Atong mga Panimalay, Atong mga Pamilya
Ayaw Gayud Pag-undang
Usa ka magtiayon ang naghisgut sa ilang tinagsa nga pagkakabig sa ebanghelyo ni Jesukristo—nga migintang og 35 ka tuig.
Ang Istorya sa Asawa
Sulod sa 35 ka tuig naglaum ug nagpaabut ko nga ang akong bana mamiyembro sa Simbahan. Kadtong mga tuiga napuno sa kinasingkasing nga mga pag-ampo, apan tulo ka piho nga mga pag-ampo ang dili makalimtan nga mga importanting punto sa akong kasinatian.
Si Al ug ako naminyo niadtong 1959. Usa ka dekada ang milabay kami adunay tulo ka anak ug nagpuyo sa gamayng lungsod sa Canada. Si Al nanag-iya og negosyo sa konstruksyon, ug ako anaa sa balay nga panagsa motabang sa negosyo. Sa matag tapus sa semana, si Al ug ako makig-party sa among mga higala, kanunay adunay ilimnong makahubog. Ang akong amahan palahubog, mao nga maglagot ko nga ang pag-inom og makahubog may dakong bahin sa among kinabuhi, apan kini nahimong paagi sa among pagpakigrelasyon sa uban.
Niadtong tuiga, 1969, nakaamgo ko nga ang akong kinabuhi walay kapaingnan ug ang among mga anak angayan og mas maayong kinabuhi kaysa among gihatag kanila karon. Usa ka gabii human sa party nga may inom, miluhod ko ug nag-ampo, “Pinalanggang Dios, kon Ikaw anaa, palihug tabangi ko nga mausab ang akong kinabuhi.” Misaad ko Kaniya nga dili nako moinom og alkohol pag-usab, usa ka pasalig nga ako gayud nga gituman sukad niadto.
Kadto mao ang unang dili makalimtan nga pag-ampo, ug kadto natubag dayon. Ang anak nga babaye sa akong bayaw, akong pag-umangkon, gidapit sa pagtambong sa Primary uban sa usa ka higala nga Santos sa Ulahing mga Adlaw. Samtang ang akong bayaw daghang nakat-unan kabahin sa Simbahan, siya nadasig sa pagpadala kanako og subskripsyon sa mga magasin sa Simbahan, nga miabut sulod sa usa ka bulan gikan niadtong akong unang pag-ampo. Wala ko mahibalo unsa ang Mormon, apan naganahan kaayo ko sa mga mensahe nga anaa sa magasin ug gibasa ang tanan. Mihukom ko nga mag-investigate sa Simbahan ug didto nakaplagan nako ang tubag. Giusab nako ang akong kinabuhi, ug nabunyagan ko niadtong Hunyo 19, 1970.
Si Al wala manumbaling sa akong mga tinguha. Siya ganahan sa una namong estilo sa kinabuhi ug nagpadayon niini. Siya nagpadayon nga buotan nga bana, amahan, ug tigsangkap, apan sa sunod nga 35 ka tuig, kutob nga may kalabutan sa ebanghelyo, nag-inusara ko.
Gipadako nako ang among mga anak sa Simbahan, apan human sa pipila ka tuig, ang among mga anak mas ganahang mogahin sa Dominggo nga mag-boating uban sa ilang papa kaysa magsimba uban kanako. Nasagmuyo ko pag-ayo. Usa ka adlaw niadtong 1975 nakig-istorya ko sa akong stake president ug miingon kaniya nga nakahukom ko nga kinahanglan kong mobiya sa Simbahan tungod kay natunga ang among pamilya. Siya mapainubsanong naminaw ug miingon, “Buhata unsay imong kinahanglan nga buhaton, apan siguradoa nga ang Amahan sa Langit moaprubar niini.” Busa miuli ko ug nagpuasa ug nag-ampo. Kadto mao ang ikaduhang dili nako makalimtan nga pag-ampo. Ang tubag miabut isip impresyon nga ako nasumpay sa kadena sa ebanghelyo alang sa akong pamilya; kon putlon ko kini, ang tanan mawala. Nasayud ko nga ang tubag gikan sa Dios, busa mipasalig ko nga dili gayud mobiya sa Simbahan. Ug wala gyud ko mobiya.
Dili sayon ang magpabiling matinud-anon, apan pipila ka mga butang ang nakatabang kanako nga magpabilin sa akong tinuohan ug mapailubong naglaum sa adlaw nga ikonsiderar pag-usab ni Al ang ebanghelyo:
-
Kanunay nakong gihigugma si Al ug akong gibuhat ang tanan sa pag-atiman kaniya ug mahimong tigsuporta, maunungon nga asawa.
