O Se Televise ma se Agaga Siitia

Saunia e Kaci Cronin

O le tusitala e alala i Misisipi, ISA.

O lo’u toalua e matuai logonoa lava ma e matua tuuto lava i le talalelei. Ae peitai, o le tele o tausaga o tauiviga ia malamalama i fonotaga faalevaiaso a le Ekalesia na musu ai o ia e auai i fonotaga ma faasalalauga faaopoopo a le perisitua. E ui sa faauo ma faamalosiau i ai tagata o le matou uarota, ae o lo latou le malamalama i se fesoasoani faatekinolosi sa ia manaomia ina ia mafai ai ona auai i fonotaga, sa masani ai ona lagona e lo’u toalua le tuua toatasi ma le le fiafia.

Sa fou i matou i le uarota, ma sa oo mai le taimi o le konafesi aoao. Sa sauni ma le musuā lo’u toalua e alu i le sauniga aoao a le au perisitua, ma mafaufau po o a faafitauli o le a la fetaiai a o ia taumafai e matamata i le faasalalauga. Sa taunuu atu o ia ma iloa ai e leai se tasi na iloa le faiga e tuu ai faaupuga i luga o le masini tele e fana ai ata i luga o le ie, o lea sa toso atu ai se televise i totonu ma faatulaga i le tulimanu. Ae peitai, sa i ai, se faafitauli laitiiti. O le uaea sa manaomia e sulu i le televise sa faaaoga sese e faatulaga ai le masini e fana ai ata, ma faapea ona leai ai se aoga o le televise. O lo’u toalua, o le ua masani i tulaga faapenei, sa alu atu i le potutusi ma amata ai ona vaavaai solo mo le uaea o le masini e fana ai ata. Ina ua uma ona sue solo i ni isi o atigipusa ma kapeneta, sa ia maua ai se uaea puupuu na fuafuaina mo le masini e fana ai ata.

Talu ai ona sa lata ina amata le faasalalauga, o lea sa tau popole ai tagata uma i le tapeina ma le fetuunaia o se mea. O le uaea sa maua e lo’u toalua sa le au atu i le televise sa i luga o le fata e tulei ai, o lea sa tatau ai ona sii ifo le televise i se laulau e maualalo ane. Sa ia tuleia atu le fata i fafo o le falelotu i totonu o se potu lata ane. Ona amata ai lea ona ia tatalaina le televise ma mafaufau pe mata o le a i ai se tagata e alu atu e fesoasoani ia te ia i le siiina. O le taimi lena, sa ia lagonaina ai le ulu atu o se tagata i le potu. O le epikopo. Sa fiafia le loto o lo’u toalua a o la siiina toalua le televise i luga o le laulau. Sa faaola e lo’u toalua le televise a o toso mai e le epikopo se nofoa ma tuu faasaga atu i le lau o le televise.

Sa faafetai atu i ai lo’u toalua mo lana fesoasoani ma la faatalofa, ma sa liliu le epikopo ma agai atu i le faitotoa. Sa matuai te’i lo’u toalua, ona sa pasia e le epikopo le faitotoa ma agai atu i le mea sa faatutu ai nofoa ma faalagolago i le puipui. Sa ia uu mai se nofoa se tasi ma saofai i talaane o lo’u toalua. Sa saofafai le toalua lenei o le tasi i talaane o le isi i le taimi atoa o le sauniga.

O le taimi nei e auai fiafia lo’u toalua i ana fonotaga. O si faatinoga faigofie o le agalelei a le epikopo na siitia ai le agaga o lou toalua ma faatagaina ai le faafetai e ulu atu i lona loto. E ui o loo alia’e pea lava ni isi o faafitauli, ae ua ia le toe lagonaina le tuua toatasi po o le le taliaina. Ua suia e faavavau le manatu o lo’u toalua e ala i faatinoga musuia a se tasi o leoleo mamoe a Keriso.

Ata na tusia e J. Beth Jepson