Ola mo le Faavavau
Mai se saunoaga i le faigalotu na tuuina atu i le Iunivesite o Polika Iaga–Idaho i le aso 20 o Mati, 2007. Mo le anotusi atoa i le Igilisi, asiasi i le web.byui.edu/devotionalsandspeeches.
Ou te talosaga atu ia te outou le autalavou matutua ia vaai faalemafaufau i taimi uma i lou ola ai faaselesitila i le lumanai faatasi ma lou aiga i le faavavau.
E maeu le ese ma le faigata o le lalolagi o talavou matutua (faaipoipo pe nofofua) i aso nei pe a faatusatusa atu i le lalolagi o talavou matutua o le lua po o le tolu augatupulaga ua mavae. E tele luitau i aso nei sa le’i i ai, ia pe sa tau le faigata foi, nai lo le vaitaimi sa ou i ai i le kolisi.
Ae ua outou i ai nei iinei, i le taimi lava lenei. O loo outou fetaomi atu i luma a o agai atu o outou tuaa matutua i le faavavau. E le’i tupu faafuasei lo outou i ai iinei i le taimi lenei, ae o se vaega o se fuafuaga e faavavau—sa mamanuina, malilie i ai, ma faataunuuina a o le’i taitai foafoaina le lalolagi.
E ese le faamanuiaina o outou i lo outou iloaina o le Toefuataiga o le talalelei! Ua outou iloa sa i ai se muai olaga i le afioaga o le Tama Faalelagi ma Iesu Keriso. Sa aoaoina ma tofotofoina outou. Ua outou iloa tulafono o le a mafai ai ona outou alualu ma faasolosolo atu i luma. Sa outou mulimuli i na tulafono, ma na faapea ona outou agavaa ai e o mai i le lalolagi, ma tuu ai outou i luga o se auala e tau atu i le faaeaga, pulega, ma le faaleatua.
Ua outou malamalama i faamoemoega o le olaga faaletino i luga o le fogaeleele, ma ua aoaoina outou e faatatau i avanoa pe a mavae le olaga faaletino. I le faapuupuuga, ua ia te outou le vaaiga mamao o le faavavau—e mafai ona outou toe tepa i tua, ma mafai ai ona outou pulato’a atu i luma.
O le toatele o la outou tupulaga o talavou matutua o e e le o ni tagata o Le Ekalesia a Iesu Keriso o le Au Paia o Aso e Gata Ai, ma le lautele o le lalolagi, e itiiti lava so latou iloa i nei mea moni. O loo latou ola e pei o loo i totonu o se pusa ua faamatalaina e ni mea se lua e tutupu: fanau mai ma le oti. Latou te faia faaiuga ma auai i amioga ua faatapulaaina i se vaaiga lata mai. O le mea moni lava, latou te ola mo le taimi lava lea—o le umi o le taimi i le va o lo latou fanau mai ma lo latou oti, lea ua na o sina taimi lava i le fuafuaga o le faavavau. Atonu latou te le iloa se mea e uiga i lo latou olaga i le muai olaga ma sina mea itiiti e uiga i le faavavau.
O Lou Gafatia e Faavavau
Ae peitai, o oe, ua e iloa le folafolaga e uiga i lou gafatia patino i le faavavau. Ua folafola mai e le Alii i na ulugalii ua faamauina i malumalu paia:
O le a oulua tutulai mai i le uluai toetutu … ma o le a mautofi i nofoalii, malo, itumalo ma mana, ma puleaga, o mea maualuluga uma ma loloto … ma afai e ola i laua i la’u feagaiga, ma lē faia se fasioti tagata e faamasaa ai le toto lē sala, o le a faia ia te i laua i mea uma i soo se mea e tuu atu e la’u auauna i luga o i laua, i le taimi nei, ma i le faavavau atoa; ma o le a taulia atoatoa pe a i ai i laua i fafo o le lalolagi; ma o le a laua pasi atu i agelu ma atua, o e ua faatutu iina, i lo laua faaeaga ma mamalu i mea uma, e pei ona faamauina i luga o o laua ulu, o le mamalu lea o le atoatoaga ma le faaauauina o fanau e faavavau ma faavavau lava.
“Ona avea ai lea o i laua ma atua, aua ua leai so laua gataaga; o lea o le a i ai i laua mai le faavavau tumau, ona ua i ai pea lava i laua; ona avea ai lea o i laua i luga o mea uma, aua ua pule i laua i mea uma. Ona avea ai lea o i laua ma atua, aua ua ia i laua le mana uma, ma o agelu e i lalo o la laua puleaga” (MF&F 132:19–20).
