I le Aoao o le Ekalesia
Ua Faamanatu e Haiti le 30 Tausaga o le Ekalesia
O le tolusefulu tausaga ua mavae, sa asiasi atu ai Peresitene Thomas S. Monson—a o avea lena ma se tasi o le Korama a Aposetolo e Toasefululua—i Haiti ma faapaiaina ai le atunuu mo le talaiina o le talalelei toefuataiina.
Sa asiasi atu talu ai nei ia Elder Neil L. Andersen o le Korama a Aposetolo e Toasefululua i Haiti e faamamalu ai le aso faamanatu. Sa pulefaamalumalu ai Elder Andersen i le tatalaga o le maa faamanatu lea o le a avea o se faamanatu tumau o le amataga o le Ekalesia i Haiti. O le au paia sa tauaofia ai mo le sauniga o le tatalaga [o le maa faamanatu] sa maimoaina se savali sa faasalalauina i le televise mai ia Peresitene Monson lea sa pueina a o le’i oo i le aso o le fuafuaga.
Tali Atu le Ekalesia i Faalavelave e Silia ma le 100 i le 2012
O tausaga uma lava, e tuuina atu ai e Le Ekalesia a Iesu Keriso o le Au Paia o Aso e Gata Ai ni fesoasoani faavavave i tagata i le lalolagi atoa e aafia i faalavelave faanatura, taua, ma oge. I le aluga o le 2012 sa tuuina atu ai e le Ekalesia i tagata na aafia i faalavelave e 104 i atunuu e 52 ia le faitau selau o afe o paina o meataumafa, vai, lavalava, sapalai o mea faafomai, afifi o mea e faaaoga e tausisia ai le tumama, ma isi aitema o toomaga. Ma le isi, e faitau afe le au paia volenitia sa ofoina atu le silia ma le 1.3 miliona o itula o auaunaga.
O le taumafaiga o fesoasoani aupito tele a le Ekalesia i le 2012 sa tuuina atu lea i e na aafia i le Afa o Sandy i Talafatai i Sasae o le Iunaite Setete. E faaopoopo atu ia Sandy, o tali aupito tetele a le Ekalesia i faalavelave i le 2012 na tutupu i Iapani, le Atu Filipaina, ma isi eria o le Iunaite Setete, ma Suria.
Avanoa le FamilyTree mo Tagata Lautele
O le FamilyTree, o se faaleleiga atili ua leva ona talitalia i le saite Initoneti a le Ekalesia o le FamilySearch.org, sa faasalalau tuusao atu i tagata lautele ia Mati 2013. E leai se totogi e faaaoga ai i le FamilySearch.org.
O le FamilyTree o le a iu ina suitulaga i le New FamilySearch, lea e oo mai i le taimi nei e na o pepafaamaumau a le Ekalesia e alu ai i totonu ma le uputatala.
O le taimi nei o isi tagata asiasi i le FamilySearch.org “o le a mafai ona amata fausia atoa lava o latou laau o le aiga i luga o le initoneti, e amata atu ia i latou lava ona faalautele atu ai lea i augatupulaga ua mavae,” o le faamatalaga lea a Paul M. Nauta, o le pule o fefaatauaiga a le FamilySearch.
O Elder Neil L. Andersen (ogatotonu) o le Korama a Aposetolo e Toasefululua o loo pulefaamalumalu i le tatalaga o se maa ua faamanatu ai le 30 tausaga o le Ekalesia i Haiti.
Ata pue mai faaaloaloga a le Eria a Karepiane ma Talafou a le Ekalesia