O Le Fiafia e Leai Sona Tau

Abelino Grandez Castro, Peru

Talu ai nei sa ou alu ai i le faletupe e tala mai se tupe e totogi ai la’u aufaigaluega. A o le’i tuuina mai e le talatupe la’u tupe na tala mai, sa ou fai atu ia te ia e sui ni tupe pepa tai 200 tala mo ni tupe pepa ta’i 50 tala. Sa sui e le talatupe le tupe mo a’u, ae sa ou manatu sa ou vaaia lona faia o se mea sese a o ia faitauina ia tupe pepa.

Sa ia tuu mai a’u tai 50 tala pepa, ona ou toe me’i lea i tua e faatali mo la’u tupe na tala mai. A o ou faatalitali, sa ou faitauina le tupe. Sa ou tuuina atu i le talatupe le 1,200 tala, ae sa ia toe tuu mai ia te au le 2,200—o se faasiliga e afe tala. O le taimi la lena sa faaosoosoina ai a’u. Sa ou faapea ifo ia te a’u lava, o loo tele tupe a le faletupe. Ae sa ou iloaina i lo’u loto e le o sa’u tupe; e tatau ona ou toe faafoia.

O ni nai minute mulimuli ane, sa valaau mai ai le talatupe mo le faamae’aina o la’u mataupu. Sa ia faitau mai la’u tupe na tala, ma a o ia tuuina mai le tupe ia te a’u, sa ia fesili mai, “E i ai se isi mea?”

“Ioe,” na ou fai atu ai. “Sa ou tuuina atu ia te oe le 1,200 tala e sui mai i tupe pepa laiti, ae na e toe aumaia ia te a’u le 2,200.”

Ona ou tuuina atu lea ia te ia le 2,200 tala. Faatasi ai ma lima tetete, sa ia toe faitauina ai faalua le tupe. Sa matuai le talitonu o ia i le mea na ia vaaia. Sa tilotilo mai ia te a’u ma taumafai e tautala mai, ae na pau lava upu sa mafai ona ia ta’uina mai faalua o le, “Faafetai tele lava.”

Sa ou aluese ma le fiafia mai le faletupe. O le vaiaso lena, sa ou saunia ai se lesona mo alii talavou o le matou uarota e uiga i le faatoilaloina o faaosoosoga. Sa matagofie le mafai ona faasoa atu ia i latou lo’u aafiaga i le faletupe.

“O lena e te talasua mai a,” sa tausua mai ai nisi o i latou. “E afe tala lena sa e toe faafoia!”

“O le fiafia e leai sona tau,” o la’u tali atu lea ma se ataata.

Ou te matuai faafetai ona o lenei aafiaga, lea na faamalosia ai la’u molimau ma molimau a alii talavou e uiga i le taua o le tetee atu i faaosoosoga.