Pagserbisyo diha sa Simbahan
Ang Leksyon Anaa sa Tigkat-on
Kon kita moila sa dakong potensyal sa matag tigkat-on, kita magsugod sa pagkakita unsa ang nakita sa Dios.
Samtang anaa sa buluhaton sa Simbahan sa Cusco, Peru, ang akong asawa ug ako mitambong sa hiniusa nga klase sa Relief Society ug Melchizedek Priesthood. Ang magtutudlo nianang adlawa mao ang magtutudlo sa adult Gospel Doctrine. Tungod nagkaproblema sa pag-eskedyul atol sa unang duha ka miting, mga 20 ka minutos na lang ang nabalin kaniya aron motudlo sa iyang giandam.
Siya misugod pinaagi sa paghangyo sa tanang mga miyembro kon si kinsa ang nagpasakop sa Simbahan sa miaging duha ka tuig. Lima ka miyembro ang mibarug. Iyang gisulat ang numero 5 sa pisara ug dayon miingon, “Mga kaigsoonan, nindot kaayo nga ania uban kanato kining 5 ka mga miyembro nga bag-ohay lang nagpamiyembro sa Simbahan. Ang problema lang kay atol sa miaging duha ka tuig, kita nagbunyag og 16 ka bag-ong mga kinabig niini nga ward.”
Iya dayong gisulat ang numero 16 tapad sa numero 5 ug uban sa kamatinuuron nangutana, “Karon, mga kaigsoonan, unsa man ang angay natong buhaton?”
Usa ka sister mipataas sa iyang kamot ug miingon, “Kinahanglan nato silang pangitaon ug dalhon sila pagbalik.”
Ang magtutudlo miuyon ug misulat sa pulong nga luwason sa pisara. “Kita adunay 11 ka bag-ong mga miyembro nga dalhon pagbalik,” siya mitubag.
Dayon iyang gibasa ang usa ka kinutlo gikan ni Presidente Thomas S. Monson kabahin sa kaimportante sa pagluwas. Gibasa usab niya sa Bag-ong Tugon kon giunsa sa Manluluwas pagpangita sa nawala nga karnero (tan-awa sa Lucas 15:6). Dayon siya nangutana, “Karon unsaon man nato sa pagpabalik kanila?”
Daghang mipataas sa kamot, ug iyang gitawag matag usa kanila. Ang mga sakop sa klase adunay mga sugyot kon unsaon nila isip ward family o isip indibidwal magtinabangay sa pagtabang sa bag-ong mga kinabig nga mapabalik sa simbahan. Dayon ang magtutudlo nangutana, “Busa kon kamo maglakaw sa dalan ug nakakita og usa ka tawo sa pikas dalan nga inyong nahibaloan nga usa niining bag-o nga kinabig, unsa ang inyong buhaton?” Usa ka miyembro miingon, “Motabok ko ug motimbaya kaniya. Sultian nako siya nga gikinahanglan nato nga siya mobalik ug unsa kita kahinam nga mobalik siya kanato pag-usab.”
Ang uban nga anaa sa klase miuyon ug midugang og piho nga mga sugyot kon unsaon pagtabang niining mga miyembro. Adunay kadasig sa klase, usa ka determinasyon nga buhaton unsa ang angay buhaton aron sa pagtabang niining bag-ong mga miyembro aron mahibalik sa hingpit nga pagkaaktibo.
Ang akong asawa ug ako mibiya sa klase nga nabag-o ang tinguha nga kami mismo motabang og usa ka tawo nga mahibalik sa pagkaaktibo sa Simbahan. Nagtuo ko nga ang tanan mibiya sa klase uban niini nga pagbati. Pagkahuman niining kasinatian, naghuhuna ko: Unsa ang nakapahimo niining mubo nga leksyon nga epektibo kaayo? Nganong ang tanan nga mibiya sa klase nadasig pag-ayo nga hingpit nga mosunod sa ebanghelyo?
Samtang namalandong niining duha ka pangutana, akong natino ang upat ka mga baruganan nga nakapahimo niining klase nga epektibong kasinatian sa pagkat-on ug pagtudlo:
-
Ang pagkabig mao ang tumong.
-
Ang gugma mao ang motibo.
-
Ang doktrina mao ang yawe.
-
Ang Espiritu mao ang magtutudlo.
Ang Pagkabig Mao ang Tumong.
