Faamagaloina o le Tagata o loo i le Faaata

Saunia e David Dickson

Mekasini a le Ekalesia

Afai ua tatou salamo ma lagonaina ua faamagalo i tatou e le Alii, aisea la e faigata tele ai i nisi o taimi ona tatou faamagalo ia i tatou lava?

Alualu i Luma i le Laa e Tasi i le Taimi

Mo le toatele o tagata o loo ola i aso nei, e faigata ona mafaufau i le olaga e aunoa ma se moli eletise. O se potu pogisa e mafai ona lofia vave i le malamalama i le eu o se ki. O galuega faigofie ia e le’i mamao atu sa manaomia ai ona faatalitali seia tafa ata, pe na tatau ona faia i si tamai pulapula o le moliga’o, ua mafai nei ona faigofie ona fai i le fesoasoani a se fatufatuga lea sa matuai faigata lava ona fatufatua’i atoatoa.

Sa galue Thomas Edison mo ni nai tausaga ma faataitaia le sili atu ma le 1,000 o ituaiga mea eseese a o lei mafai ona ia maua se uaea talafeagai (o le uaea tuaiti e i le ogatotonu o le matauila) lea e mafai ona tuuina mai se malamalama umi ma taugofie. O le i ai i taimi uma o se manatu o le a lelei mea uma, sa tagai ai Edison i mea uma sa le’i aoga e fai ma auala savali masani e agai atu i le mauaina o le mea e tasi o le a aoga. Ma o le taimi sa ia mauaina ai, sa le’i toe tutusa ai lava le lalolagi.

Vaai i Totonu

E anoanoa’i isi tala musuia e uiga i tagata taaalo afeleti, tagata mafaufau, tufuga, ma le toatele o isi o e na iloa le auala e aoao ai mai i a latou mea sese ma taumafai pea lava pea. Taumafai, taumafai, taumafai, ona faamanuiaina ai lea—o se faaupuga puupuu e foliga mai tatou te le vaivai lava e faalogo e i ai. Ae, sei vagana ai o le tagata autu o lena tala patino o i tatou lava.

I tulaga o le tausiga o poloaiga, ua toatele naua i tatou ua poloaia faamalosi lo tatou lava atoatoa e le motusia. Ua pei lenei mea o le faamoemoe e fatufatu le fatufatuga e miliona tala o le a sosoo ai, e aunoa ma le manaomia ona tau fetuunai se manatu faavae o le uluai mamanu, pe faamoemoe ia manumalo i se suega siamupini tele e aunoa ma le faiaina i se taaloga se tasi o le vaitau. A tatou agasala ma le ausia le atoatoa, o le mea masani e le mafai ona tatou faamagaloina i tatou lava ma taumafai pea.

Sa aoao mai Peresitene Dieter F. Uchtdorf, Fesoasoani Lua i le Au Peresitene Sili: “Pe a poloaiina e le Alii ia tatou faamagalo atu i tagata uma, o lona uiga e aofia ai ma le faamagaloina o i tatou lava. O nisi taimi, mai tagata uma i le lalolagi, o le tagata e sili ona faigata ona faamagaloina—atonu e faapea foi ma le tagata e sili ona manaomia la tatou faamagaloga—o le tagata lena e vaai mai ia i tatou i le faaata.”¹

O Se Agaga Ua Suia

Ae e mafai faapefea ona tatou faia lena mea? O se suesuega i le olaga o Amona, le perofeta o le Tusi a Mamona, e mafai ona faaopoopo mai ai se vaaiga.

O aafiaga faafaifeautalai a Amona i a sa Lamana e tutusa lava le faavavega ma lo latou musuia. Mai le puipuia o lafu a le tupu, i le tala’i atu i le Tupu o Lamonae, i le fesoasoani e aumai le talalelei i se nuu atoa, o le olaga ma le galuega a Amona e tumau pea ona avea o se tasi o tala e sili ona musuia i tusitusiga paia uma.

Ae peitai sa le o taimi uma na avea ai Amona ma tagata amiotonu, ma tumu i le faatuatua o lē sa talai atu ma le mana ia sa Lamana. Sa ia faia ni mea sese—ogaoga lava. I le avea ai ma se tasi o atalii o Mosaea, sa faitauina ai Amona o se tasi o i latou o e sa feoai solo e “saili e lepeti le ekalesia, ma taitai ese tagata o le Alii, e le tusa ai ma poloaiga a le Atua” (Mosaea 27:10).

