Talitonuga i le Agaalofa
Aumaia mai se faigalotu a le OAE sa faia i le aso 9 o Setema, 2012. Mo le saunoaga atoa i le Igilisi, ua faaulutalaina “Israel, Israel, God Is Calling,” asiasi i le cesdevotionals.lds.org.
O le ala tatou te tali atu ai i tagata ma tulaga e tatau ona atagia ai le loloto atoa o o tatou talitonuga faalelotu ma a tatou tautinoga i le talalelei.
O se taimi ua mavae, sa valaaulia ai a’u ou te lauga i se faigalotu a se siteki o talavou nofofua. A o o’u ulu atu i le faitotoa pito i tua o le nofoaga autu o le siteki, sa ulufale atu foi se tamaitai pe a ma le 30 i le taimi lava lea e tasi. E ui lava i le tumutumu o tagata na o atu i le falesa, ae sa faigofie lava ona matauina o ia. Ou te manatua, sa i ai ni ana pe’a se lua, sa tele ni tautaliga i taliga ma le isu; o lona lauulu faatutu e vali i lanu uma o loo maua i snow cones, o se sakete sa puupuu tele i luga, ma se ofu i luga sa telē le ua.
Pe o lenei tamaitai o se agaga o loo tauivi, e le o se tasi o lo tatou faatuatuaga, sa taitai atu—pe sili atu foi, na aumai e se tasi—i lenei faigalotu i lalo o le taitaiga a le Alii i se taumafaiga e fesoasoani ia te ia ia maua le filemu ma le taitaiga o le talalelei o loo ia manaomiaina i lona olaga? Pe o ia ea o se tagata o le ekalesia sa se ese teisi mai nisi o faamoemoega ma tulaga faatonuina lea o loo uunaia e le Ekalesia mo ona tagata ae o lē, e faafetai ai i le lagi, sa fesootai mai pea ma filifili e auai mai i lea gaoioiga a le Ekalesia i lena po?
Po o le a lava le auala e tali atu ai se tasi i lena tamaitai talavou, o le tulafono e faavavau e faapea i a tatou fegalegaleaiga ma amioga uma, e tatau lava ona atagia mai ai o tatou talitonuga loloto atoatoa faalelotu ma a tatou tautinoga i le talalelei. O lea, o le auala tatou te tali atu ai i soo se tulaga lava e ao ona faia ai ia lelei ni mea, ae le o le leaga atili ai. E le mafai ona tatou galulue pe tali atu i se ala e tausalaina ai i tatou i se solitulafono sili atu nai lo ia i lea tulaga. E le faapea la o le a leai ni o tatou manatu, ma leai ni o tatou tulaga faatonuina, lea i nisi taimi tatou te lafoaia atoa ai le poloaiga faalelagi “Ia e” ma le “Aua nei e” i le olaga. Ae e le faapea foi e ao ona tatou ola i na tulaga faatonuina ma puipuia na “ia e” ma “aua nei e” i se ala amiotonu, i le tomai sili tatou te mafaia, i le ala na soifua ai le Faaola ma puipuia ai na mea. Ma sa Ia faia i taimi uma mea sa tatau ona Ia faia e faaleleia ai se tulaga—mai le aoao atu o le upumoni, i le faamagaloina o e agasala, le faamamaina o le malumalu (mai tagata faatau). E le o se meaalofa faatauvaa le iloaina ona fai o mea faapena i le ala sa’o!
O lea, faatasi ai ma lo tatou iloaina o le tulaga o lavalava ma le teuina o le lauao e le masani ai, tatou te amata ai i le mea e aupito sili ona taua, o le manatuaina lea o ia o se afafine o le Atua ma e i ai sona taua e faavavau. Tatou te amata i le manatuaina o ia foi o se afafine o se tagata iinei i le lalolagi ma e mafai i soo se tulaga lava, ona avea o ia ma ou afafine. Tatou te amata i le faafetai ona sa i ai o ia i se gaoioiga a le Ekalesia, e lei aloese mai se tasi. O le aotelega, tatou te taumafai i le mea sili tatou te mafaia i lenei tulaga i se manao e fesoasoani atu ia te ia e avea o ia ma tamaitai sili. Tatou te tatalo pea ma le leleoa: O le a le mea sa’o e tatau ona fai i i? Ae o le a foi le mea sa’o e tau atu? O le a se mea i le faaiuga o le a faaleleia ai lenei tulaga atoa ma ia? O le fesiligia o nei fesili ma taumafai moni e fai le mea o le a faia e le Faaola, o le mea lena ou te manatu o le uiga lena o Lana fetalaiga ina ua Ia fetalai, “Aua le soona faamasino, a ia faamasino i le faamasinoga amiotonu” (Ioane 7:24).
