Pagsabut sa Atong mga Pakigsaad ngadto sa Dios
Usa ka Kinatibuk-ang PAGPASABUT [Overview] sa Atong Pinaka Importante nga mga Pakigsaad
“Isip mga miyembro sa Ang Simbahan ni Jesukristo sa mga Santos sa Ulahing mga Adlaw,” pasabut ni Presidente Thomas S. Monson, “sagrado nga mga pakigsaad kinahanglang atong tahuron, ug ang pagkamatinud-anon niini maoy paagi alang sa kalipay. Oo, naghisgot ko sa pakigsaad sa bunyag, ang pakigsaad sa priesthood, ug ang pakigsaad sa kaminyoon isip mga ehemplo.”1
Sa Simbahan, ang usa ka ordinansa sagrado, pormal nga gipahigayon sa awtoridad sa priesthood. Ang pipila ka mga ordinansa importante sa atong kaluwasan. Isip kabahin niining “makaluwas nga mga ordinansa,” misulod kita ngadto sa ligdong nga mga pakigsaad uban sa Dios.2
Ang pakigsaad mao ang pakigsaas sa duha ka tawo, ang mga kondisyon nga gihimo sa Dios.3 Kon kita mosulod og pakigsaad uban sa Dios, mosaad kita sa pagtuman niadtong mga kondisyon. Misaad usab siya nato og mga panalangin.
Sa atong pagdawat niining makaluwas nga mga ordinansa ug nagtuman sa mga pakigsaad, ang Pag-ula ni Jesukristo mahimong epektibo sa atong mga kinabuhi, ug makadawat kita sa mas daghang panalangin nga ikahatag sa Dios nato—kinabuhing dayon (tan-awa sa D&P 14:7).
Tungod kay ang pagtuman sa atong mga pakigsaad importante sa atong kalipay karon ug sa pagdawat og kinabuhing dayon, importante nga masabtan unsay atong gisaad sa atong Langitnong Amahan. Ang mosunod mao ang kinatibuk-ang paghulagway sa mga pakigsaad nga atong himoon kalabut sa makaluwas nga mga ordinansa ug mga sugyot asa kamo mas makat-on pa.
Bunyag ug Kumpirmasyon
Bunyag pinaagi sa pagpaunlod diha sa tubig, gipahigayon sa usa ka tawo nga adunay awtoridad, mao ang unang makaluwas nga ordinansa sa ebanghelyo ug gikinahanglan alang sa usa ka indibidwal nga mahimong miyembro sa Ang Simbahan ni Jesukristo sa mga Santos sa Ulahing mga Adlaw. Dili mabulag gikan sa bunyag mao ang kauban niini nga ordinansa sa kumpirmasyon—ang pagpandong sa mga kamot alang sa gasa sa Espiritu Santo.
Sa dihang kita nabunyagan, kita mismo nakigsaad nga atong dalhon ang pangalan ni Jesukristo, sa kanunay mohinumdom Kaniya, ug mosunod sa Iyang mga sugo. Kita nagsaad usab sa “sa pag-alagad kaniya ngadto sa katapusan” (D&P 20:37; tan-awa usab sa Mosiah 18:8–10).
Isip ganti, ang Langitnong Amahan nagsaad nga kon kita maghinulsol sa atong mga sala, kita mapasaylo (tan-awa sa Alma 7:14) ug sa “kanunay makabaton sa Iyang Espiritu uban [kanato]” (D&P 20:77), usa ka saad nga mahimong posible, sa usa ka bahin, pinaagi sa pagdawat sa gasa sa Espiritu Santo.
Ang mga ordinansa sa bunyag ug kumpirmasyon mao ang ganghaan diin ang tanang nagtinguha og kinabuhing dayon kinahanglang mosulod (tan-awa sa Juan 3:3–5). Ang pagtuman sa atong mga pakigsaad sa bunyag makapahimo ug mahinungdanon nga bahin sa paghimo og mga pakigsaad nga may kalabutan sa tanang ubang makaluwas nga mga ordinansa sa dalan sa kinabuhing dayon (tan-awa sa 2 Nephi 31:17–21).