-
Kanunay ko nga mag-ampo. Ang Langitnong Amahan ug si Jesukristo nahimo nakong mga kompanyon sa ebanghelyo. Kon lisud nga ikauban si Al tungod kay siya wala nagsunod sa mga sumbanan sa ebanghelyo, mag-ampo ko sa Langitnong Amahan ug nahimong mas makaila sa akong Manluluwas.
-
Kanunay kong magbasa sa akong kasulatan ug sa matag publikasyon sa Simbahan kon maanaa kanako, lakip na ang Ensign. Duha ka mga bersikulo sa kasulatan ang, 3 Nephi 13:33 ug Doktrina ug mga Pakigsaad 75:11, nahimong makahuluganon ug nakatandog kaayo kanako. Kini naghatag kanako og kalig-on ug pailub nga magpadayon samtang magpaabut sa kausaban sa kasingkasing sa akong bana ug mga anak.
-
Matinud-anon ko nga misimba nga ako-ako lang hangtud nga mibalik ang matag usa sa among mga anak. Ang tanan aktibo karon. Sa dihang nanagko na sila ug mibiya sa panimalay, nagpadayon ko sa pagsimba nga ako-ako lang.
-
Kami mag-family home evening bisan wala si Al nasayud nga mao kadto ang among gibuhat. Maghisgut ko og usa ka hilisgutan samtang anaa sa lamesa, ug amo kining hisgutan isip usa ka pamilya.
-
Naningkamot ko nga magmasulundon ug mobuhat sa eksakto nga butang.
-
Nakaangkon ko og dugang kalig-on pinaagi sa paghangyo og mga panalangin sa priesthood.
-
Mipakigtambag ko sa mga lider sa priesthood.
-
Gitratar nako ang akong mga higala sa Simbahan isip pamilya.
-
Miadto ko sa templo ug na-endowed. Milungtad og taas nga panahon alang kanako sa padesisyon niana; nahadlok ko nga kini mas makapalisud sa akong relasyon uban ni Al. Sa katapusan, akong nasayran nga kini mao ang pinaka maayo nga desisyon alang kanako. Si Al misuporta niini, kini nakapalipay kanako, ug human sa pagdawat niini, wala nako maglagot ni Al nga siya ang rason nga dili ko makaadto sa templo. Kon moadto ko sa templo, kanunay nakong ibutang ang pangalan ni Al sa prayer roll.
Sa kinatibuk-an, nagpadayon ko nga nagpuyo isip matinud-anong miyembro sa Simbahan. Nangita ko og gagmay nga mga paagi nga makipagbahin sa ebanghelyo ngadto kaniya, bisan tuod sa kasagaran dili siya ganahang maminaw. Apan akong nakat-unan nga ang Espiritu Santo modasig kanako sa pagsulti sa eksakto nga mga butang ug sa saktong paagi ug sa saktong panahon sa pagpakigbahin niini. Sa wala madugay akong nasayran nga tungod sa akong pagkamaunungon ug pasalig kaniya, si Al natandog sa Espiritu sa matag karon ug unya.
Gani siya misugot sa pagpaminaw sa mga leksyon sa misyonaryo sa pipila ka mga okasyon. Apan sa matag higayon, masagmuyo ko tungod kay mobalik siya kanunay sa iyang naandan nga kinabuhi. Bisan pa niining makapawala sa kadasig nga mga higayon, ang Langitnong Amahan nagbantay kanako ug mihatag kanako og laing mga panalangin. Sa tibuok panahon nasayud ko nga adunay usa ka butang nga anaa ni Al nga angay paabuton.
Hinay-hinay nausab si Al. Dili na siya mamalikas. Dili na siya mag-inom. Gitratar ko niya og maayo kaysa kaniadto. Nagsugod na siya og simba.
Ug nagpadayon ko sa pag-ampo.
Ang talagsaong tubag sa akong ikatulo nga dili makalimtan nga pag-ampo miabut niadtong Abril 2005. Naghunahuna ko kon dawaton ba gayud ni Al ang ebanghelyo ni Jesukristo—hapit nawad-an na ko sa paglaum. Mihangyo ko sa Langitnong Amahan alang sa Iyang panabang. Siguro mao na kini ang husto nga panahon tungod kay niadtong Hulyo 9, si Al gibunyagan.