O Amona, faatasi ai ma ona uso ma Alema le itiiti, sa matuai fouvale lava i le galuega a le Atua, lea sa faapea ona faaali ifo ai se agelu a le Alii ia i latou, ma fetalai atu “e pei o se leo o se faititili, sa luluina ai le eleele sa latou tutu ai” (Mosaea 27:11), ma valaau atu ia i latou e salamo.

E manino lava, sa i ai ni solitulafono matuia lea sa manaomia ai ona ia salamo, ma sa salamo ai o ia. Ae faafefea pe ana fai e le mafai ona ia faamagaloa ia lava? Ae faapefea pe ana faapea e le’i alu lava o ia i lana misiona, ma talitonu ua fai si tuai mo ia? Ana faapea na te lei faia, semanu e le mafai ona ia olioli faatasi ma ona uso i le tele o tausaga mulimuli ane i lo latou faamanuiaina i totonu o sa Lamana. “O lenei faauta, e mafai ona tatou vaai atu ma vaai i fua o a tatou galuega; ma ua itiiti ea i latou?” Sa fesili atu ai Amona i ona uso. “Ou te fai atu ia te outou, E leai, ua toatele i latou; ioe, ma e mafai ona tatou molimau i lo latou faamaoni, ma o lo latou alolofa i o latou uso ma ia i tatou foi” (Alema 26:31). E faitau afe na o mai i le upumoni o se taunuuga o a latou taumafaiga faafaifeautalai.

Faamatalaga mai le O Le Mamoe Na Leiloa, saunia e Del Parson, e le mafai ona kopiina.

O Le Matautia o le Faavaivai

E ui lava i le manino o fautuaga mai taitai o le Ekalesia ma faataitaiga mai tusitusiga paia, o nisi lava o i tatou o loo talitonu pea, ua le aofia i tatou i le Togiola, e faapea ua te’a le taimi e faaola ai i tatou. Ua le mafai ona tatou faapalasi ese le avega mamafa o lo tatou lava tausalaina, e tusa lava pe ua uma ona salamo faamaoni. O nisi foi e iu lava ina le toe taumafai.

Aua foi, aisea o le a e toe ano ai fua e toe faatu mai oe mai le eleele pe afai o le a e toe pau foi? E le sili atu, o le mea lena e manao le fili e te mafaufau i ai. O le manatu faapena e le gata ina faavaivaia ai le faaleagaga ma le faalelagona, ae e matuai sese lava foi.

Ua aoao mai tusitusiga paia e faapea, o le Togiola a le Faaola e le gata ma e avanoa mo tagata uma. “O loo o faapea mai Ieova, o mai ia, ina tatou filifili ia, e ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe” (Isaia 1:18). E mafai ona tatou manuia. E mafai ona tatou toe taumafai. Ma tatou te maua le fesoasoani a le Alii i laasaga uma o le ala.

E Le Tuai Lava

Ua tuuina mai e Elder Jeffrey R. Holland o le Korama a Aposetolo e Toasefululua se fautuaga manino e faafeagai ma le fiu ia i tatou lava. “Ae pe o le a foi le tele o avanoa e te manatu ua e misia, pe o le a foi le tele o mea sese e te lagona sa e faia, po o ni taleni e te manatu e te le o mauaina, po o le a foi le mamao ese mai le aiga ma le Atua e te lagona ua oo i ai lau malaga, ou te molimau atu e te lei malaga lava i se mamao e le mafai ona aapa atu i ai le alofa faalelagi. E le mafai ona e magoto ia maualalo ifo nai lo le malamalama le gata o le Togiola a Keriso.”²

Ua aoao atili mai i tatou e Elder Holland ia vaai atu i le lelei o le Atua: “O le mamanu o le atiina ae o le faatuatua o le tumau lea, galue pea, ma vaai ua faamaeaina, lafoai ese atu ia popolega o itula amata—moni po o ni mafaufauga—pe a faatusatusa i le anoanoai o taui mulimuli.³

Faatumulia i le Faamoemoe

E ui e le mafai ona ta’u māmāina le agasala, ae e moni le salamo. E moni le faamagaloga. O le Togiola a le Faaola tatou te maua ai se avanoa e toe amata ai i se amataga fou. E pei lava ona maua e Amona le faamagaloga, e faapena foi oe.

O le mea moni e mafai lava ona tatou faamoemoe mo ni aso fiafia. Na aoao mai le Aposetolo o Paulo, “O le Atua foi e tupu mai ai le faamoemoe, ia faatutumuina outou e ia i le olioli uma atoa ma le filemu, ina ua faatuatua, ina ia tele lava lo outou faamoemoe ona o le mana o le Agaga Paia” (Roma 15:13).

Ona o le meaalofa o le salamo, ua mafai ai e i tatou uma ona toe talitonu ia i tatou lava.