Ang Importansya sa mga Panalangin sa Priesthood
Gikan sa Abril 1987 nga pakigpulong sa kinatibuk-ang komperensya.
Ang usa ka panalangin sa priesthood mao ang pagtugyan sa gahum kabahin sa espirituhanong mga butang.
Sa usa ka panalangin sa priesthood ang usa ka sulugoon sa Ginoo mogamit sa iyang priesthood, sigon sa pag-aghat sa Espiritu Santo, sa pagsangpit sa mga gahum sa langit alang sa kaayohan sa tawo nga gipanalanginan. Ang mao nga mga panalangin itugyan pinaagi sa mga nanaghupot sa Melchizedek Priesthood, kinsa adunay mga yawe sa tanan nga espirituhanon nga mga panalangin sa Simbahan (tan-awa sa D&P 107:18, 67).
Mga Ehemplo sa mga Panalangin sa Priesthood
Adunay daghang matang sa mga panalangin sa priesthood. Samtang mohatag ko og lain-laing mga sanglitanan, palihug hinumdumi nga ang mga panalangin sa priesthood anaa alang sa tanan nga nanginahanglan niini, apan ihatag lamang kini kon gihangyo.
Ang mga panalangin sa pag-ayo sa masakiton paga-unhan sa pagdihog sa lana, sigon sa gisulti sa mga kasulatan (tan-awa sa Santiago 5:14–15; Marcos 6:13; D&P 24:13–14; 42:43–48; 66:9). Ang patriarchal nga mga panalangin itugyan pinaagi sa gi-orden nga patriarch.
Ang mga tawo nga nagtinguha og giya sa usa ka importante nga desisyon makadawat og panalangin sa priesthood. Ang mga tawo nga nagkinahanglan og dugang pa nga espirituhanong gahum sa pagbuntog sa usa ka personal nga hagit makadawat og usa ka panalangin. Ang mga panalangin sa priesthood sagad nga hangyoon gikan sa mga amahan sa dili pa molakaw ang mga anak alang sa lain-laing mga katuyoan, sama sa pag-eskwela, pag-alagad sa militar, og sa layo nga biyahe.
Ang mga panalangin nga ihatag sa mga sitwasyon nga sama sa akong gihisgutan usahay gitawag og mga panalangin sa paghupay o pagtambag. Sa kasagaran ang mga amahan o mga bana o ubang mga elder sa pamilya ang mohatag niini. Mahimo nga irekord nila kini ug tipigan ang mga rekord sa pamilya alang sa personal nga espirituhanong giya sa mga tawo nga gipanalanginan.
Ang mga panalangin sa priesthood ihatag usab agi og sumpay sa pagkadawat sa priesthood o sa pag-set apart sa usa ka tawo alang sa calling sa Simbahan. Kini tingali ang pinakasagad nga mga okasyon alang sa mga pagpanalangin sa priesthood.
Daghan kanato ang mihangyo og panalangin sa priesthood dihang nagsugod kita sa usa ka bag-o nga responsibilidad sa atong panarbaho. Nakadawat ako sa sama nga panalangin daghang tuig na ang milabay ug mibati sa diha-diha dayon nga kahupayan ug malungtaron nga giya.
Ang Kamahinungdanon sa mga Panalangin sa Priesthood
Unsa kamahinungdanon ang panalangin sa priesthood? Hunahunaa ang usa ka batan-ong lalaki nga nangandam nga mobiya sa panimalay aron mangita sa iyang swerte dinhi sa kalibutan. Kon ang iyang amahan mohatag kaniya og usa ka kompas, tingali gamiton niya kining kalibutanon nga himan sa pagtabang kaniya nga makasubay sa eksaktong dalan. Kon hatagan siya og kwarta sa iyang amahan, mahimo niya kining gamiton aron maangkon niya ang kalibutanong mga butang. Ang panalangin sa priesthood usa ka pagtugyan sa gahum aron maangkon ang espirituhanong mga butang. Bisan og kini dili mahikap o matimbang, dako ang kamahinungdanon niini sa pagtabang kanato nga makabuntog sa mga babag diha sa dalan padulong sa kinabuhing dayon.
Sagrado kaayo kini nga responsibilidad alang sa usa ka tighupot sa Melchizedek Priesthood nga mamulong alang sa Ginoo sa paghatag og panalangin sa priesthood. Sama sa gisulti kanato sa Ginoo sa modernong pagpadayag, “Ang akong pulong … matuman, bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38). Kon ang usa ka sulugoon mamulong nga nadasig pinaagi sa Espiritu Santo, ang iyang mga pulong “mahimo nga kabubut-on sa Ginoo, … hunahuna sa Ginoo, … pulong sa Ginoo, … [ug] tingog sa Ginoo” (D&P 68:4).
Apan kon ang mga pulong sa panalangin nagrepresentar lamang sa kaugalingong mga gusto ug mga opinyon sa naghupot sa priesthood, dili dinasig sa Espiritu Santo, niana ang panalangin mag-agad kon nagrepresentar ba kini sa kabubut-on sa Ginoo.
Ang takus nga mga tighupot sa Melchizedek Priesthood makahatag og mga panalangin sa ilang kaliwatan. Daghan ang ingon niana nga mga panalangin nga narekord sa mga kasulatan, lakip sa kang Adan (tan-awa sa D&P 107:53–57), kang Isaac (tan-awa sa Genesis 27:28–29, 39–40; 28:3–4; Mga Hebreohanon 11:20), kang Jacob (tan-awa sa Genesis 48:9–22; 49; Mga Hebreohanon 11:21), ug kang Lehi (tan-awa sa 2 Nephi 1:28–32; 4).