Kaysa maningkamot sa “‘paghatag og impormasyon ngadto sa mga sakop sa klase,” sama sa gipasidaan kanato ni Presidente Monson nga dili angay nga buhaton, kini nga magtutudlo naningkamot “sa pagdasig sa indibidwal sa paghunahuna, sa pagbati, ug dayon sa pagtinguha sa pagsunod sa mga baruganan sa ebanghelyo.”1
Sa minubo, ang tumong niining magtutudlo mao ang pagtabang sa mga sakop sa klase sa pagbuhat og usa ka butang nga dili unta nila mabuhat kon wala pa sila motambong sa klase. Ug kana nga pagbuhat gituyo sa pagtabang sa matag indibidwal nga mahimong tinuod nga disipulo sa Manluluwas.
Ang tumong niining matang sa pagtudlo mao ang pagkabig. Ang pulong nga pagkabig nagpasabut lamang sa pagsunod og bag-ong direksyon, sa pag-angkon og bag-ong kinaiya. Ang pagkakabig—mamahimong tinuod nga disipulo—dili kausa lang mahitabo apan usa ka proseso sa tibuok kinabuhi.2 Niini nga klase ang pagbuhat sa mga sakop sa klase gituyo sa pagtabang dili lang sa mga sakop sa klase apan sa bag-ong mga miyembro usab nga ilang gipaningkamot nga maaktibo. Sa kada higayon nga kita hingpit nga mosunod og usa ka baruganan sa ebanghelyo, adunay laing tawo nga direkta o dili direktang mapanalanginan. Tungod niini, ang pagkat-on ug pagtudlo sa ebanghelyo talagsaon. Kaysa paghatag lamang og kahibalo, ang pagkat-on sa ebanghelyo modala sa personal nga pagkakabig.
Ang Gugma Mao ang Motibo
Samtang nagtambong sa klase sa Peru, nabati nako ang gugma sa magtutudlo alang niadtong anaa sa klase ingon man sa bag-ong mga kinabig nga iyang giawhag sa sakop sa klase nga ipahimong aktibo. Ang gugma ingon og milukop sa kwarto—gikan sa magtutudlo ngadto sa tigkat-on, gikan sa tigkat-on ngadto sa magtutudlo, gikan sa usa ka tigkat-on ngadto sa lain, ug gikan sa mga tigkat-on ngadto sa bag-ong mga kinabig.
Ang gugma nakatabang kanato isip magtutudlo sa pagtudlo sama sa Manluluwas kon Siya anaa sa klasehanan. Sa tinuoray, “ang gugma nag-aghat kanato sa pag-andam ug sa pagtudlo sa lain-lain nga paagi.”3
Kon ang motibo sa magtutudlo mao ang humanon ang tibuok materyal sa leksyon, ang magtutudlo mo-focus sa sulod kaysa panginahanglan sa matag tigkat-on. Ang magtutudlo nga taga-Peru daw mibati nga walay kinahanglang humanon. Gusto lang niya nga dasigon ang mga sakop sa klase sa pagtabang uban sa gugma ngadto sa ilang kaigsoonan. Ang gugma alang sa Ginoo ug gugma alang sa usag usa mao ang nakapadasig. Ang gugma mao ang motibo. Kon gugma mao ang atong motibo, ang Ginoo molig-on kanato sa pagtuman sa Iyang mga katuyoan sa pagtabang sa Iyang mga anak. Siya modasig kanato kon unsa ang atong isulti isip magtutudlo ug unsaon nato sa pagsulti niini.
Ang Doktrina Mao ang Yawe.
Ang magtutudlo sa Peru wala magbasa sa manwal samtang siya nagtudlo. Motuo gyud ko nga iyang gigamit ang manwal o mga pakigpulong sa komperensya sa pagpangandam sa klase, apan sa iyang pagtudlo, siya nagtudlo gikan sa mga kasulatan. Iyang gisaysay pagbalik ang istorya sa nawala nga karnero ug gikutlo ang mosunod nga mga bersikulo: “Ug sa mahibalik na ikaw kanako, lig-una ang imong mga igsoon” (Lucas 22:32). Iyang gipakigbahin ang pagdapit ni Presidente Monson sa tanang mga miyembro sa Simbahan sa pagluwas niadtong nangawala. Ang doktrina nga nakasentro sa iyang leksyon mao ang hugot nga pagtuo ug gugmang putli. Ang mga sakop sa klase nanginahanglan og hugot nga pagtuo sa pagbuhat, ug sila kinahanglang mobuhat tungod sa gugma.