Ou te talosaga atu ia te oe e vaai faalemafaufau i lou ola ai faaselesitila i le lumanai faatasi ma lou aiga i le faavavau, o se tulaga o le mamalu e le mafuatia ma le manuia tatou te le’i malamalama atoatoa i ai. Ae peitai, o le mea e mafai ona tatou matuai mautinoaina, o outou uma taitoatasi sa usitai i lo outou “esetete muamua” (Aperaamo 3:26), na pasia e outou uma taitoatasi suega o le muai olaga, sa faaaoga e outou uma taitoatasi le faatuatua tele, ma ua faapea ai, ona outou maua uma le faamanuiaga o le maua o se tino faaletino ma o mai ai i le lalolagi lenei.
O le mea lea, ia aua lava ne’i outou ola mo na o le taimi lava lea; ae, e ao ona outou ola mo le faavavau. Ia manatua i taimi uma, afai e te lua usiusitai ma lou toalua, po o lou toalua i le lumanai pe afai e te le’i faaipoipo, o le a “faaopoopo i luga o o [oulua] ulu le mamalu e faavavau ma faavavau lava” (Aperaamo 3:26)—o se folafolaga patino ma ofoofogia mai le Atua i Ana fanau taitoatasi.
Afai e te faamaoni i le tausiga o poloaiga a le Atua, o le a faataunuuina uma lava Ana folafolaga. O le faalavelave, o loo taumafai le fili o agaga o tagata e faatauaso o latou mafaufau. Afai latou te faatagaina o ia, o le a tauai mai e Satani ia pefu i o latou mata, ma faatauasoina ai e mea o le lalolagi.
E le o iloa e tagata atamamai o mea tau lotu ma le au atamamai o le lalolagi Kerisiano mea ua e iloa e uiga i le faavavau, ae ua iloa e Satani! Ua ia iloa e uiga i au sauniuniga i le muai olaga, lou faamoemoega i le lalolagi, faapea foi ma lou gafatia e faavavau.
O le faaliliuga faaEperu o le upu tiapolo o le “faaleaga mea.”1 O loo taumafai le tiapolo e faaleaga lau malaga e agai atu i le faavavau. E taumafai o ia e faalavefau i lou gafatia iinei ma i le lumanai. E saili o ia ina ia e faaaogaina ma le le poto lou faitalia. O nisi o tagata talavou, e naunau e folafola atu lo latou tutoatasi, ua manatu o lo latou tutoatasi e sili atu ona faaalia i le filifili lea e fai se mea sese. Soo se vale lava e mafai ona faia lena mea; soo se faapotopotoga lava e mafai ona faia lena mea.
O le mea moni, o le tutoatasi, saolotoga moni, e sili atu ona faaalia ma oo i ai e ala i le filifilia e le aunoa o le mea sa’o. Ua tuuina atu e le Atua ia te oe e le gata o le aia tatau e filifili ai i le va o le lelei ma le leaga, ae faapea foi ma le mana e filifili ai le lelei nai lo le leaga! O lea la ua tuu atu ai e le Atua ia te oe le mana e malosi atu nai lo Satani ma ana au. I le faaiuga lava, o oe e filifili, ae le o Satani.
Ua fuafuaina e le Tama Faalelagi lenei aafiaga i le olaga nei mo se faamoemoega taua: ina ia mafai ona tofotofoina i tatou ma faatoilalo le leaga. E seāseā ona Ia fuafuaina faapitoa ni tofotofoga ma ni faaosoosoga, ae ua Ia silafia o le olaga faaletino o le a tuuina mai ai le anoanoai o ia mea. Ua finagalo o Ia a o tatou i ai iinei i le lalolagi, ia tatou aoao e faatoilalo o tatou lava tagata “natura” (tagai Mosaea 3:19), faafiti i tatou lava mai mea faalelalolagi, ma faamaonia lo tatou agavaa. Ua i ai foi isi manatu o Satani. O le a ia faia soo se mea na te mafaia e faaleaga ai lo tatou alualu i luma.
O Faaosoosoga a le Lalolagi
O le lalolagi lenei, faatasi ai ma le fesoasoani ma uunaiga poto ma le amioleaga a Satani, e ofoina atu ia te oe le faaosoosoga ina ia [e] taliaina, ia taumulimuli i taaiga a le potopotoga, ia fiafia i le tuinanau o lena lava taimi—atonu e i tulaga o tifaga po o taaloga vitio le talafeagai, o le faatamala e ola i amioga lelei (e aofia ai ponokalafi), gagana faatufanua, lavalava le tauagafau, po o le le faamaoni. O le a taumafai Satani e faaluafesasi lou malamalama e uiga i le fuafuaga paia o le mamanu o le aiga: o le faaipoipoga i le va o se alii ma se tamaitai ua faauuina e le Atua, ma ua i ai i fanau le aia tatau ina ia tausia e se tina ma se tamā.2
Afai, mo se taimi, e te taliaina ai ma le le mafaufau i ai o le valaaulia a Lusifelo, na te ono faoa mai ia te oe faamanuiaga o le faavavau. E leai se vaaiga patino o Satani mo le faavavau. Manatua foi, sa faiaina o ia i le taua i le lagi, o se taua sa tauina i molimau (tagai Faaaliga 12:11) lea sa faatoilaloina ai o ia ma ana au e soo faamaoni o Keriso. Sa toatele e na maliliu ai: o tagata uma sa mulimuli ia Satani—o le tasi-vaetolu o au o le lagi—sa tutulia i fafo. O le a latou le maua lava se tino faaletino pe maua le avanoa mo le ola e faavavau.