Sa modernong pagpadayag, ang mga ginikanan nga mga miyembro sa Simbahan gisugo sa pagdala sa ilang mga anak “ngadto sa simbahan,” diin ang mga elder “mopandong sa ilang mga kamot diha kanila sa ngalan ni Jesukristo, ug mopanalangin kanila pinaagi sa iyang ngalan” (D&P 20:70). Mao kini ang hinungdan nganong ang mga ginikanan modala sa ilang mga masuso ngadto sa miting sa sakrament, diin ang elder—sa kasagaran ang amahan—mohatag kanila og ngalan ug panalangin.
Ang mga panalangin sa priesthood dili kay kutob lamang sa gilitok nga mga panalangin samtang gipandong ang mga kamot sa ulo sa usa ka tawo. Ang mga panalangin usahay ipamulong ngadto sa pundok sa mga katawhan. Si propeta Moises mipanalangin sa tanang anak sa Israel sa wala pa siya mamatay (tan-awa sa Deuteronomio 33:1). Si Propeta Joseph Smith “militok og panalangin ngadto sa mga sister” nga nagtrabaho sa Templo sa Kirtland. Gipanalanginan usab niya “ang kongregasyon.”1
Ang mga panalangin sa priesthood malitok usab alang sa mga lugar. Ang mga nasud panalanginan ug ipahinungod alang sa pagsangyaw sa ebanghelyo. Ang mga templo ug mga balay alampoanan ipahinungod sa Ginoo pinaagi sa panalangin sa priesthood. Ang ubang mga building mahimong ipahinungod kon gamiton kini sa serbisyo alang sa Ginoo. “Ang mga miyembro sa Simbahan mahimong mopahinungod sa ilang mga panimalay isip sagradong mga edipisyo diin ang Balaang Espiritu makapuyo.”2 Ang mga misyonaryo ug ubang mga naghupot sa priesthood makabilin og panalangin sa priesthood diha sa mga panimalay nga midawat kanila (tan-awa sa Alma 10:7–11; D&P 75:19). Kamo batan-ong mga lalaki, sa dili madugay mahimong hangyoon kamo sa paghatag og ingon niana nga panalangin. Nanghinaut ko nga inyong andamon ang inyong kaugalingon sa espirituhanong paagi.
Mga kasinatian uban sa mga Panalangin sa Priesthood
Akong hisgutan ang ubang mga ehemplo sa mga panalangin sa priesthood.
Mga usa ka gatus ka tuig na ang milabay, si Sarah Young Vance nahimong usa ka kwalipikado nga midwife. Sa wala pa niya sugdi ang pagserbisyo sa mga kababayen-an sa Arizona, usa ka lider sa priesthood mipanalangin kaniya nga siya “mobuhat lamang kanunay sa unsay husto ug unsay pinakamaayo alang sa kaayohan sa iyang mga pasyente.” Kapin sa 45 ka tuig, si Sarah nakapaanak sa gibana-bana nga 1,500 ka mga masuso nga walay bisan usa ka inahan o anak nga namatay. “Sa matag higayon nga makasugat ko og lisud nga problema,” iyang gihinumduman, “kanunay nga daw adunay moaghat kanako ug niana mahibalo ko kon unsay husto nga buhaton.”3
Niadtong 1864, si Joseph A. Young gitawag alang sa usa ka espesyal nga misyon sa atiman og buluhaton sa Simbahan didto sa Sidlakan. Ang iyang papa, si Presidente Brigham Young, mipanalangin kaniya nga siya makaadto og makapauli nga luwas. Sa iya na nga pagpauli, naapil siya sa usa ka grabe nga disgrasya sa train. “Ang tibuok train naguba,” mireport siya, “lakip sa dapit nga may usa ka lingkuranan ra ang distansya gikan sa akoa, [apan] nakalingkawas ko nga walay tatsa.”4
Kon maghisgot ko og mga panalangin sa priesthood, daghan kaayo ko’g mga panumduman: Nahinumduman nako ang akong mga anak nga nangayo og mga panalangin aron matabangan sila taliwala sa pinaka-makaluya nga mga kasinatian sa ilang kinabuhi. Nalipay ko samtang akong gihinumduman ang dinasig nga mga saad ug ang nalig-on nga pagtuo nga nahimo sa dihang nangatuman kini. Akong gibati ang kamapasigarbuhon sa hugot nga pagtuo sa usa ka bag-ong henerasyon kon mahunahuna nako ang usa ka anak nga lalaki, nabalaka mahitungod sa pang-propesyonal nga eksamin ug dili matabangan sa iyang amahan nga tua sa layo, nangayo og panalangin sa priesthood gikan sa pinakasuod nga priesthood sa iyang pamilya, nga bana sa iyang igsoong babaye. Nahinumdom ko sa usa ka naglibug nga batan-ong kinabig sa Simbahan nga nagtinguha og panalangin aron matabangan siyang mausab ang mismong makadaot nga sumbanan sa iyang kinabuhi. Nadawat niya ang panalangin nga hilabihan ka talagsaon nga ako natingala dihang nadungog nako ang mga pulong nga akong nalitok.
Ayaw pagpanuko sa pagpangayo og panalangin sa priesthood kon ikaw nanginahanglan og espirituhanong gahum.
Paghulagway pinaagi ni Keith Larson