O se Aiga Faavavau

Kellee H. Mudrow, Iuta, ISA

Ina ua 19 o’u tausaga, sa ou faia ai se asiasiga mulimuli i o’u matua matutua a’o le’i ou tuuvaa mo se malaga e tolu masina e faatino auaunaga fesoasoani alofa i Ekuatoa. Sa siitia atu lo’u tamamatua i se nofoaga faapitoa e tausi ai ona sa fai ifo lava lona soifua maloloina. Sa mafatia o ia i le gasegase o le mafaufau faapea ai ma isi faafitauli faaletino e tutupu ona o le matua o lona soifua.

A o matou ulufale atu ma lo’u aiga i le nofoaga faapitoa e tausi ai, sa ou ita, i le iloaina o le asiasiga lenei ma lo’u tamamatua atonu o la’u asiasiga mulimuli lea. Sa ou iloaina o le a maliu o ia a o o’u aluese, ma sa ou lagonaina le tausalaina i le aluese ai.

Ae matou te le’i ulu atu i lona potu, na sii e se tagata faigaluega lo’u tamamatua i luga o se nofoa faataavalevale. Sa matou tosoina atu o ia i le potu tele o le fale. Sa talanoa atu lo’u tina i se tasi o le aufaigaluega a o ma talanoa atu ma lo’u uso e 16 tausaga le matua i le ma tamamatua.

Sa ese lava o ia. O le faaletonu o le tulaga o lona mafaufau sa iloa lelei lava, ma sa foliga mai sa le mautonu. Ina ua ma fesili atu i ai pe toa fia ni fanau a lana fanau, sa sese lana tali mai. Ona ma ula atu lea ma le alofa ia te ia e pei o se mea taua le aofai moni o ana fanau ua i ai.

Sa mafatia lo’u loto mo ia. Ona sosoo ai lea, i le taimi o lona le mautonu ma i le ogatotonu o le taliina sese o a maua fesili, sa faafuasei ona fai mai lo’u tamamatua, “O se aiga faavavau.”

Sa ou te’i. Sa le’i malamalama se tagata faigaluega sa latalata mai i lana tala sa fai mai, ae sa autilo le tasi o i ma’ua i le isi. Sa manino lelei le ma faalogo ia te ia. Ona ia toe fai mai faalua lea, “O se aiga faavavau.” O le taimi lenei sa lagona mai foi e lo ma’ua tina.

E leai se isi mea ou te manatua e uiga i le matou asiasiga i le aso lena. Na pau lava le mea ua ou iloa, a o matou savavali mai i fafo o le fale e tausi ai, sa ou tagilotulotu i le faanoanoa ma le fiafia—faanoanoa ona o le tamaloa sa matou tuua ma o lē o le a ou le toe vaai i ai i lenei olaga, ae fiafia ona o le alofa mutimutivale agamalu o na upu faatauvaa ma le toafilemu sa latou tuua i totonu o lo’u loto.

Ua ou iloa e ui lava i le tulaga o le mafaufau o lo’u tamamatua, sa mafai ona ia faasoa tasi mai mo le taimi mulimuli lona talitonuga malosi ma le malamalama e faapea, e faavavau aiga.

Sa le’i leva ae ou alu loa i la’u malaga o le auaunaga o fesoasoani alofa. Ina ua oo mai le tala i le maliu o lo’u tamamatua i le toe o se vaiaso o’u foi [i lo’u aiga], sa ou lagona lava le toafilemu. Sa ou iloaina, ma o loo o’u iloaina pea, e i ai se aso o le a ou toe vaai ai ia te ia. Faafetai i sauniga o le malumalu, e faavavau aiga.