O Lē e Valaauina e le Alii, Na te Faaagavaaina

O le tele o tagata o le Ekalesia o le a maua ni avanoa se tele e maua ai se “valaauga”—o se tofiga e auauna atu ai. “Ua faamoemoe mai le Alii ia i tatou taitoatasi ia i ai se valaauga i Lana Ekalesia, ina ia mafai ona faamanuiaina ai isi e ala i a tatou taleni ma faatosinaga,” o le saunoaga lea a Peresitene Ezra Taft Benson (1899–1994).¹

O taitai o le Ekalesia, o i latou foi ua valaauina e auauna atu, e faalagolago i isi tagata o le ekalesia ia talia ma faataunuu valaauga e ofoina atu ia i latou. O valaauga fou taitasi o se avanoa e auauna atu ai ma tuputupu ae, ma e tatau ona faia i le lotomaualalo ma le agaga tatalo. O valaauga e auauna atu i le Ekalesia e tuuina mai e taitai perisitua i le mavae ai ona latou sailia o musumusuga mai le Alii. “Ua valaauina oe e le Atua,” o le faamalamalama mai lea a Peresitene Henry B. Eyring, Fesoasoani Muamua i le Au Peresitene Sili. “E silafia oe e le Alii. Na te silafia lē ua Ia finagalo e auauna atu i tofiga uma i Lana Ekalesia. Na Ia filifilia oe.”²

I o tatou valaauga, e fai i tatou ma sui o le Faaola, ma o le galuega tatou te faia—e tusa lava pe o le a le faatauvaa e foliga mai ai—e i ai lava taunuuga e faavavau. O faatosinaga a se faiaoga tuuto a le Peraimeri, mo se faataitaiga, e mafai ona musuia ai se tamaitiiti e fai se misiona i se aso. Po o se faafeiloaiga fiafia a se faasino nofoa e mafai ona fesoasoani i se tagata o le ekalesia o loo i ai ni faafitauli e lagona le talileleia [o ia] i le lotu.

O le a fesoasoani le Alii ia i tatou i o tatou valaauga, aemaise lava pe a tatou lagonaina le lofituina i tiutetauave. A tatou tatalo i le Tama Faalelagi mo le taitaiga, o le a Ia taitai atu i tatou e ala i musumusuga ma o le a faamanuia i tatou ia lelei la tatou auaunaga. E fesoasoani le Alii ia i latou o e auauna atu ia te Ia ma o le a Ia faaopoopo atu Lona mana i a latou taumafaiga (tagai MF&F 84:88). E pei ona folafola mai e Peresitene Thomas S. Monson, “A tatou i ai i le feau a le Alii, ua tatou agavaa i le fesoasoani a le Alii. Ia manatua o lē e valaauina e le Alii, e faaagavaaina e le Alii.”³

A o tatou mulimuli i le faataitaiga a le Alii o le auauna atu ma faataunuu ma le usiusitai o o tatou valaauga ma tiutetauave i le Ekalesia, o le a faamanuiaina o tatou olaga ma mafai ona avea atili i tatou e faapei o le Atua (tagai Moronae 7:48; MF&F 106:3).

E mafai ona tatou vaai i tusitaulima, tusi lesona, o fautuaga a taitai o le Ekalesia, ma isi punaoa e aoao mai ai o tatou tiutetauave ma fesoasoani e tali a tatou fesili.
Tatou te le sailia ni valaauga, pe tatou te masani foi e tetee ni valaauga lea e oo mai e ala i le pule tatau o le perisitua (tagai Mose 6: 31–32).
A tatou fesoasoani e fai le galuega a le Alii, e mafai ona tatou tatalo ma maua Lana fesoasoani (tagai MF&F 84:88).
O le faataunuuina o o tatou valaauga e aumai ai faamanuiaga ma le olioli (tagai Mataio 25:23).
O valaauga uma lava e tutusa le taua; e manaomia e le Ekalesia ni taitai o le vasega pepe e faapena foi i peresitene o le Aualofa (tagai 1 Korinito 12:14–18). O le auala tatou te auauna atu ai e sili atu le taua nai lo le o fea tatou te auauna atu ai.

Taliina o Fesili

Aisea e i ai faifeau e le totogia a la outou Ekalesia?

Mai lava i le amataga, ua valaauina ai e le Alii Ona soo mai tagata masani e eseese mea e o mai ai. Sa latou auauna atu ona o le alolofa i le Alii ma isi. Mo se faataitaiga, i le Tusi a Mamona, sa filifili e le perofeta o Alema taitai perisitua ma “poloaiina foi i latou … [e] galulue i o latou lava lima mo lo latou lava tausiga. …

“Ma o faitaulaga, ia aua ne’i faalagolago i le nuu mo le tausiga o i latou; ae ia latou maua le alofa tunoa o le Atua mo a latou galuega” (Mosaea 18:24, 26; tagai foi 2 Nifae 26:29–31; Mataupu Faavae o le Faatuatua 1:5).

Ua faapena foi i o tatou aso, o se valaauga e auauna atu tatou te maua ai le avanoa e fesoasoani ai i isi ma ia atiae ma faasoa atu a tatou taleni ma meaalofa faaleagaga. Ua lava ma totoe le totogiina o i tatou mo la tatou auaunaga e ala i faamanuiaga mai le Alii.

Ata na tusia e David Habben