Aoao Atu ma le Aoaoina Mai o le Talalelei

Suesue ma le agaga tatalo i mea nei, ma pe a talafeagai ai, ia talanoaina faatasi ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga. Mo nisi faamatalaga, alu i le reliefsociety.lds.org.

Faatuatua, Aiga, Toomaga

O Iesu Keriso sa avea ma se faiaoga sili. Sa ia faia le faataitaiga mo i tatou a o Ia “aoaoina tamaitai i le faapotopotoga toatele ma taitoatasi, i luga o le auala ma i talaane o le matafaga, faapea foi ma totonu o o latou fale. Sa Ia faaali atu le agalelei-alofa ia i latou ma faamalolo i latou ma tagata o o latou aiga.”¹

Sa Ia aoao atu ia Mareta ma Maria ma “valaaulia i laua ia avea ma Ona soo ma tofo i le faaolataga, ‘lea mea lelei’ [Luka 10:42] lea o le a le aveesea lava mai ia i laua.”²

I a tatou tusitusiga paia i aso e gata ai, ua poloaiina ai i tatou e le Alii ia “aoao i le tasi mataupu faavae o le malo” (MF&F 88:77). E uiga i le aoao atu ma le aoaoina mai o aoaoga faavae, na saunoa ai Cheryl A. Esplin, fesoasoani lua i le au peresitene aoao o le Peraimeri, “O le aoao ia malamalama atoatoa i aoaoga faavae o le talalelei o se faagasologa o le olaga atoa ma e oo mai i ‘lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o’ (2 Nifae 28:30).”³

A o tatou aoao, suesue, ma tatalo, o le a tatou aoao atu ma le mana o le Agaga Paia, o lē o le a aveina atu la tatou savali “i loto o le fanauga a tagata [ma tamaitai]” (2 Nifae 33:1).

Mai Tusitusiga Paia

Alema 17:2–3; 31:5; Mataupu Faavae ma Feagaiga 42:12–13; 84:85

Mai lo Tatou Talafaasolopito

Ua faamanatu mai e o tatou perofeta ua mavae ia i tatou o tamaitai ua i ai sa tatou matafaioi taua o ni faiaoga i le aiga ma le Ekalesia. Ia Setema 1979, sa talosaga mai ai Peresitene Spencer W. Kimball (1895–1985) ia i tatou ia avea ma ni “tuafafine e atamamai i tusitusiga paia.” Sa ia fai mai: “Ia avea outou ma tagata atamamai i tusitusiga paia—e le faapea ia ta’u faatauvaaina ai isi, ae ia siitia ai i latou! Ia o ai e sili atu ona manaomia ona ‘faaputuina’ ia upumoni o le talalelei (lea e mafai ona latou tapa i ai i taimi e manaomia ai) nai lo tamaitai ma tina o e o loo faatinoina le tele o le faafailele ma le aoaoina?”⁴

O i tatou uma o faiaoga ma tagata aoao. A tatou aoao atu mai tusitusiga paia ma saunoaga a o tatou perofeta soifua, e mafai ona tatou fesoasoani i isi ia o mai ia Keriso. A tatou auai i le faagasologa o le aoaoina e ala i le faia o fesili anoa ona faalogologo lea, e mafai ona tatou maua tali e fetaui ma o tatou manaoga patino.