Ang Sakrament
Kadtong nakadawat sa makaluwas nga mga ordinansa sa bunyag ug kumpirmasyon moambit sa sakramento kada semana aron sa pagbag-o niadtong mga pakigsaad. Samtang nag-ambit sa pan ug tubig, atong hinumduman ang sakripisyo sa Manluluwas nga gihimo alang nato. Dugang pa, atong palandungon ang mga pakigsaad nga atong gihimo sa pagdala uban nato sa pangalan ni Jesukristo, sa paghinumdom Kaniya kanunay, ug sa paghupot sa Iyang mga sugo. Ang balos, ang Dios mohatag sa saad nga ang Iyang Espiritu mag-uban nato kanunay (tan-awa sa D&C 20:77, 79).
Ang ordinansa sa sakrament usa ka oportunidad matag semana sa pagbag-o sa sagradong mga pakigsaad nga nagtugot kanato nga mahimong tig-ambit sa maulaong grasya sa Manluluwas nga may samang epekto sa paglimpyo sa espiritwal nga paagi sa bunyag ug kumpirmasyon.
Ang mga lider sa Simbahan nagtudlo usab nga kon kita moambit sa sakrament, wala lamang nato bag-oha ang atong mga pakigsaad sa bunyag apan lakip “ang tanang pakigsaad nga atong gihimo ngadto sa Ginoo.”4
Ang Panumpa ug Pakigsaad sa Priesthood
Ang Langitnong Amahan naghatag sa Iyang panumpa (pasalig) sa paghatag og mga panalangin sa niadtong motuman sa mga pakigsaad nga may kalabutan sa pagdawat sa priesthood.
Kon ang mga tawo magpuyo nga takus sa pag-angkon sa Aaronic ug Melchizedek Priesthood ug “[mopalamabo] sa ilang calling,” ang Dios mosaad nga sila “pagabalaanon pinaagi sa Espiritu ngadto sa pagbag-o sa ilang mga lawas.” Sila mahimo nga mga anak nga anak lalaki ni Moises ug ni Aaron, ug ni Abraham. (Tan-awa sa D&P 84:33–34.)
Ang paghupot sa Melchizedek Priesthood gikinahanglan aron ang mga lalaki makasulod sa templo. Didto, ang mga lalaki ug babaye makadawat sa kahingpitan sa mga panalangin sa priesthood diha sa kaminyoon.
Pinaagi sa pagdawat sa tanang makaluwas nga mga ordinansa sa priesthood, ang tanang tawo makadawat sa mga saad sa “tanan nga iya sa Amahan” (tan-awa sa D&P 84:35–38).
“Dili katoohan nga mga panalangin modagayday gikan niini nga panumpa ug pakigsaad ngadto sa takus nga mga lalaki, mga babaye, ug mga bata sa tibuok kalibutan,” mitudlo si Elder Russell M. Nelson sa Korum sa Napulog Duha ka mga Apostoles.5
Ang Endowment
Ang endowment sa templo usa ka gasa nga naghatag og panglantaw ug gahum.
Atol sa endowment diha sa templo kita makadawat og mga instruksyon ug mohimo og mga pakigsaad nga may kalabutan sa atong mahangturong kahimayaan. Kauban sa endowment mao ang mga ordinansa sa paghugas ug pagdihog ug pagsul-ob sa temple garment isip pahinumdom sa sagradong mga pakigsaad.6 Ang mga ordinansa ug pakigsaad sa templo sagrado kaayo nga dili hisgutan ang detalye niini gawas sa templo. Tungod niiini, si Presidente Boyd K. Packer, Presidente sa Korum sa Napulog Duha ka mga Apostoles, mitambag, “Mahinungdanon nga ikaw maminaw pag-ayo samtang kini nga mga ordinansa gipahigayon ug imong hinumduman ang mga panalangin nga gisaad ug ang mga kondisyon aron kini matinuod.”7
Si Elder Jeffrey R. Holland sa Korum sa Napulog Duha ka mga Apostoles nagtudlo nga ang yawe sa pagdawat sa balaanong gahum sa pagbuntog sa oposisyon ug sa pagpalambo sa Simbahan “mao ang pakigsaad nga atong gihimo sa templo—ang atong saad sa pagsunod ug pagsakripisyo, sa pagpahinungod ngadto sa Amahan, ug sa Iyang saad sa paghatag kanato sa ‘usa ka talagsaon nga endowment.’”8
Makakat-on pa kamo og dugang kabahin sa mga baruganan nga anaa sa mga pakigsaad nga atong gihimo sa endowment pinaagi sa pagtuon sa mosunod:
-
“Pagkamasulundon,” Mga Baruganan sa Ebanghelyo (2009), 248–255.
