Pagpakita sa Atong Pagkadisipulo pinaagi sa Gugma ug Serbisyo

Tun-i kini nga materyal sa mainampuon nga paagi ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.

Hugot nga Pagtuo, Pamilya, Kahupayan

Sa Iyang tibuok mortal nga kinabuhi, si Jesukristo mipakita sa Iyang gugma alang sa uban pinaagi sa pagpangalagad kanila. Siya miingon “Ang tanang tawo makaila nga kamo mga tinun-an ko pinaagi niini, kon kamo maghigugmaay ang usa sa usa” (Juan 13:35). Siya ang panig-ingnan ug buot nga kita “motabang niadto nga nagkinahanglan sa [atong] panabang” (Mosiah 4:16). Ang Manluluwas mitawag sa Iyang mga disipulo nga motabang Kaniya sa Iyang pangalagad, naghatag kanila og oportunidad sa pagserbisyo sa uban ug mas mahisama Kaniya.¹

Ang atong pagserbisyo isip mga visiting teacher mahimong mahisama sa pagpangalagad sa atong Manluluwas kon kita mopakita sa atong gugma niadtong atong gibisitahan pinaagi sa pagbuhat sa mosunod:²

Paghinumdom sa ilang mga ngalan ug sa mga pangalan sa sakop sa ilang pamilya ug makig-ila-ila kanila.
Paghigugma kanila nga dili maghusga.
Pag-amuma kanila ug paglig-on sa ilang pagtuo “tagsa-tagsa,” sama sa gibuhat sa Manluluwas (3 Nephi 11:15).
Pakighigala kanila sa tinuoray ug pagbisita kanila sa ilang mga panimalay ug sa bisan asa nga lugar.
Pag-atiman sa matag sister. Paghinumdom sa mga adlaw nga natawhan, gradwasyon, kasal, bunyag, o ubang mga okasyon nga mahinungdanon kaniya.
Pagtabang sa bag-o ug dili kaayo aktibo nga mga miyembro.
Pagtabang niadtong nag-inusara o niadtong nagkinahanglan sa paghupay.

Gikan sa mga Kasulatan

3 Nephi 11; Moroni 6:4; Doktrina ug mga Pakigsaad 20:47

Gikan sa Atong Kasaysayan

“Ang Bag-ong Tugon naglakip sa mga asoy sa mga babaye, ginganlan ug sa wala nganli, kinsa migamit sa hugot nga pagtuo kang Jesukristo. … Kini nga mga babaye nahimong ehemplo nga mga disipulo. … [Sila] mibiyahe kauban ni Jesus ug sa Iyang Napulog Duha ka mga Apostoles. Gihatag nila ang ilang mga kabtangan aron sa pagtabang sa Iyang pangalagad. Human sa Iyang kamatayon ug Pagkabanhaw, ang mga babaye nagpadayon sa pagkamatinud-anon nga mga disipulo.³

Si Pablo misulat kabahin sa usa ka babaye nga ginganlan og Febe, kinsa “usa ka alagad sa iglesia” (Mga Taga-Roma 16:1). Siya mihangyo sa mga tawo nga “tabangan siya sa bisan unsa nga iyang kinahanglanon gikan kaninyo: kay daghan ang gitabangan niya” (Mga Taga-Roma 16:2). “Ang matang sa serbisyo nga gihimo ni Febe ug sa ubang babaye nga bantugan diha sa Bag-ong Tugon nagpadayon karon uban sa mga sakop sa mga lider sa Relief Society—mga lider, mga visiting teacher, mga inahan, ug sa uban—kinsa naglihok isip mga tigtabang sa kadaghanan.”⁴