Aafiaga i le Faatuatuaga Loloto
I le ono o tausaga o Claire (ua sui le igoa), sa faapea ona tete’a ai ona matua. I tausaga na sosoo ai, sa ia molimauina ai le tele o faaipoipoga malepelepe faapea foi ma tagata o aiga sa tauivi ma vaisū, le malolosi i le Lotu, ma le faanoanoa. O le faanoanoa ma le le mautonu, sa aveesea ai le talitonu o Claire i le aiga.
“Sa ou faapea ifo ia te a’u lava, o le faaipoipoga e le mo a’u lea,” o lana tala lea. “Ae sa na o lo’u faalafiina ai o lo’u fefe ina nei faapena foi lo’u lumanai e pei o le mea sa ou aafia i ai.”
E faaopoopo atu i le lagonaina o le le fiafia i lona tulaga faaleaiga, sa lagona foi e Claire le tuua toatasi. I se tasi o aso a o talavou, sa alu ifo ai o ia i ona tulivae i le atuatuvale ma tatalo ai, ma aioi atu ia iloa pe sa i ai iina le Tama Faalelagi. “Ina ua ou le toe tagi ma lē toe tautala, sa lofituina a’u i se lagona mumu sa faapea ona toafimalie, malosi, ma matuai tuusao lava,” o lana tala lea. “Sa ou iloa sa i ai iina le Tama Faalelagi ma o le a alofa pea ia te a’u ma fesoasoani mai i o’u tofotofoga.”
O le tali sa maua e Claire na faaosofia ai se manao e faatupulaia lana molimau ma faalagolago i le Atua ma i Ana poloaiga e faatatau i le aiga. Sa le gata ina sa faaauau pea ona ia tatalo, ae sa ia faitauina foi ana tusitusiga paia, auai i le seminare, ma tausi poloaiga.
O le taimi nei ua faaipoipo Claire, ma o loo aoao o ia e fetaiai ma ona luaitau i le faatuatua. “Ou te le popole pe o le a faigata ona tausia se aiga malosi ona ua ma filifili ma lo’u toalua ia faafailele i taimi uma a maua molimau, e aofia ai lo maua Tama Faalelagi ma lo maua Faaola i o maua olaga, ma ia manatua le upumoni e le mafaafitia o le talalelei.”
Mo Claire, o le fausiaina o le faatuatua i le Atua sa amata i se tatalo faatauvaa, ma faamaoni. Ae o le a se isi mea e mafai ona tatou faia e atiae ai le faatuatua i le Tama Faalelagi? O le autalavou matutua i le lalolagi atoa—e tofu i latou taitoatasi ma faafitauli—ua faasoa mai o latou aafiaga i auala ua latou atiaeina ai le faatuatua i le Alii ma aoao e faalagolago i Lona finagalo, Lana ala, ma Lana taimi.
Faatumau le Agaga Faafetai
O le manatunatu i ona faamanuiaga ua fesoasoani ia Stefanie Egly o Hesse, Siamani, e faalagolago ai i le fuafuaga a le Tama Faalelagi ma i Lana taimi faagasolo.
Sa amata ona tusitusi i lalo e Stefanie ona faamanuiaga ina ua le tau lau o le la mafutaga ma se uo lelei. “E ui ma te le’i tafafao faamasani, ae o taimi uma lava sa ou faamoemoe ai ia oo atu le ma mafutaga i se mea e sili atu. Sa olopalaina o’u faamoemoega ina ua fai mai o ia ua i ai sa na uo teine.”
I le loto nutimomoia, sa faapea ona maua ai e Stefanie le toafimalie ina ua uma ona faitau i se tusiga e faatatau i le agaga faafetai i le Liahona. Sa ia lagona le musuia e tusi i lalo auala na faamanuiaina ai o ia—ae maise lava i le auala ua avea ai le nofo toatasi ma se faamanuiaga.
O lana lisi sa fesoasoani na te iloa ai e faapea, ona na te le’i maua le avanoa e faaipoipo ai, e le faapea ai la na teena ai foi lona mauaina o faamanuiaga. Ua iloa e Stefanie sa faamanuiaina o ia e le Alii i le avanoa e avea ai ma se faiaoga i le aoga tulagalua ma galulue faatasi ai ma tamaiti. Ua malaga atu, auai i le konafesi aoao, ma auai o se faufautua i le polokalama ua Faapitoa mo le Autalavou. O nisi o ana faauooga sili ona pele sa atiaeina e ala mai i konafesi a le autalavou nofofua matutua lea sa auai atu ai.
