2013
O Le Maliu Talu ai Nei o Frances J. Monson
Iulai 2013

O Le Maliu Talu ai Nei o Frances J. Monson

“O le aso muamua na ou vaai ai ia Frances, sa ou iloaina ua ou maua le tamaitai sa’o,” sa saunoa ai Peresitene Thomas S. Monson i le faamatalaina o le la faamasaniga.1 O lena iloa sa faamautuina pea lava pea i le taimi o le auaunaga a Frances Beverly Johnson Monson i le soifuaga atoa faatasi ma lana tane atoa ai ma lana lagolago mo ia.

Sa faamutaina lona soifuaga faaletino i le aso 17 Me, 2013, ina ua maliu ma le filemu ia Sister Monson, 85, ona o le matua o le soifua.

E ui sa lei fia lauiloa lava o ia, ae e tele taimi na malaga faatasi ai Sister Monson ma Peresitene Monson i asiasiga i tagata matutua ma i latou e faaletonu le soifua maloloina. Sa avea o ia ma se puna o le malosi i [lana tane] ina ua valaau o ia e avea ma se epikopo i lona talavou tele, ma sa ia auauna faatasi ma ia ao ia pulefaamalumalu ai i le Misiona a Kanata mai le 1959 i le 1962. Sa faaauau pea lana auaunaga lagolago ina ua valaauina lana pele o “Tommy” e avea ma se Pulega Aoao ma ao auauna atu i le Korama a Aposetolo e Toasefululua, i le Au Peresitene Sili, ma le avea ai ma Peresitene o le Ekalesia.

“Sa alofa faapelepele o ia i lou tama ma faamamalu i ana taleni ma meaalofa sa ia tuu atu ma fiafia tele e lagolago o ia ma fesoasoani ia te ia e faalautele ana lava taleni,” sa saunoa ai Ann Monson Dibb, lo la afafine.2

Sa soifua i le aso 27 Oketopa, 1927, o Frances o le afafine o Franz E. Johnson ma Hildur Booth Johnson. Sa faaipoipo atu o ia ia Thomas S. Monson i le Malumalu o Sate Leki i le aso 7 Oketopa, 1948. Sa auauna atu i valaauga i le Aualofa ma le Peraimeri, o se tagata musika talenia, e agamalie tele, ae o le mea sili o mea uma sa fiafia tele e avea o se ava, tina, tinamatua, ma tina o le tinamatua.

Sa faamatala e Sister Dibb lona tina o se e “faalogo i taimi uma ma tau ina ofo mai ni nai upu o mea e na te ono faia pe ana faapea o i ai o ia i lena tulaga. … O lana faataitaiga tumau … na avea ma uunaiga aupito silisili i lo’u olaga. Sa le mafai ona fesiligia mea e talitonu i ai o ia, o mea e mafai ona ia faia, ma mea na te faamoemoeina isi e fai. Sa ia faataitai mai le tagata e tatau ona avea ai oe o se tasi o le Au Paia o Aso e Gata ai, o se Kerisiano.”3

“Ou te lei iloaina lava se taimi na faitio ai Frances i ou tiutetauave faale-Ekalesia,” sa saunoa ai Peresitene Monson. Sa ia faamatalaina o ia o se “tamaitai e filemu ma mamana tele le faatuatua.”4

Faamatalaga

  1. Tagai i le Thomas S. Monson, “Matuai Faamanuiaina Lava,” Liahona, Me 2008, 111.

  2. Ann M. Dibb, i le “Frances J. Monson, Wife of President Thomas S. Monson, Passes Away” (May 17, 2013), mormonnewsroom.org.

  3. Ann M. Dibb, i le “Frances Monson: Through the Eyes of Daughter, Ann Monson Dibb” (Mormon Times video, May 12, 2013), ksl.com.

  4. Thomas S. Monson, ta’ua i le Jeffrey R. Holland, “Peresitene Thomas S. Monson: I Tulagaaao o le Matai,” o se faaopoopoga i le Liahona, Iuni 2008, 8.

O Peresitene ma Sister Monson i le maea ai o se sauniga o le konafesi aoao ia Aperila 2010.

© IRI