Faailoga Tumau
O le tusitala e alala i Iuta, ISA.
O faailoga o a tatou mea sese e le tatau ona tumau. O le i ai o ni lima mamā e matuai aoga, e tusa lava pe e tiga.
O le vaiaso talu ona ou faauu mai le aoga maualuga, sa ou siitia atu ai i le isi itu o le atunuu e nonofo ai ma le aiga o lo’u uso matua mo le taumafanafana ae ou te le’i a’e i le kolisi i le tautoulu.
Sa maua ni nai a’u uo, o le toatele lava o i latou e i le kolisi ma matutua atu. I le po o se tasi o Aso Toonai, sa piki ai a’u e nisi o a’u uo fou e toalua matou te o e faalogologo i se faili manaia sa tatā i se falekalapu o le lotoifale.
A o paka le matou taavale, sa amata ona ou lagona si fefe laitiiti, ae sa ou le manao e tetee ma faaleaga ai le afiafi. Sa matou ulu atu i le kalapu, ma sa siaki e le tamaloa sa i tua o le laulau lo’u laisene avetaavale. E aunoa ma se lapataiga, sa ia tosiina faasolo ai se peni matamea uliuli i luga o ponaivi o o’u tualima i o’u lima uma e lua.
Sa ou tilotilo ifo i ai ma le te’i. Sa ou iloaina ai sa ia faailogaina o’u lima e iloa ai sa ou laitiiti tele mo le faatauina mai o ni ava malosi i le pa.
O le taimi lava lena sa ou le toafimalie ai. Sa inu pia ma ulaula tagata.
Ou te faamalie atu ona ou te le’i maua le lototele e tuumuli ai i le taimi lava lena. Ina ua mavae pe a ma le 30 minute, sa fesili mai se tasi o a’u uo pe o lelei o’u faalogoga. Sa ou fai atu i ai ua tiga lo’u ulu i le leotele o le musika ma le asu [o tapaa]. Sa ia ofo mai na te aveina a’u i le fale, ma sa ou taliaina ma le agaga faafetai.
Sa ou telea’i atu i le faletaele o le fale o lo’u uso ma olo ese na faailoga uliuli seia oo ina tiga. O le a ou tago atu i le faamanatuga ma nei lima i le aso e sosoo ai, ma sa matuai ou manao lava ia mama. Ae peitai, sa iloa atu lava ni laina uliuli se lua i luga o lo’u pa’u piniki.
Ae ou te le’i moe, sa ou tatalo ma ole atu mo le faamagaloga mo le leai o se lototele e aluese ai—ma le mea na sili atu ona tatau, mo le leai o se lototele e aua ai ne’i ou ulu i totonu i le taimi muamua lava. Sa ou folafola atu i le Tama Faalelagi, o le a ou le toe faatagaina a’u lava ia ou toe oo i lena ituaiga o tulaga.
O le taeao na sosoo ai, sa mafai ai ona ou aveesea le tele o le vaega atoa o le faailoga, ma sa toeitiiti lava a mamā atoatoa o’u lima i le taimi na ou tagofia ai le faamanatuga. Sa ou mafaufau i le avea o le agasala e pei o nei faailoga uli. E manaomia ai taumafaiga ma e mafai foi ona tiga, ae e mafai ona tatou salamo ma aveesea a tatou agasala e ala i le mana o le Togiola, ma mama mai faailoga uli i o tatou olaga.