Pagdala sa Primary ngadto sa Panimalay

Ako Mopili sa Matarung pinaagi sa Pagsunod sa mga Baruganan sa Ebanghelyo

Inyong magamit kini nga leksyon ug kalihokan aron makat-on og dugang kabahin sa tema sa Primary karong bulana.

Imo bang ma-imagine nga moadto og usa ka misyon ug wala masayud kon kanus-a makapauli sa imong pamilya? Unsay imong bation? Unsay imong buhaton sa pagpangandam?

Ang upat ka anak ni Haring Mosiah—sila si Ammon, Aaron, Omner, ug Himni—ug ang ilang higala nga si Alma miadto og misyon nga milungtad og 14 ka tuig. Ang matag anak ni Mosiah mamahimo unta nga hari sa kaugalingon nilang nasud, apan ilang gisunod ang ilang mga kasingkasing. Sila ug si Alma nakabig ngadto sa ebanghelyo ni Jesukristo, ug gusto silang mopakigbahin sa ebanghelyo ngadto sa mga Lamanites, nga ilang mga kaaway.

Ang batan-ong mga lalaki nahibalo nga dili nila matuman ang ilang misyon kon wala ang gahum sa Dios. Ang Alma 17:2–3 nagpasabut kon giunsa nila sa pag-angkon niini nga gahum: “Sila misiksik sa mga kasulatan sa kakugi, nga sila unta masayud sa pulong sa Dios. … Naghatag ngadto sa ilang kaugalingon ngadto sa tuman nga pag-ampo, ug pagpuasa; busa sila adunay espiritu sa pagpanagna, ug espiritu sa pagpadayag, ug kon sila nagtudlo, sila nagtudlo uban sa gahum ug pagtugot sa Dios.”

Ang pagpuasa ug pag-ampo nakatabang niining batan-ong mga lalaki nga makadawat og mga panalangin gikan sa Dios. Sama kang Alma ug sa mga anak ni Mosiah, mahimo ka nga magpuasa ug mag-ampo aron maandam sa pagdawat sa mga panalangin nga giandam sa Langitnong Amahan alang kanimo.

Kanta ug Kasulatan

• “Ang Tawong Maalam ug ang Tawong Walay Kaalam,” Songbook sa mga Bata,132.

• 1 Nephi 3:16

Panahon alang sa CTR: Pag-ampo ug Pagpuasa

Isip usa ka pamilya, hisguti ang importansya sa pag-ampo sa dili pa magpuasa ug sa pagkahuman. Sa sunod higayon nga magpuasa ang pamilya, hisguti ang katuyoan niini. Sugdi ang inyong puasa pinaagi sa pag-ampo ug pagpakigsulti sa Langitnong Amahan kon ngano nga nagpuasa mo.

Ikaw Lang

Pagbutang og de-kolor nga bato sa imong higdaanan isip pahinumdom nga mag-ampo ug mopakigbahin sa Langitnong Amahan kon ngano nga nagpuasa ka. Human sa imong pag-ampo aron sa pagsugod sa puasa, ibutang ang bato sa salog duol sa imong higdaanan. Kon mahuman na ang imong pagpuasa, ang bato maoy pahinumdom aron moluhod ug mag-ampo. Magamit nimo kini nga bato isip pahinumdom sa Dominggo nga tingpuasa sa matag bulan ug kon duna kay himoong espesyal nga puasa sa inyong pamilya, ward, o branch.

Nagkinahanglan ka og:

Usa ka hamis nga bato o gamay nga bato

Pintal o dekolor nga mga pangmarka

brush sa pintal

1. Hugasi ang bato ug paugha kini.

2. Pagbutang og gamayng pintal sa plato nga papel o ginamit na nga papel.

3. Gamita ang brush o mga pangmarka sa pag-decorate sa bato. Sulati kini sa imong ngalan o pag-drawing og laing mga desinyo og mga porma.

4. Paugha gayud ang pintal ug ibutang ang bato sa imong higdaanan.

Sa wala: paghulagway pinaagi ni Paul Mann; sa ubos: paghulagway pinaagi ni Richard Hull © IRI; sa tuo: mga paghulagway pinaagi ni Brian Bean