Gikan sa Natad sa Misyon
Usa ka Saad ug usa ka Pag-ampo
Ang Basahon ni Mormon dunay gahum sa pagtabang ni bisan kinsa nga gustong masayud kon kini tinuod.
Ang nakapatingala kanako mahitungod sa Basahon ni Mormon mao ang dako ug mahangturon nga kausaban nga nahimo niini sa mga katawhan bisan sa wala pa sila mamiyembro sa Simbahan. Isip misyonaryo sa Mexico Cuernavaca Mission, nakita nako mismo kining dako nga kausaban.
Sa didto na ko sa akong misyon sulod sa unom ka bulan, usa ka miyembro sa branch mi-refer sa akong kompanyon ug kanako sa pagtudlo sa usa ka 20 anyos nga babaye ug sa iyang pamilya. Ang batan-ong babaye wala makasabut kon unsay gituohan sa mga Santos sa Ulahing mga Adlaw ug daghan ang gipangutana kanamo. Nahibalo nga ang Basahon ni Mormon makatubag sa mga pangutana kabahin sa kalag, gihatagan namo siya og basahon ug mipakigbahin sa saad nga nahisulat niini mahitungod sa tinuoray nga pag-ampo aron mahibalo kon kini tinuod.
Sulod sa tulo ka semana misimba siya, ug padayon kaming nakigkita kaniya. Wala kami masayud nga nagsugod na diay siya sa paghimo sa importante nga lakang: nag-ampo siya mahitungod sa Basahon ni Mormon. Atol sa usa ka partikular nga leksyon, misulti siya kanamo sa iyang kasinatian. Nagsigi siya og hunahuna mahitungod sa mga leksyon nga among gipakigbahin, ug nagtinguha sa iyang kaugalingon nga mag-ampo. Miluhod siya ug nangutana sa Dios kon ang Basahon ni Mormon tinuod. Ang kalinaw nga iyang gibati human sa pag-ampo nakadasig kaniya nga mobasa pa sa basahon. Samtang nagbasa, gibati niya ang Espiritu nga misanap kaniya.
Sa pag-asoy sa iyang kasinatian, miingon siya kanamo, “Gibati nako nga mas espesyal kaysa akong nabati sukad. Dunay misugod sa pagpuno sa tanang kahaw-ang sa akong kinabuhi nga walay laing makapuno. Nalipay kaayo ko hinungdan nga nakahilak ako. Dili ko makatuo sa akong gibati, apan nahibalo ko nga ang akong Langitnong Amahan mitubag kanako, nga Siya nakaila kanako, ug Siya may igo nga gugma kanako sa pagpaminaw ug pagtubag sa akong pag-ampo.”
Akong gibati ang hilabihang kalipay sa akong kasingkasing dihang giasoy niya ang iyang kasinatian. Nahibalo ko nga ako anaa sa sagradong dapit niana nga okasyon. Ang Espiritu Santo mipamatuod kanako nga ang iyang mga pulong tinuod. Tungod sa iyang pagpamatuod napahinumduman ako sa dakong gugma sa Langitnong Amahan ngari kanato; nahigugma kaayo Siya kanato nga gihatag Niya kanato ang Basahon ni Mormon isip instrumento aron makaila Kaniya ug sa Iyang kamatuoran. Kon motuman kita sa mga baruganan nga anaa sa Basahon ni Mormon, mausab ang atong kinabuhi.
Mahinumduman gihapon nako kon giunsa sa pagtapos kadto nga leksyon. Ang sister nangutana kanamo, “Unsay mahitabo karon nga nahibalo na ko nga ang Basahon ni Mormon tinuod?”
“Magpabunyag ka,” mitubag kami.
Yano ra ang iyang tubag apan nagpakita sa kalig-on ug kayano sa iyang pagpamatuod: “Nan magpabunyag ko.”
Ang Basahon ni Mormon adunay gahum sa pagtabang kanato nga makakaplag sa kalipay ug kalinaw. Kon basahon nato kini, makapalambo kita og lig-ong determinasyon sa sunod sa ebanghelyo ni Jesukristo, sama niini nga sister nga nakahukom nga mosunod sa ehemplo sa Manluluwas ngadto sa mga tubig sa bunyag.
Paghulagway pinaagi ni Kathleen Peterson