-
M. Russell Ballard, “The Law of Sacrifice,” Liahona, Mar. 2002, 10.
-
Kabahin sa “balaod [sa] ebanghelyo” (D&P 104:18), tan-awa sa Doktrina ug mga Pakigsaad 42.
-
“Ang Balaod sa Kaputli,” Mga Baruganan sa Ebanghelyo (2009), 279–89.
-
D. Todd Christofferson, “Mga Hulagway sa Gipahinungod nga Kinabuhi,” Liahona, Nob. 2010, 16.
Ang Sealing
Ang ordinansa sa templo nga gipasabut nga “kaminyoon sa templo” o “gi-sealed” makamugna og mahangturong relasyon tali sa bana ug asawa nga molungtad lapas sa kamatayon kon silang duha matinud-anon. Ang relasyon sa ginikanan ug anak magpadayon lapas sa mortalidad, nagsumpay sa mga henerasyon sa mahangturong relasyon sa pamilya.
Kon ang indibidwal mosulod ngadto sa pakigsaad sa kaminyoon sa templo, siya nakigsaad uban sa Dios ug uban sa iyang kapikas. Ang magtiayon nagsaad og pagkamatinud-anon sa usag usa ug ngadto sa Dios. Gisaaran sila og kahimayaan ug nga ang ilang relasyon sa pamilya makapadayon hangtud sa kahangturan (tan-awa sa D&P 132:19–20). Ang mga anak nga matawo sa magtiayon nga na-sealed sa templo o mga anak nga na-sealed ngadto sa ilang mga ginikanan adunay katungod nga mahimong kabahin sa mahangturong pamilya.
Sama sa ubang mga ordinansa, ang indibidwal nga pagkamatinud-anon sa atong mga pakigsaad gikinahanglan sa yutan-ong ordinansa nga ma-sealed, o mabalido, sa langit pinaagi sa Balaan nga Espiritu sa Saad.9 Ang mga indibidwal nga motuman sa ilang mga pakigsaad—bisan og ang ilang kapikas wala—dili hikawan sa mga panalangin nga gisaad sa sealing.
Paghimo ug Pagtuman sa Sagradong mga Pakigsaad
Sa atong paghimo niining mahinungdanong mga pakigsaad, kita nahimong umaambit sa bag-o ug mahangturong pakigsaad, “gani ang kahingpitan sa [ebanghelyo ni Jesukristo]” (D&P 66:2). Ang bag-o ug mahangturong pakigsaad mao ang “pinaka resulta sa tanang mga pakigsaad ug obligasyon sa ebanghelyo” nga atong gihimo,10 ug ang resulta nga mga panalangin naglakip sa tanan nga iya sa Amahan, lakip ang kinabuhing dayon.
Samtang kita naningkamot nga mosabut ug motuman sa atong mga pakigsaad, kita kinahanglang mohinumdom nga ang pagtuman sa atong mga pakigsaad dili lang usa ka listahan sa mga butang nga buhaton apan usa ka pasalig nga mamahimong sama sa Manluluwas.
“Ang Katapusang Paghukom dili lang pagtimbang sa pinaka resulta sa mga buhat sa maayo ug dautan—unsa ang atong nahimo,” mitudlo si Elder Dallin H. Oaks sa Korum sa Napulog Duha ka mga Apostoles. “Kini mao ang pag-ila sa katapusang mga epekto sa atong mga buhat ug panghunahuna—nahimong unsa kita. Dili igo alang ni bisan kinsa nga magsunod-sunod lang sa mga panghitabo. Ang mga kasugoan, mga ordinansa, ug mga pakigsaad sa ebanghelyo dili listahan sa mga deposito nga gikinahanglan sa punduhanan sa langit. Ang ebanghelyo ni Jesukristo mao ang plano nga nagpakita kanato kon unsaon nato nga kita mamahimo sa unsa ang gusto alang kanato sa Langitnong Amahan.”11
Sa wala: gilitratohan ni Robert Casey; sa tuo: gilitratohan ni Dan Carter © IRI
Litrato sa mga singsing ni Robert Casey; litrato sa Templo sa San Diego California ni Steve Tregeagle