O Se Atua o Vavega O Le Au Paia Solovakia i Sheffield

Saunia e Elder Erich W. Kopischke

O Le Fitugafulu

Ao tuufaatasia e taitai perisitua, faifeautalai, le aufono a le uarota, ma tagata o le ekalesia i Sheffield, Egelani, a latou taumafaiga e faateleina le tuputupu ae moni, sa faamanuiaina i latou i ala ofoofogia.

I se taimi o se lauga mamana i se faapotopotoga o tagata talitonu, sa fesiligia ai e le perofeta o Mamona se fesili faigofie: “Pe ua taofia ea vavega?” Sa vave ona sosoo mai ma lana tali: “Faauta ou te fai atu ia te outou, E leai” (Moronae 7:29).

Ona faamalamalama mai lea e Mamona le auala o le a faataunuu ai le galuega maoae o le faaolataga i aso e gata ai, mafuta i le mafutaga ma fegalegaleaiga ma le Agaga Paia, o galuega a agelu, o a tatou tatalo, lo tatou faatuatua, atoa ai ma vavega a le Alii (tagai Moronae 7:33–37, 48).

I tusitusiga paia uma o loo faamanatu mai ai e perofeta ia i tatou e faapea e tutusa lava le Atua o ananafi, o le aso, ma le faavavau (tagai 3 Nifae 24:6; MF&F 20:12). Ao tatou saili atu e faataunuu le poloaiga e “o atu … i le lalolagi uma, … ma papatiso atu i le suafa o le Tama, ma le Alo, ma le Agaga Paia” (MF&F 68:8), e taua le suesue ma manatua ia mataupu faavae nei:

E le sui lava le Atua.
O le Atua o se Atua o Vavega.
O le vavega aupito silisili a le Atua o le aumaia lea o le faaolataga e faavavau i Ana fanau.
E faia e le Atua ia vavega e tusa ma lo tatou faatuatua, lea tatou te faaalia i a tatou galuega.
E faataunuu e le Agaga Paia se matafaioi autu i le liuaina.

Naunau e Ositaulaga

Ao auauna atu i le Eria a Europa, sa faamanuiaina au e vaaia le faatinoga o nei mataupu faavae ina ua tupu se vavega i Sheffield, Egelani. I le faaiuga o le 2008, sa mafaufau loloto ai Epikopo Mark Dundon o le Uarota Muamua a Sheffield po o le a se mea e mafai ona ia faia e fesoasoani ai ia tuputupu ae lana uarota. I se aoaoga faaleautaitai, sa fesili ai lana peresitene o le siteki i epikopo, “O le a se mea ua e naunau e ositaulaga ina ia faamanuiaina ai oe i le galuega faafaifeautalai?” Mai aoaoga a ona taitai, sa iloa ai e Epikopo Dundon e faapea o se taitai misiona lelei o le ki lea, e taua se aufono a le uarota o loo galulue, ma o se naunautaiga e faalogo i uunaiga a le Agaga e taua tele.

I le maea ai o le tele o le mafaufau loloto ma tatalo, sa faaaoga ai e Epikopo Dundon ana ki o le perisitua ma mulimuli i uunaiga a le Agaga e faamalolo ona fesoasoani e toalua, o Gregory Nettleship ma Robert McEwen. Ona valaauina lea e epikopo Dundon ia Uso Nettleship e avea ma taitai misiona fou ma Uso McEwen e avea ma taitai misiona fesoasoani. Sa vavalalata tele uso o le auepikopo, o lea sa le faigofie ai lenei suiga mo i latou. Ae sa iloa e Epikopo Dundon e faapea i lenei tulaga patino sa sa’o le faaiuga, ma sa taliaina uma ma le lotomaualalo e fesoasoani e toalua o la valaauga fou.

