Ua Saunoa atu Elder Cook i le Au Paia ma Tagata Sailiili i Ivory Coast

Saunia e R. Scott Lloyd

Talafou o le Ekalesia

Sa malaga atu Elder Quentin L. Cook o le Korama a Aposetolo e Toasefululua i Abidjan, Cote d’Ivoire (Ivory Coast), ia Fepuari 2013. I le faagasologa o le asiasiga sa pulefaamalumalu ai o ia i se konafesi faaleautaitai perisitua, sa faia se fonotaga faapitoa ma le au paia ma tagata sailiili, ma asia taitai autu o le malo.

Sa malaga faatasi Elder Cook ma Elder L. Whitney Clayton o le Au Peresitene o Fitugafulu; Elder John B. Dickson o le Fitugafulu, Peresitene o le Eria a Aferika i Sisifo; ma Elder Joseph W. Sitati o le Fitugafulu, Fesoasoani Muamua i le Au Peresitene o le Eria a Aferika i Sisifo.

O le aofai o e na auai i le konafesi faaleautaitai perisitua ma le fonotaga a le au paia ma tagata sailiili e 9,693, lea na aofia ai tagata sailiili e 619. E toatele le au paia sa faia ni osigataulaga maoae ina ia auai ai. Fai mai Virginie Oulai Tongo o le Paranesi a Meagui, Misiona a Cote d’Ivoire Abidjan, sa sefe e lona aiga le latou tupe e o mai ai e vaai i se Aposetolo. “E 12 itula o matou malaga mai, ae ua ou fiafia,” o lana tala lea.

O le toatele o e na auai i le konafesi, sa lipoti mai i le maoae o le oa o le Agaga na latou olioli ai. Na saunoa Epikopo Leon Kouadio o le Uarota a Dokui, Siteki a Cocody, “Ua ou iloa sa i ai se auauna faapitoa a lo tatou Faaola ia i matou.”

Ua tupu le faitauaofai o tagata o le Ekalesia i Cote d’Ivoire mai se aiga e toatasi i le 1984 i siteki e lima ma se misiona e tasi i le taimi nei.

I tausaga e le’i mamao atu, o le faamaoni o le Au Paia Ivori ua faapitoa ona faaalia i a latou galuega o talafaasolopito o aiga ma galuega faalemalumalu. O le tolu o siteki e lima i Cote d’Ivoire o loo i ai i le 25 pito i luga a le Ekalesia i pasene o tagata matutua ua auina atu igoa o aiga mo sauniga i le malumalu talu mai le 2012. I siteki uma a le Ekalesia, o le Siteki o Cocody e aupito maualuga le pasene o tagata matutua o e ua auina atu, i taimi eseese, igoa mo galuega faalemalumalu.

O loo fai foi e le autalavou la latou vaega. O le pasene o tagata talavou Ivori e faia galuega faasinoupu [igoa mo talafaasolopito o aiga] e sili atu ma le faaluaina le maualuga i le averesi a le Ekalesia, e ui i le mea moni e faapea, e toetoe lava leai se isi o i latou e i ai sana lava komepiuta ma le Initoneti, ae e ao ona o atu i se nofoaga autu mo talafaasolopito o aiga a le siteki e fai ai le galuega.

Ua aoaoina le au paia e faapea, o le galuega o talafaasolopito o aiga o se vaega taua o le ola i le talalelei. Latou te galulue malosi ia saunia igoa o aiga ae latou te le’i feosoi i le pasi mo le malaga umi i le Malumalu o Accra Ghana—ma e masani ona aveina e le na o ni nai igoa, ae e anoanoai.

Sa uunaia e Elder Cook ma Elder Clayton le Au Paia ina ia agai pea i luma i ni vaega autu se fa: faateleina o o latou faatuatua i le Alii o Iesu Keriso, faamalolosia o aiga, ia toaaga e faasoa atu le talalelei i isi, ma le faaauau pea o a latou taumafaiga maoae i galuega o talafaasolopito o aiga ma galuega faalemalumalu.

Sa saunoa atu Elder Quentin L. Cook o le Korama a Aposetolo e Toasefululua i le faitau afe sa tauaofia i Abidjan, Cote d’Ivoire, ia Fepuari.