Usa ka Hunghong sa Kamabination
“Higugmaa ninyo ang inyong mga kaaway, buhati ninyo’g maayo ang mga nanagdumot kaninyo” (Lucas 6:27).
“Nia karon si Carson,” miingon ang mama ni James, gitudlo ang usa ka lalaki nga naa sa agianan padulong sa kwarto sa Primary.
Mikulismaot si James. Si Carson nagsul-ob og maong ug daan nga T-shirt. Nahibalo si James nga ang iyang mama ug papa dili gayud motugot kaniya nga magsul-ob og bisan unsa nga sama niana sa simbahan, apan dili sab gayud nila palabyon ang uban pang mga butang nga gipanghimo ni Carson.
Sa miaging semana sa eskwelahan, si Carson gipagawas sa klase tungod sa iyang pagtubag-tubag sa magtutudlo. Kanunay niyang bugal-bugalan si James sa iyang sinul-uban ug binuangan siya tungod kay siya ang kinamub-an sa klase.
“Unsa kaha kon iyang singgitan si Sister Win o manguna og pangaway?” Nangutana si James.
“Sigurado kong ok ra ang tanan,” miingon si Mama. “Si Carson wala pa gayud makasimba, ug tingali nakulbaan siya.”
Dihang nagsugod na ang klase, nangutana si Sister Win kon si kinsa ang nagdala sa ilang mga kasulatan. Miisa si James sa iyang kamot dungan sa uban nga diha sa klase, apan si Carson milingo-lingo. Daw naulaw siyang tan-awon, nga nakapatingala ni James. Sa kasagaran mangomedya ra si Carson kon dili niya mahimo ang iyang homework. Apan dihang gihunahuna kini og maayo ni James, nahunahuna usab niya kon unsa kaha ang pagbati kon naa ka sa bag-ong simbahan sa unang higayon.
Gitunol ni Sister Win ang iyang mga kasulatan ngadto kang Carson aron gamiton. Sa dihang si Carson na ang mobasa sa kasulatan, nabalaka si James. Unsa kaha kon iitsa ni Carson ang mga kasulatan ngadto sa salog o mobalibad sa pagbasa?
Apan walay gihimo si Carson bisan asa niining duha ka butang. Gitutukan niya ang mga pulong sa pahina ug ningkusmod. Pagkataud-taod, naamguhan ni James nga si Carson dili pa kaayo maayong mobasa. Wala gayud kini mamatnguni ni James didto sa eskwelahan.
Si James mipaduol kang Carson ug mihunghong, “Sa pagkatinuod.”
Daw nakalitan si Carson, apan gilitok niya ang pulong ug padayon nga mibasa sa bersikulo. Kon maglisud siya sa usa ka pulong, tabangan siya ni James. Pagkahuman niya, si Carson mitan-aw kang James ug miyango og gamay.
Dili sigurado si James kon lahi na ba unya sa eskwelahan pagkahuman niini. Ang alegre mao nga kini wala niya panumbalinga. Maayo ang iyang gibati kay nahibalo siya nga nakatabang siya og usa ka batang lalaki kinsa kanunay nga magbugal-bugal kaniya, ug walay bisan kinsa ang makawagtang niana nga pagbati.
Pamaagi nga Angay
Pwede ka sa among team.
Cartoon pinaagi ni Val Chadwick Bagley
Mga paghulagway pinaagi ni Craig Stapley