Ae o le faamanuiaga aupito sili ona telē, na ia fai mai ai, o le mafai lea ona faaalu o lona taimi ma lona tinamatua i se taimi e le’i umi ae maliu o ia, o se mea sa le’i mafai e nai ona tei ma ona tausoga ona fai ona sa mamao le mea sa latou nonofo ai pe sa i ai ni aiga e tausi.
Ua mavae le lima tausaga talu ona amata tusitusi e Stefanie ona faamanuiaga. O loo faatali pea o ia mo le taimi o le a ia maua ai le avanoa e faaipoipo ai i le malumalu. Fai mai o ia, “Ou te le iloa po o afea o le a ou feiloai ai i la’u soa e faavavau, ae ou te talitonu e oo mai lava le taimi. Ae o le taimi nei, ua ou iloa o le a faaauau pea ona maua ni o’u aafiaga o le a fesoasoani ou te aoao ma tuputupu ae ai.” Ua matuai faamanuiaina lava o ia e le Tama Faalelagi, ma ua ia iloa o le a faaauau ona Ia faia faapea pe afai e faamaoni o ia.
Faitau i le Afioga a le Atua i Aso Uma
Sa faatoa uma lava ona faamaeaina e Tanielu Matuselo mai Colorado, ISA le tatalaga o lana faaipoipoga, ma sa faigata ona ia lagona le toafilemu i ona tulaga fou. Sa le gata ua le o toe faitoalua o ia, ae o ia foi o se tamā fou ma leai se galuega. Sa le malamalama o ia pe aisea na tupu ai lenei mea—ae maise lava sa taumafai o ia i taimi uma ina ia amiotonu.
O le lagonaina o le tuua toatasi ma le le mautonu, sa liliu atu ai Tanielu i tusitusiga paia. “Ou te manatuaina le toafimalie sa ou lagonaina i taimi ua tuanai mai le faitauina o tusitusiga paia, o lea sa ou faia ai ia avea ma o’u taulaiga i aso taitasi,” o lana tala lea. O le faaavanoaina o le taimi mo le suesueina o tusitusiga paia i aso uma o lona uiga, sa ia faatapulaaina mea faafiafia e pei o le televise ma le Initoneti. Ae sa le o se osigataulaga lea, na ia fai mai ai. “A o ou faitau, sa ou maua le toafimalie ma le taitaiga. O isi mea sa oo ina faalona-lua le taua. Ou te le’i faitau e tau lava ina faitau, ae sa ou saili mo ni tali. Sa ou faitau faatasi ma se faamoemoega.”
Sa maua e Tanielu le toafimalie i tusitusiga paia a o ia iloaina e oo tagata uma i faigata. “O perofeta ma isi o e sa amiotonu ae sa i ai lava o latou tofotofoga,” o lana tala lea. “O le faitauina o o latou aafiaga sa fesoasoani ou te malamalama ai e faapea, e i ai se taimi o le olaga, tatou te mafatia uma ai, ae o totonu o lena puapuaga e mafai ona tatou latalata atili atu ai ia Keriso.”
Ma le isi, fai mai Tanielu o le faitauina i aso uma sa tuumāmāina ai lana avega, aua o se auala lea e faaaofia ai le Faaola i lona olaga i aso uma. “A o fetalai mai le Atua ia te a’u e ala mai i fuaiupu sa ou faitauina, sa ou faatuatua o le a sologa lelei mea uma ma faatasi ai ma Lana fesoasoani, o le a faapea ona oo mai ai se mea lelei mai lenei aafiaga.
Faamuamua le Atua
Sa oo ia Po Nien o Kaohsiung, Taiuani, le popole ina ua uma ona faamalamalama i lana uo tamaitai, o Mei Wah. “Sa ou tafao faamasani muamua i isi tagata, ma e le itiiti ifo ma le faatolu isi taimi muamua, sa i ai sa’u mafutaga tumau ae sa iu ina le tau lau. O na aafiaga na maluelue ai lo’u talitonuga i le toe faia o se mafutaga tumau o le a faapea ona oo atu ai i se mafutaga e faavavau,” o lana tautino mai lea.
E ui ina sa lagona e Po Nien le filemu ina ua tatalo e uiga i le faaipoipo atu ia Mei Wah, ae sa amata ona ia masalomia lana tali. Pe sa ia lagonaina se faamautinoaga mai le Agaga? Pe o ona faalogona ua faafenumia’ia o ia? Faamata o le faamauga lenei o le a oo atu ai i le malumalu? Pe o le a le taulau foi lenei mafutaga?