Bisan tuod lisud nga makaabut niini nga kahimtang, mapasalamaton ko nga nakasaksi sa makapahingangha nga gahum sa Dios sa pag-usab sa kasingkasing nga dili motuo ngadto sa motuo. Nasayud ko nga Siya nakadungog ug nagtubag sa daghan nakong mga pag-ampo sulod sa 35 ka tuig. Tungod sa Iyang mga tubag, karon nagpuyo nako uban sa usa ka tawo nga nausab, kinsa nahigugma sa atong Langitnong Amahan sama kanako. Ug kami mas nagkahinigugmaay sa usag usa kaysa sa una.
Nasayud ko nga adunay uban pa sa Simbahan kinsa nagpaabut, naglaum, ug nag-ampo alang sa usa ka hinigugma nga mamiyembro sa Simbahan. Gusto kong moawhag niining mga kaigsoonan sa pagdawat sa imbitasyon sa Manluluwas nga “duol ngari kanako” (Alma 5:34) alang sa ilang kaugalingon ug dili lang para sa ilang mga hinigugma. Nasayud ko gikan sa kasinatian nga ang pagbuhat sa ingon makapalig-on nga dili mahimo sa uban. Ang magpabiling suod sa Langitnong Amahan, pagsunod sa Iyang mga sugo, ug pagtagamtam sa mga panalangin karon makahatag og kalipay ug motugot Kaniya nga moimpluwensya kanato.
Mopamatuod ko nga ang Dios makadungog sa atong mga pag-ampo. Ang pagpaabut sa Ginoo ug pagdawat sa Iyang panahon nga may hugot nga pagtuod dili sa kanunay sayon, apan nasayud ko nga ang Iyang panahon sa kanunay eksakto.
Ang Istorya sa Bana
Sulod sa 35 ka tuig daghang mga tawo ang naghisgut sa ebanghelyo ngari kanako. Ang akong asawa dili gayud palabyon ang panahon nga dili mohisgut niini, ug siya maalamong magbilin og Basahon ni Mormon ug Ensign nga magasin nga kanunay makita. Siyempre, dili gyud nako kini kuhaon. Kadaghan na niyang gidapit ang mga misyonaryo; duha o tulo ka parisan na gani nagtudlo kanako sa mga leksyon sa misyonaryo.
Unsa man diay ang nakapugong kanako sa pagpabunyag?
Sa kanunay ako adunay pagpangatarungan. Dugay ko nga mahuman sa trabaho. Wala ko maghunahuna nga ako adunay panahon alang sa ebanghelyo. Busy kaayo ko aron makakwarta. Busa giingnan nako si Eva, “Inig abut sa panahon nga wala na kaayo koy buluhaton ug adunay daghang oras, mobasa ko sa Basahon ni Mormon.”
Apan wala gyud nako buhata. Hinoon, dili man kaayo ko himasa, ug kon ako magbasa og Biblia, dili kaayo ko makasabut. Busa kutob ra gyud ko didto.
Adunay usa pa ka butang nga nagpugong kanako nga mamiyembro sa Simbahan, usa ka butang nga mas seryoso: ang makasasala nga kinabuhi nga akong gisubay. Si Haring Benjamin nagtudlo kanato nga “ang kinaiyanhon nga tawo mao ang usa ka kaaway sa Dios … gawas kon siya motugyan ngadto sa mga pagdani sa Balaang Espiritu” (Mosiah 3:19). Wala ko mosunod—nagduhaduha pa ko. Ang Manluluwas miingon, “Ang dili dapig kanako, batok kanako” (Mateo 12:30). Nakaamgo ko karon nga tungod sa paagi sa akong pagpakabuhi, batok ako Kaniya. Kinahanglan ko nga mausab.
Nagpuyo ko nga duol sa ebanghelyo apan wala gayud mopuyo niini, apan sa pagpadayon sa panahon, misugod ko sa pagbati sa Espiritu. Mihunong ko sa pag-party ug pakig-inom. Sa dihang mihimo ko niana nga kausaban, ang Espiritu misugod nga mas kanunayng modasig kanako. Wala pa gihapon ko nahimutang kon asa gyud ko angay—ang akong pinulongan dili maayo ug usbon pa nako ang akong bati nga mga kinaiya—apan hinayhinay kong nausab.
Dayon usa ka adlaw nakadawat ko og package. Gikan kini sa usa sa akong anak nga babaye, si Linda. Kini adunay Basahon ni Mormon ug Biblia nga daghan kaayo og mga marka. Nagsulat usab siya nako nga nagpahayag kon unsa ko niya kahigugma ug gusto niya nga masayran nako unsa ang iyang nahibaloan.