Sa faia faatasi ma le agaga tatalo e le epikopo ma ana taitai misiona fou ma le aufono a le uarota ni fuafuaga ma faatutu ni sini mo le faatupuina o le uarota. Ao latou faatinoina a latou fuafuaga, sa amata ona latou vaaia se manuia iloga. Sa iloga le faateleina o papatisoga liliu mai, ma sa toatele tagata na toe faatoaagaina i le Lotu. Peitai, sa itiiti lava se mea na iloa e taitai e faapea o lo latou faatuatua ma galuega sa ao ona tauia i auala latou te le mafaufauina e mafai ona tauia ai.

Uunaia e ala i le Alofa

Ia Mati 2011 sa faafesootai ai e se faifeautalai talavou ma lana soa ia tagata i auala o Sheffield. Sa vaaia e Elder Nicholas Pass se alii ma lona toalua o savavali ane ma sa ia maua se lagona malosi e tatau ona ia talanoa atu ia i laua. Sa taufetuli atu Elder Pass ma lana soa i le ulugalii lea. Sa faigata le fesootaiga—o le ulugalii e o mai i Solovakia ma sa le tautatala Faa-Peretania—ae sa fesoasoani se uo sa latou o i le faaliliuga. I le talanoaga i le auala, sa faaaoga ai e faifeautalai ni ata e faailoa atu ai le Uluai Faaaliga ma le savali o le Toefuataiga. Sa talia e le ulugalii se taimi atofaina mo faifeautalai e amata ai ona aoaoina i laua.

Sa amata ona faitauina e Ludovit Kandrac, o le tamā o le aiga le Tusi a Mamona. E lei pine ae tuu lana ulaula. I le faagasologa o aoaoga, sa tatau ai ona faaaoga e faifeautalai ni tagata faaliliu se toatele ma aoao ai foi sina gagana Solovakia e i laua lava ia. I le aso 14 o Me, 2011, sa papatiso ai Ludovit, se tasi o ona afafine, ma isi tagata e toalua o lona aiga.

I lona papatisoga, sa fai ai e Uso Kandrac sana molimau. Na auala mai i se tagata faaliliu, sa ia faamatalaina ai lona aafiaga i le feiloaiga ma faifeautalai. Ina ua ia savali atu ma pasia Elder Pass ma lana soa i le taulaga o Sheffield, sa i ai sona lagona mafanafana i lona fatafata. Sa le ano o ia i le lagona ma faaauau pea ona savali, ae ina ua toe tepa atu i faifeautalai, sa uunaia o ia e ala i le alofa sa la faaalia ao la talanoa atu i tagata. E ui la sa ia manao e talanoa atu ia i laua, ae sa savali pea ia Uso Kandrac. Sa fai si ona tei i se taimi mulimuli ane ina ua faalatalata atu faifeautalai ia te ia.

Faatasi ai ma le isi aiga Solovakia sa auai i le Ekalesia i le tausaga na muamua atu, ua faailogaina ai e nei papatisoga le amataga o se vavega o le liua faaonapo nei i tagata Solovakia i Sheffield, Egelani. Sa o mai nei tagata fou i le lotu i vaiaso uma, ma aumai isi tagata o aiga ma uo. Sa latou tatala atu o latou fale i faifeautalai ma valaaulia isi i o latou nuu e faalogo i le talalelei.

Sa asiasi soo atu Elder Pass ma lana soa, o Elder Joseph McKay i nei aiga. Sa la aoaoina i latou, auauna atu ia i latou, tautuaina i latou, ma faamanuia i latou. O se taimi ofoofogia o le aoao atu, aoao mai, ma le mauaina o meaalofa a le Agaga mo tagata sailiili, tagata liliu mai, faifeautalai, taitai o le siteki ma le uarota, ma faapena foi tagata o le au paia.

