirituhanong mga kasinatian, ang nagkalain-laing mga piraso sa imong pagpamatuod magsugod sa paghaum, ug magsugod ka sa pagtuo o pagkahibalo sa piho nga mga kamatuoran sa ebanghelyo.
Bisan kon sa karon wala ka pa masayud kon ang tanan mahitungod sa Simbahan tinuod ba, ang Langitnong Amahan mopanalangin kanimo ug motabang kanimo nga makakat-on samtang anaa kanimo ang matarung nga tinguha sa pagkasayud ug ikaw tinuoray nga naningkamot sa pagkat-on.
Ang usa ka Pagpamatuod Personal
Samtang nagporma ka sa imong puzzle, ang imong pamilya ug mga higala mahimong motabang kanimo panagsa sa pagporma niini. Apan sa katapusan, imo ra kini nga talagsaong puzzle nga pagatukuron ug protektahan. Mahimong usahay magsalig ka sa hugot nga pagtuo sa imong mga ginikanan o mga higala, apan samtang magkadaghan ang espirituhanon nimong mga kasinatian, mamentinar nimo ang kaugalingon nimong pagpamatuod.
Samtang magtubo ka sa ebanghelyo, importante nga makapalambo ka og kaugalingon nimong pagpamatuod. Sama nga ang duha ka tawo dunay managlahing paagi sa pagporma sa usa ka puzzle—tingali ang usa ka tawo magsugod sa mga kilid sa pagporma niini samtang ang usa magsugod pinaagi sa pagtugma sa mga kolor—ang matag usa kanato magpalambo og usa ka pagpamatuod pinaagi sa mga pagtuo ug mga kasinatian sa han-ay nga lahi sa usag usa.
Kon dili ka sigurado sa bisan unsang butang, pag-ampo nga tinuoray alang sa giya ug kamatuoran. Sa kasagaran ang mga pag-ampo dili tubagon sa paagi nga atong gilauman, mao nga bukha kanunay ang imong mga mata ug kasingkasing alang sa mga tubag.
Ang usa ka Pagpamatuod Padayon nga Magtubo
Sama ra nga dili nimo makompleto og porma ang puzzle sa kahon sa walay paglihok, dili ka makalaum nga ang imong pagpamatuod moabut diha dayon sa usa ka higayon. Makakat-on ka, anam-anam kada piraso, sa kamatuoran sa ebanghelyo.
Ang pagbaton og usa ka lig-ong pagpamatuod nagkinahanglan og kanunay nga paningkamot. Samtang padayon ka nga magpalambo sa imong kahibalo sa ebanghelyo, ang Espiritu Santo mopanalangin sa imong mga paningkamot ug magpadayon sa pagtubo ang imong pagpamatuod.
Puzzle art pinaagi ni Eric P. Johnsen; gilitratohan ni Welden C. Andersen
