Mga Minugbo nga Balita sa Kalibutan

Ang Addiction Recovery Program [Programa sa Pagkaayo gikan sa Pagkaadik] Nanawagan og mga Istorya sa Pagkaayo

Isip pagpangandam sa website sa Addiction Recovery Program (ARP) nga giiskedyul nga ipagawas karong tuiga, ang Simbahan nangita og personal nga mga istorya sa naayo sa pagkaadik.

Kadtong ganahan nga mopakigbahin sa ilang mga istorya mag-e-mail sa [e-mail] nga iapil ang mosunod nga mga impormasyon, nga himoong kompidensyal:

• Kompleto nga ngalan, edad, ug gender

• Imong litrato (mas maayo apan dili kinahanglanon)

• Imong koneksyon sa Simbahan/status isip miyembro

• Mubong paghulagway sa imong pagkaadik o ang pagkaadik sa imong minahal

• Usa ka pagpasabut nga andam ka nga mopakigbahin sa imong istorya pinaagi sa video, audio, teksto, o ang tanan

• Ang imong istorya. Naglakip sa mga sangputanan sa imong pagkaadik (palihug ayaw iapil ang dili sakto nga mga detalye, apan hisguti kon sa unsang paagi kini nakaapekto kanimo ug sa nagpalibut kanimo); mubo nga paghulagway sa dihang ikaw nasayud nga nanginahanglan ka og tabang; usa ka pagpasabut kon sa unsang paagi ka naayo pinaagi ni Kristo ug unsa ang imong nasinati sa dihang mibalik ang imong paglaum; ug paghulagway sa imong kinabuhi karon ug sa mga leksyon ug mga panalangin nga imong nasinati pinaagi sa pagpasaylo, paghinulsol, ug pagserbisyo.

Ang mga Miyembro sa Fiji Naghatag og Humanitarian Aid ngadto sa mga Biktima sa Baha

Niadtong Pebrero, tulo ka stake sa Suva, Fiji, nagpahigayon og kalihokan sa pagpangolekta og mga pagkaon, mga gamit sa balay, ug mga suplay sa eskwelahan alang sa mga nabiktima sa baha sa amihanan ug kasadpang Fiji.

Ang Fiji misinati og walay hunong nga kusog nga ulan karong tuiga, maoy hinungdan sa dagkong baha ug mga landslide sa kasadpan ug amihang mga dapit. Ang pagbaha maoy hinungdan sa kamatayon sa pipila ug nagpugos sa liboan nga mobakwit.

Sa dihang nagkagrabe ang baha sa kasadpan ug amihanang mga rehiyon sa Fiji, ang lokal nga mga lider sa Simbahan diha-diha dayon mibukas sa mga meetinghouse isip evacuation center alang niadtong nabahaan.

Si Elder Taniela Wakolo, Area Seventy ug Church’s Fiji Service Center manager, mipasiugda sa kalihokan niadtong Pebrero 6, sa wala madugay human ang lokal nga mga lider sa Simbahan naalarma sa baha. Ang mga miyembro mikolekta ug miklase-klase sa pagkaon, sinina, pangkatulog, gamit sa kusina, ug mga suplay sa eskwelahan; ang mga aytem gipang-apud-apud dayon sa mga nanginahanglan.

Sa pagbasa og dugang kabahin niini ug uban nga mga istorya, bisitaha ang news.lds.org.

Isip pagpangandam sa bag-ong website, kadtong nagdumala sa Addiction Recovery Program (ang miting gipakita dinhi) nangita og personal nga mga istorya sa pagkaayo gikan sa pagkaadik.

Gilitratohan ni Rick Wallace