“Ia Faatasi ma i Latou ma Faamalosia i Latou”

I le taumafanafana atoa ma le tautoulu o le 2011, sa toatele isi tagata Solovakia na auai i le Ekalesia. O le faateleina o le aofai na faigata ai mo taitai i le lotoifale ona faaauau ona saunia ala o femalagaaiga e o atu ai ma o mai ai mai le falelotu. Mo ni vaiaso sa savavali ai le Au Paia faatuatua o Solovakia i maila e lima (valu km) i le o atu ma le o mai ina ia auai i sauniga o le Aso Sa i se gagana sa le mafai ona latou malamalama ai.

Ia Setema o le 2011 sa toe faatulaga ai le au peresitene o le siteki a Sheffield, lea sa valaauina ai Epikopo Dundon e avea ma peresitene fou o le siteki. I se masina mulimuli ane sa faia ai se faeasaite mo Au Paia uma Faa-Peretania ma Solovakia lea sa i ai tagata faaliliu.

Ao alala ai i le tulaga, sa lagona e Peresitene Dundon le uunaiga e manaomia ona faatu se vaega Solovakia lea o le a pipii atu i le Uarota Muamua a Sheffield ae o le a feiloai i se fale i le nuu o tagata Solovakia. Sa vave ona maua se nofoaga talafeagai e feiloai ai ma mautotogi ai i ni potu. I le aso 11 o Tesema, 2011, o le poloka muamua lava o sauniga sa faia i le fale fou. Sa faamoemoe lava ma le mautinoa ia taitai o le Uarota Muamua a Sheffield o le a auai ni tagata se 50. Ae nai lo lena, e 84 tagata—e aofia ai Solovakia e 63—sa auai.

Ina ua mavae le toe faatulagaga o le siteki a Sheffield, sa valaauina Robert McEwen e avea ma epikopo i le Uarota Muamua a Sheffield. Sa faaauau pea ona auauna atu ia Uso Nettleship e avea ma taitai misiona. I lalo o le taitaiga a epikopo uma e toalua, sa faia ai e le taitai misiona ma le aufono a le uarota se galuega ofoofogia o le taitaiina o le uarota ina “ia faatasi ma faamalosia” le Au Paia Solovakia (MF&F 20:53).

Sa taulimaina e le aufono a le uarota ia faafitauli e pei o le auala e tali atu ai i manaoga o tagata fou o le au paia, le auala e fesoasoani ai ia i latou ia auai atoatoa i gaoioiga a le uarota, le auala e faafailele ai i latou i le talalelei, ma le auala e faatoilalo ai papupuni o le gagana. Sa anapopogi sui o le aufono ma tatalo mo le fesoasoaniga faalelagi ona latou galulue malolosi lea. Sa latou asiasi atu i tagata fou o le au paia ma auai faatasi ma faifeautalai faamisiona i taimi atofaina e aoao ia tagata. Sa latou saunia auala o femalagaaiga. Sa latou okaina punaoa a le Ekalesia i le Faa-Solovakia. Sa latou aveina tagata fou faatoa papatisoina i le malumalu e faatino ia papatisoga mo e ua maliliu.

Sa faatulaga foi e taitai o le uarota se galuega fesoasoani mo le Kerisimasi. Sa foai atu e tagata o le uarota ia tupe ma ao mai meataalo, lavalava, ma isi meaalofa. Sa tufatufa atu ia taga lapopoa o meaalofa o le Kerisimasi sa aofia ai ma meaai mo se ʻaiga o le Kerisimasi i le Afiafi ao Lumanai le Kerisimasi i le Au Paia Solovakia atoa ai ma isi aiga i totonu o tuaoi o le uarota.

Sa itiiti lava se malamalamaaga o tagata ua leva o le ekalesia ma tagata fou i le gagana tautala a le tasi ma le isi, ae sa latou lagonaina uma le mafanafana o le gagana o le alofa faamaoni. O se lagona ofoofogia o le olioli, fiafia, ma le faagaeetia sa fusia ai tagata o le au paia ma tagata sailiili.

