Uunaia e le Faatuatua

Saunia e Maggi Earl

E alala le tusitala i Karolaina i Matu, ISA.

O le a le galo ia te a’u le savalivali ai i laufanua i Uinita Kuota, Nebraska, ISA, i le mea sa nonofo ai le au paionia i tausaga na muamua atu. Sa pei e paia le laufanua, e pei lava ua ou asiasi i se malumalu e i fafo.

Sa maligi o’u loimata, lea sa nenefu ai la’u vaai. Sa ou vaaia se faatagata ae sa ou le mafai ona iloa atu ia foliga. Ina ua ou soloia o’u loimata, sa ou vaaia ai se alii ma se tamaitai ma ni foliga sa tumu i le faavauvau. A o ou vaai latalata atu i ai, sa ou vaaia ai se faatusa o se tamaitiiti laitiiti i se tuugamau o la tutu ai.

O lenei vaaiga sa faatumulia ai a’u i le tele o lagona: faanoanoa, ita, loto faafetai, ma le olioli. Sa ou manao e aveese le tiga sa lagona e na Au Paia, ae sa ou faafetai i le taimi lava lea e tasi mo mea sa latou ositaulagaina mo le talalelei.

O lo’u aafiaga i Uinita Kuota sa fesoasoani ou te iloa ai, ua tuuina mai e le Tama Faalelagi le talalelei i Ana fanau ma faatagaina i latou e faaaoga le faitalia e faia ai mea latou te loto i ai. Sa ono mafai e matua o lena pepe ona filifili e ui i se auala e faigofie atu. O le mulimuli ai i le perofeta ma le ola ai i le talalelei sa manaomia ai nei paionia ina ia fetaomi atu i luma e tusa lava pe o lona uiga o le tanumia ai o le la tama. Ae sa la filifili e tauave le talalelei i o la olaga ma talia o laua luitau. Sa ou aoaoina ai o le tuuto o le Au Paia i le talalelei ma lo latou naunau e fetaomi atu i luma sa uunaia e le faatuatua ma le faamoemoe—faamoemoe mo se lumanai sili atu ma le faatuatua e faapea sa silafia e le Alii i latou ma e mafai ona faamāmāina o latou tiga.