I le ta’ua o lena mea, ou te faamanatu ai ia i tatou uma a o tatou aapa atu ma fesoasoani e toe faafoi mai se mamoe ua se, o loo i ai foi sa tatou tiutetauave sili e fai i le 99 e le o sē ma i manaoga ma le finagalo o le leoleo mamoe. O loo i ai se lafu mamoe, ma o i tatou uma e tatau ona i ai i totonu, e tusa lava po o le a le saogalemu ma faamanuiaga ia e oo mai ia i tatou ona o le i ai iina. Ou uso e ma tuafafine talavou, e le mafai lava ona “fetuunaia” e lenei Ekalesia ana aoaoga faavae ina ia fetaui ma manaoga o tagata pe taliaina ai i tulaga faaupufai po o se isi lava mafuaaga. Ua na o le saogalemu lava o upumoni faaalia tatou te maua ai soo se malosi e mafai ai ona sii se isi i luga atonu ua lagonaina le popole pe ua tuulafoaiina. O lo tatou agaalofa ma lo tatou alolofa—o uiga faavae ma mea manaomia ia mo lo tatou Faa-Kerisiano—e le tatau ona faaliliuina e fetuutuunai ai ia poloaiga. E pei ona saunoa mai ia George MacDonald ofoofogia i se tasi taimi, e uiga i ia tulaga “e le o noatia i tatou e tautatala atu i mea uma tatou te [talitonu] i ai, ae ua noatia i tatou ina ia tatou le foliga [i] mea tatou te le [talitonu] i ai.”1
O Le A Le Taimi e Tatau Ai Ona Tatou Faamasino Atu
I lenei tulaga, o nisi taimi e i ai se avanoa mo le le femalamalamaai aemaise lava i va o tagata talavou o e atonu ua manatu e le tatau ona tatou faamasinoina soo se mea, ma e le mafai ona tatou faia se iloiloga o le taua o soo se ituaiga. E ao ona tatou fesoasoaniai i le tasi ma le isi i lena vaega ona o loo faamanino mai e le Faaola e faapea i nisi o tulaga e ao ona tatou faamasino atu, ua ia i tatou le matafaioi e faamasino ai—e pei o le taimi sa Ia fetalai mai ai, “Aua tou te avatu le mea paia i ulī, aua foi tou te lafo a outou penina i luma o puaa” (Mataio 7:6). E foliga mai lena mea o se faamasinoga ia te au. O le isi filifiliga o le lolo atu loa i tulaga faatonuina fetuutuunai o le amiomama ua olopalaina e lenei lalolagi i onapo nei, lea e tuleia malosi ma tautino mai e faapea i le faaiuga, e leai se mea e moni e faavavau pe faapitoa le paia ma, o lea, e leai ai se tulaga e faatatau i soo se faafitauli patino e sili atu le taua i lo se isi lava tulaga. Ma i le talalelei a Iesu Keriso, o lena mea e matuai le moni lava.
I lenei faagasologa o le iloiloga, e le o valaauina i tatou ina ia tatou tausalaina isi, ae ua valaauina i tatou ia faia ni faaiuga i aso uma lea e atagia mai ai le faamasinoga—tatou te faamoemoe i faamasinoga lelei. Elder Dallin H. Oaks o le Korama a Aposetolo e Toasefululua i nei ituaiga o faaiuga o “faamasinoga le tumau,” lea e tele ina tatou faia mo lo tatou lava saogalemu po o le saogalemu o isi, e ese mai le mea na ia ta’ua o le “faamasinoga mulimuli,” lea e na o le Atua e mafai ona faia, ma o lē e silafiaina mea moni uma.2 (Manatua, i le mau e pei ona ta’ua muamua, lea na fetalai ai le Faaola e uiga i nei faamasinoga ina ia avea ma ni “faamasinoga amiotonu,” ae le o ni faamasinoga faafia-amiotonu, lea o se mea e matuai ese lava.)