I le isi tausaga na sosoo ai sa atiae ai lenei vaega toalaiti ma avea o se iunite mautu o le Ekalesia, faatasi ai ma aiga uma sa papatisoina ma tuufaatasia i le Ekalesia. Sa faauuina tamā i le Perisitua Arona ma le Perisitua Mekisateko, sa faauuina atalii i le Perisitua Arona, sa faavaeina se Peraimeri sa i ai ni tamaiti e silia ma le 20, ma sa faatulagaina ia polokalama a Alii ma Tamaitai Talavou lea sa silia ma le 25 talavou e auai i vaiaso taitasi. Sa saunia e le Alii se faifeautalai faamisiona mai le Ripapilika o Siekisolovakia o le na mafai ona tautala i le gagana ma faaopoopo atu ai le lagolago i le vaega. I le taimi lava lea e tasi, sa auina atu ai e nei aiga ni tagata faasino i lo latou nuu moni.

O Se Atua o Vavega

Aisea na tupu ai lenei mea? Ona e lei taofia e le Atua Ia Lava o se Atua o vavega. Ona sa saili ma le filiga ia faifeautalai faamaoni ia i latou sa saunia e talia le talalelei. Ona sa galulue le peresitene o le siteki ma epikopo i le faatuatua ma mulimuli i le taitaiga a le Agaga Paia. Ona sa faia e se aufono a le uarota le tiutetauave ma galulue i le lotogatasi. Ona sa aoaoina e tagata le gagana o le alofa ma tali atu i valaaulia mai i o latou taitai, ma le mauaina o le faatuatua ma le talitonuga e faamaoni lava le Atua i le mea sa ia fetalai ai: “O Au o se Atua o vavega; ma o le a Ou faaali atu i le lalolagi e tutusa lava au ananafi, i le aso, ma le faavavau” (2 Nifae 27:23).

O le tulaga manuia i Sheffield e le manaomia ona avea ma se mea e faatasi ona tupu. Ua faamanatu mai e lenei mea ia i tatou ia folafolaga na tuuina mai e ala i perofeta ma e mafai ona faamumu ai lo tatou faatuatua ma lo tatou manao ia avea ma ni meafaigaluega i aao o le Atua e ala i le valaauliaina o tagata o siomia i tatou ina ia o mai ia Keriso. A tatou faia lea mea, o le a tatou tuu i tatou lava i se tulaga e mafai ai ona faamanuia i tatou e le Alii i avanoa e aoao atu ai, faatoaaga, ma faafaileleina isi. Ma o le a tatou vaaia faamaoniga o loo faaauau pea ona avea o Ia ma se Atua o vavega.

Agavale: O Elder Nicholas Pass ma Elder Joseph McKay (tamai ata pito i lalo) o loo olioli i se vaitau ofoofogia o le aoaoina o le Au Paia ma tagata sailiili Solovakia—o se vaitau na amataina ina ua faafesootai e faifeautalai ia Ludovit Kandrac (tamai ata pito i luga faatasi ma lona toalua) e latalata i le nofoaga e na o tagata e feoai ai i Fargate i Sheffield.

O taumafaiga faafaifeautalai a Epikopo Mark Dundon (tamai ata i luga), o taitai misiona a le uarota, ma le aufono a le uarota sa tauia i ala latou te lei mafaufauina e mafai ona tupu ina ua auai le toatele o tagata Solovakia i le Ekalesia ma amata ona savavali i se ala e lima maila (8 km), lea sa aofia ai le Darnell Road i le agavale, ia auai ai i sauniga i le Aso Sa.

Taumatau: O loo faafeiloai e Faro Dunka, o le taitai vaega a Solovakia i Sheffield, ia tagata i le sauniga faamanatuga. Sa faatulagaina le vaega i se paranesi ia Mati 2013. Tamai ata pito i luga: Taitai o le Uarota Muamua a Sheffield i le aufono a le uarota Tamai ata pito i lalo: O loo lauga atu se tuafafine i le sauniga faamanatuga.

Ata na pue e Abigail Pegg