Kon ang mga doktrina sa gipahiuli nga ebanghelyo ni Jesukristo gitudlo uban sa katin-aw ug kombiksyon, ang Ginoo naglig-on sa tigkat-on ug magtutudlo. Mas daghang sakop sa klase ang nagsugyot sa pagtabang sa ilang mga kaigsoonan kinsa dili kaayo aktibo, mas mibati ang tanan nga napaduol sa Manluluwas, kinsa kanunayng nagtabang sa uban atol sa Iyang yutan-on nga pangalagad. Ang doktrina mao ang yawe sa epektibong pagkat-on ug pagtudlo sa ebanghelyo. Kini makapabukas sa mga kasingkasing. Kini makapabukas sa hunahuna. Kini nag-andam sa paagi diin ang Espiritu sa Dios modasig ug mobayaw sa tanan nga anaa.
Ang Espiritu Mao ang Magtutudlo
Ang maayo nga mga magtutudlo sa ebanghelyo miila nga dili gyud sila ang tinuoray nga magtutudlo. Ang ebanghelyo gitudlo ug makat-unan pinaagi sa Espiritu. Kon wala ang Espiritu, ang pagtudlo sa kamatuoran sa ebanghelyo dili mosangpot ngadto sa pagkat-on (tan-awa sa D&P 42:14). Kon ang magtutudlo mas mohatag og dinasig nga pagdapit sa pagbuhat, mas maanaa ang Espiritu atol sa leksyon. Ang magtutudlo nga taga-Peru mihatag og dinasig nga pagdapit. Dayon, samtang ang mga sakop sa klase misugyot, ang Espiritu mabati nga mas anaa ug naglig-on sa tanan.
Ang magtutudlo wala magtinguha nga humanon ang tibuok leksyon. Hinoon, siya naningkamot sa pagpadiskobre sa leksyon nga anaa na sa tigkat-on. Sa pagdapit sa mga sakop sa klase pinaagi sa gahum sa Espiritu, ang magtutudlo mitabang sa mga miyembro sa pagdiskobre sa ilang kaugalingong tinguha sa pagbuhat—sa pagtabang sa ilang mga kaigsoonan uban sa gugma. Samtang ang mga sakop sa klase mipakigbahin sa ilang mga ideya, sila nagdinasigay sa usag usa tungod kay silang tanan nagsalig sa Espiritu.
Kon kita naningkamot sa pagsunod sa ebanghelyo pinaagi sa pagtabang niadtong nagpalibut kanato, ang Ginoo modasig kanato kon unsa ang angayan natong buhaton. Busa kon gusto nato isip mga magtutudlo nga ang Espiritu mas maanaa sa atong klasehanan, yano lang natong imbitaron ang mga sakop sa klase nga mas mosunod sa baruganan sa ebanghelyo. Kon kita mopasalig nga mas mosunod sa baruganan sa ebanghelyo, kita mas mapaduol sa Dios ug ang Dios mas mopaduol kanato (tan-awa sa D&P 88:63).
Ang Potensyal sa Matag Tigkat-on
Kita wala magkat-on ug magtudlo sa ebanghelyo alang lamang sa pagbaton og kahibalo. Kita nagkat-on ug nagtudlo sa ebanghelyo aron makaangkon og kahimayaan. Ang pagkat-on ug pagtudlo sa ebanghelyo dili tumong nga mahimong batid sa mga kamatuoran; kini aron mahimong batid sa pagkadisipulo. Kon kita nagtudlo sa atong kaugalingong mga anak sa panimalay o nagtudlo sa mga miyembro sa ward o branch diha sa klasehanan, kinahanglan natong hinumduman nga ang leksyon nga atong gitudlo anaa na sa tigkat-on. Ang atong tahas isip mga ginikanan o magtutudlo mao ang pagtabang sa mga tigkat-on sa pagdiskobre sa leksyon nga anaa sa ilang mga kasingkasing ug hunahuna.
Kon kita moila sa dakong potensyal sa matag tigkat-on, kita magsugod sa pagkakita unsa ang nakita sa Dios. Dayon atong masulti unsa ang Iyang gusto natong isulti ug mabuhat unsa ang Iyang gusto natong buhaton. Samtang kita nagpadayon niining dalan sa pagkat-on ug pagtudlo, ang pagkakabig mao ang atong tumong, gugma ang atong motibo, doktrina mao ang yawe, ug ang Espiritu mao ang magtutudlo. Samtang kita nagkat-on ug nagtudlo niining paagiha, ang Ginoo mopanalangin sa tigkat-on ug magtutudlo “nga ang tanan unta mahatagan og kaayohan sa tanan” (D&P 88:122).
PAGHULAGWAY SA LITRATO PINAAGI NI Hyun-Gyu Lee; Living Water by Simon Dewey
PAGHULAGWAY SA LITRATO PINAAGI NILA NI Craig Dimond UG Matthew Reier