Mo se faataitaiga, e leai se tasi e tauseseina se matua i le faasaina o se tamaitiiti mai le momo’e atu i le auala o loo pisi i taavale. Aisea la o le a tuua’ia ai se matua e popole i le taimi e o mai ai na tamaiti, ua matutua teisi, i le po pe o le a le matutua latou te tafafao faamasani ai pe latou te faataitaia pe leai foi ia fualaau faasaina po o ponokalafi pe faia agasala faalefeusuaiga? Leai, o loo tatou faia ni faaiuga ma tutu atu ma toe faamautuina o tatou tulaga faatauaina—o le faapuupuuga, faia o “faamasinoga le tumau”—i taimi uma, pe tatau lava ona tatou faia foi.
“Pe Le o I Ai Ea i Isi Lo Latou Faitalia?
Atonu e ono mafaufau tagata talavou e uiga i le faatatauga aoao o lenei tulaga e fai po o lena aiaiga sa faia e le Ekalesia, fai mai, “Ia, ua tatou iloa lava le auala e tatau ona tatou amio a’i ai, ae aisea tatou te faia ai ia talia e isi tagata o tatou tulaga faatonuina? Pe le o i ai so latou lava faitalia? Pe tatou te le o faafiaamiotonu ea ma faamasino atu, ma faifaamalosi isi e talia o tatou talitonuga, ma poloaiina ai i latou, faapena foi ma i tatou lava, ia amio i se ala patino?” I na tulaga o le a e faamalamalama atu ai ma le faaeteete pe aisea e puipuia ai nisi mataupu faavae ae teenaina nisi agasala i soo se mea lava o loo maua ai ona o faafitauli ma tulafono o loo aafia e le na o ni taunuuga faaagafesootai pe faaupufai ae e faavavau foi lo latou taunuuga. Ma e ui tatou te le o mananao e faatiga ia i latou e ese foi o latou talitonuga mai ia i tatou, ae e ao foi ona sili atu lo tatou naunau ia aua nei faatiga i le Atua.
E tai pei lava o le fai mai o se tupulaga talavou, “O lenei la ua mafai ona ou aveave, ou te iloa e tatau ona ou tu i se moli lanumumu, ae pe tatau ea ona tatou faamasino atu ma taumafai ia tutū isi tagata uma i moli lanumumu? Ia ona tatau lea ona e faamalamalama atu i ai le mafuaaga, ioe, tatou te faamoemoe o le a tutū tagata uma i se moli lanumumu. Ma e ao ona e faia lea mea e aunoa ma le faitioina o i latou e solia po o ē e ese mea e talitonu i ai mai mea tatou te talitonu i ai ona, ioe, e i ai la latou faitalia e filifili ai. Ae aua ne’i masalosalo o loo i ai le matautia i itu uma pe afai e filifili nisi ia le usiusitai.
Au uo talavou e, o loo i ai se eseesega tele o talitonuga i lenei lalolagi, ma o loo i ai foi le faitalia e filifili ai mo tagata uma, ae e leai ma se tasi e agavaa e fai se mea e pei e le o fetalai mai le Atua i nei mataupu, pe foliga mai foi na o le pau le taimi e taua ai poloaiga pe afai ua malilie i ai tagata lautele.
Ou te iloa e leai se isi tomai e taua atu ma se amiosao e sili atu nai lo le tatou faailoa atu i se lalolagi lea e le mafai ona tatou sosola ese ai nai lo le savavali ma le faaeteete i lena ala—tutu ai i se tulaga mama e tusa ai ma mea ua folafola mai e le Atua atoa ai ma tulafono na Ia tuu maia, ae ia faia ma le agaalofa, ma le malamalama ma le alofa mama sili. O se mea faigata lenei ona fai—ina ia iloatino atoatoa le va o le agasala ma le tagata agasala! Ou te iloa ni nai mea tulaga ese e faigata atu ona fai ma o nisi foi taimi e faigata atu ona faamatala, ae e tatau ona tatou taumafai ma le alofa e fai le mea tonu lava lena.