Siya misulat, “Ang bugtong paagi nga masayran kon ang ebanghelyo ni Jesukristo tinuod mao ang pangpangutana sa kinasingkasing ug uban sa hugot nga katuyoan.”
Dayon mipakigbahin og sunod-sunod nga mga kasulatan si Linda nga nakapahimo kanako sa pag-ampo ug pagtuon sa kasulatan.
“Ang bugtong paagi nga akong nailhan ang Manluluwas ug ang Langitnong Amahan,” siya misulat, “mao ang pinaagi sa pag-ampo ug pagbasa Kanila diha sa kasulatan.”
Dayon iyang gihulagway ang kamahinungdanon sa pagkamapainubsanon ug sa unsang paagi, kon wala ang Dios sa iyang kinabuhi, siya dili makaangkon og kalinaw. Sa katapusan, siya misulat, “Ayaw na paglangay-langay. Napanalanginan na ka og daghan. Karon mao ang panahon sa pagpasalamat sa Langitnong Amahan. Kini mao ang bugtong paagi sa tinuod nga kalipay.”
Wala na koy ikapangatarungan. Wala na kaayo koy buhaton, ug adunay daghang oras. Busa nagsugod ko sa pagbasa ug pagtuon sa mga kasalutan nga iyang gilatid alang kanako, nga nakapadasig kanako sa pagbasa sa tibuok Basahon ni Mormon. Apan aduna pay daghang mga butang nga wala pa nako masabti.
Niining panahona mitambong ko sa sakrament miting tungod kay ang akong asawa miingon nga maayo unta kon ako mosimba ug motapad kaniya. Misugyot usab siya nga akong basahon ang Doktrina ug mga Pakigsaad. Gibuhat ko kini, ug mas nakasabut ko niini. Dayon, uban sa tabang sa akong asawa, akong gibasa ang Basahon ni Mormon ug misinati nga natinuod ang mga kasulatan sa akong kinabuhi. Pinaagi sa daghang mga pag-ampo, ang Espiritu midasig kanako.
Unsa ang nakahimong kalainan niini ngari kanako? Ang Espiritu Santo ug ang kahibalo sa mga kasulatan. Kining duha ang naghatag kanako og kaisug nga usabon ang akong kinabuhi ug mangayo og pasaylo sa Dios alang sa akong mga sala, nga mao ang nakapugong kanako sa pagpamiyembro sa Simbahan niadtong mga panahona.
Ang pagkumpisal sa akong mga sala lisud kaayo. Kini nakapasakit kanako nga naghigda lang ko sulod sa tulo ka adlaw tungod sa kaguol. Apan pinaagi sa Pag-ula ni Jesukristo, napasaylo ko. Dayon ang Langitnong Amahan mihatag kanako og kalig-on nga mobarug ug magpadayon sa akong bag-o nga kinabuhi.
Ang akong anak nga lalaki nga si Kevin mibunyag kanako niadtong Hulyo 9, 2005. Mitambong ang usa sa mga misyonaryo nga nagtudlo sa akong asawa mga dekada na ang milabay. Duha ka tuig ang milabay gidala nako ang akong pamilya sa Templo sa San Diego California aron ma-sealed sa karon ug sa kahangturan.
Ang milabayng pito ka tuig mao ang pinakamalipayong mga tuig sa akong kinabuhi. Sa katapusan makabuhat nako isip patriyarka ug espiritwal nga lider sa among pamilya ug mopakigbahin sa ebanghelyo uban sa akong asawa, among mga anak, ug sa among siyam ka apo. Ang panaghiusa sa pamilya nakapalig-on sa tanan sa espirituhanong paagi. Ang akong umagad nga lalaki nagpamiyembro sa Simbahan, ug upat sa among apo nakaserbisyo o nagserbisyo og misyon. Ang akong bag-ong kinabuhi sa Simbahan usa ka milagro. Wala koy ideya sa dakong kalipay ug kalamboan nga nahatag niini kanako.
Mapasalamaton kaayo ko alang niining ikaduhang oportunidad. Mapasalamaton ko nga akong nahulipan kadtong nausik nga mga panahon pinaagi sa paghimo sa buhat sa Dios.
Samtang nagbasa ko sa sulat sa akong anak nga babaye, nakaamgo ko nga wala na koy ikapangatarungan.
Talagsaong kalipay ang among nabati tungod kay kami nahiusa sa ebenghelyo.
Mga paghulagway sa litrato pinaagi ni Craig Dimond