Sa saunoa atu Liae i lona atalii o Iakopo, e faapea:
Ma o a’u o Liae, e tusa ma mea na ou faitauina, e ao ona ou manatu ai e i ai se agelu a le Atua, e tusa ma mea ua tusia, na pau ifo mai i le lagi; o le mea lea, na avea ai o ia o se tiapolo, i lona saili o le mea ua leaga i luma o le Atua.
“Ma ona ua pau ifo o ia mai le lagi ma ua pagatia e faavavau, o lea ua saili ai foi e ia le pagatia o tagata uma” (2 Nifae 2: 17–18).
Sa aoao mai foi Liae: “O le mea lea, ua saoloto ai tagata e tusa ma la le tino. … Ma ua latou saoloto e filifili le saolotoga ma le ola e faavavau, e ala i le Puluvaga sili o tagata uma, pe filifili le faatagataotauaina ma le oti, e tusa ma le faatagataotauaina ma le mana o le tiapolo; ona ua saili o ia ia pagatia tagata uma e pei o ia lava” (2 Nifae 2:27).
I o tatou taimi, o le au faatau fualaau faasaina, o e faasalalauina ponokalafi, o le au faalauiloa o faafiafiaga faatiapolo, o e lagolagoina pepelo, o le au faalauiloa o lavalava le talafeagai, o le au faatosina o amioga le mama, ma le au faitio o le aiga masani, ua latou lagolagoina filifiliga o le a faaitiitia ai le ola faaleagaga, ma taunuu ai i le oti faaleagaga, o atalii ma afafine o le Atua.
Ia manatua e ata Satani i le le manuia o i latou o e ua faaseseina e na ituaiga faatosinaga (tagai Mose 7:26). E eseese lava ana auala, ae ua tasi lava lo latou faamoemoega: o le le usiusitai ma le aveesea o faamanuiaga e fesootai [ma le le usiusitai].
Faamanuiaga o le Usiusitai
O le usiusitai e faatagaina ai faamanuiaga ma aumai ai le filemu. Ia mafaufau i se faaiuga atamai faapitoa na e faia e fai le mea sa’o, e ui lava sa matuai malosi le faaosoosoga e fai le mea sese. Atonu o se faaiuga na fai e aveese ni mafaufauga le talafeagai po o le ta’u o le mea sa’o i se taimi na faigofie ai le fai o se pepelo. Atonu o se faaiuga sa fai e tu i luga ma savali i fafo mai se tifaga (po o se isi lava nofoaga le paia) lea sa faasalalauina e faapea e lelei, ae, o le mea moni, na faamaonia ai e le talafeagai.
A o e toe tepa i tua i lau faaiuga tatau, o le a sou lagona i ai? O le matuai fiafia lava? O se lagona o le loto pulea po o le faateleina o le malosi? Talitonuga faateleina i luma o le Alii? Malosi faateleina e tetee ai le tiapolo? O le mana lena; o le saolotoga lena!
Afai e te teteeina i taimi uma ia faaosoosoga, e oo ina faigofie atu ona fai o lena mea—e le faapea ona ua suia le natura o le tetee atu, ae o lou malosi e fai ai ua faateleina. 3 E mafai ona e faatoilaloina soo se faaosoosoga e te lua fetaiai (tagai 1 Korinito 10:13).
Ua ia te oe le malamalama o lou tupuaga faalelagi. Ua ia te oe le iloa atoa o lou taunuuga e faavavau. Ou te valaaulia outou “ia tutu atu i le paia o loo i totonu ia te outou”4 ma aua le ola mo na o le taimi lava lenei ae mo le faavavau.
Outou le autalavou matutua lelei e, outou taitai o le lumanai i le malo o le Atua ma i alalafaga, e le tatau ona outou faiaina i lenei taua umi. Sa e sao mai i le taua i le lagi; e mafai foi ona e manumalo i le taua i le lalolagi. Aua le ola mo le taimi nei ae ia mo le faavavau.
Ia mautinoa, e aogā au taumafaiga e usitai i poloaiga, aua o lou taui o le toe foi atu i le afioaga o le Atua i le tikeri aupito maualuga o le malo selesitila.
Ata na tusia e David Stoker