O le vaitaimi lea sa manatua ai e Po Nien se upusii mai ia Peresitene Ezra Taft Benson (1899–1994) sa ia faalogo i ai i se vasega inisitituti: “E tatau ona tatou faamuamua le Atua i isi mea uma o o tatou olaga. … A tatou faamuamua le Atua, o le a tulaga lelei isi mea uma pe toulu ese foi mai o tatou olaga.”1
O lenei fautuaga sa faailogaina ai le suiga i le olaga o Po Nien. “Sa ou iloaina afai ou te faamuamuaina le Atua i lo’u olaga, ma afai lava ou te faatuatua ma faamaoni ia te Ia, o le a toulu ese mea sese ae o le a tulaga lelei ai isi mea uma,” o lana tala lea. Afai na te faamuamua le Atua ma afai e lelei le la mafutaga ma Mei Wah, o le a fesoasoani le Tama Faalelagi ina ia faamanuiaina. O le agai i luma ma le faatuatua, sa faaipoipo ai Po Nien ia Mei Wah i le Malumalu o Hong Kong i Saina. “Ua matuai faamanuiaina tele a’u ona o le tuuina o lo’u faatuatuaga i le Alii,” sa ia fai mai ai.
Saili e Fai Lona Finagalo
O le isi auala e fausia ai le faatuatua i le Tama Faalelagi o le fai o Lona finagalo. Mo Marta Fernández-Rebollos mai Tarragona, Sepania, o le aoao e faalagolago i le Tama Faalelagi sa oo mai mai le filifili e faatumauina ona tulaga faatonuina.
O le alii talavou sa la tafafao faamasani, sa le o se tagata o le Ekalesia ma sa leai se naunau e fia auai. “Sa amata ona tauivi lo’u agaga i le va o le mea sa aoaoina ai a’u e uiga i le faaipoipoga e faavavau ma le fia selau o ‘alofaga sa tuuina mai e lo’u loto ia te a’u ina ia lafoai uma ae faaipoipo i lena alii talavou mo na o le olaga lenei,” o lana tala lea. “O masina na o le fenumia’i, tiga, ma le tele o le loimata maligi.”
O le felafoaiina ai i le le mautonu, sa alu atu ai Marta i lona potu ma saili mo le taitaiga mai lona faamanuiaga faapeteriaka. Sa ia faitauina le mea sa folafola atu ia te ia pe a ia filifilia le mea sa’o. Sa tagi lotulotu o ia, ona sa ia iloaina le mea e tatau ona ia faia. “O taunuuga o le motusia o le mafutaga sa le’i toe afaina ia te a’u. Ou te le’i iloa le mea sa taoto mai i luma atu, ae sa i ai lo’u talitonuga faapea, afai lava ou te i ai i le itu a le Alii, o le a le masalomia lava o se mea lelei. Ua ou iloaina e faapea, a tatou siitia la tatou vaaiga mamao ma mulimuli i uunaiga a le Agaga Paia, tatou te iloa ai o fua o le amiotonu e ‘sili ona suamalie, nai lo mea uma sa [tatou] tofo muamua i ai’ (1 Nifae 8:11).”
I le Faataoto 3:5–6, tatou te faitau ai:
“Ia e faatuatua i le Alii ma lou loto atoa; ae aua le faalagolago i lou lava atamai.
“Ia e manatua o ia i ou ala uma, ona faatonuina ai lea e ia lava ou ala.”
O le fausiaina o le faatuatua i le Atua ma i Ana fuafuaga e le o taimi uma e faigofie ai. E fetaia’i i tatou uma taitoatasi ma o tatou lava luitau. Atonu e le’i maua se tagata talafeagai e te tafao faamasani i ai i lau uarota po o le paranesi. Atonu foi ua maua le faaipoipoga, ae le’i maua ni fanau. Atonu foi o loo e feagai ma le tatalaina o le faaipoipoga. Ia pe atonu foi o ni aafiaga ua mavae ua mafua ai ona e fefe e fai se tautinoga. Ua silafia e le Alii ou tauiviga, ma ua fetalai atu ia te oe e faatuatua atu ia te Ia. A o e aoao e faalagolago i le Tama Faalelagi, o le a oo mai le filemu ma le taitaiga.
O Le Gaoioiga Muamua, saunia e David Linn © IRI, faaaloaloga a le Falemataaga o Talafaasolopito a le Ekalesia
Ia Manatua Mea Nei, saunia e David Linn, e le mafai ona kopiina