Faamaoni ma le Amiosao

O le faamaoni ma le amiosao “e manaomia ai e se tagata ona fai pe tautala i le mea sao e tusa lava po o a tulaga po o a foi manatu o isi tagata,” o le saunoaga lea a Elder Christoffel Golden Jr. o le Fitugafulu i se tusiga o loo i itulau 48–49 o le lomiga o le masina lenei.

O le tusiga o loo faamatala ai e uiga i se mea na tupu i le soifuaga o Elder Joseph B. Wirthlin (1917–2008) o le Korama a Aposetolo e Toasefululua. A o avea o ia ma se tagata aoga i le kolisi, sa taalo ai Elder Wirthlin i se taaloga sue siamupini o le lakapi faaAmerika. Sa tuu atu ia te ia le polo, oso agai i luma, peitai e lua inisi (5 cm) sa le au ai i le laina sikoa. I le pito i lalo o le faaputuga o tagata taaalo, nai lo le uunaia i luma o le polo, sa ia manatuaina upu a lona tina e faapea e tatau ona ia faia i taimi uma le mea sa’o. Sa ia tuua ai le polo i le mea sa i ai.

O fautuaga nei, faapea ai ma a oe lava faataitaiga, e mafai ona fesoasoani atu ia te oe e aoao ai lau fanau e uiga i nei mataupu faavae o le talalelei.

Fautuaga mo le Aoaoina o le Autalavou

Faitau faatasi ma lau tama talavou le vaega e uiga i le faamaoni ma le amiosao i le Mo Le Malosi o le Autalavou. Talanoa i faamanuiaga o le faamaoni ma le amiosao.
Fuafua e fesili atu i lau tama talavou e fesoasoani atu e saunia se suega pupuu “O Le A Se Mea E Te Faia? mo le afiafi faaleaiga. Faaaoga le Mo le Malosi o le Autalavou e fai ma taiala ma lisi ni tulaga o le a tuuina atu ai i se tasi le avanoa e faaali ai le faamaoni ma le amiosao. Ia fai e le aiga le suega ma talanoaina ia taunuuga.
Ua saunoa faafia mai Peresitene Thomas S. Monson e uiga i le faamaoni. Sue se tasi o ana savali ma faasoa atu i lou aiga. O loo ta’ua i lalo nisi o filifiliga:

“O Le Perofeta o Iosefa Samita: Faiaoga e ala i Faataitaiga,” Liahona, Nov. 2005, 67.

“Fiafia—o le Sailiga Lautele,” Liahona, Mat. 1996, 2.

“O Le Sailiga O Le Ola Atili,” Liahona, Aok. 1988, 2.

Fautuaga mo le Aoao Atu o Tamaiti

O le amiosao e aofia ai le faamaoni ia te oe lava. Ina ia faaalia lenei mea, fuafua e fai se lesona o le afiafi faaleaiga lea e tuu ai se meaai suamalie i luma o tamaiti. Fai atu ia i latou e le mafai ona latou fetagofi i ai seiloga e fai atu e fetagofi i ai. Ona moeiini lea o ou mata pe fusi ou mata ma fesili atu, “Pe ua tatau ona outou aia le meaai suamalie i le taimi lenei, ona ua le mafai ona ou vaai atu?” Talanoa e uiga i mea amiotonu e mafai ona latou faia pe afai e le o tilotilo atu se tagata, e pei o le tatalo a le tagata lava ia. Faamanatu atu ia i latou e mafai e le Tama Faalelagi ona vaai mai i taimi uma ia i latou.
Fuafua e faaaoga ma lau tama talavou le suega puupuu na fatuina (tagai i luga), pe fatu se suega puupuu ua fetuunai mo lau fanau laiti e fesoasoani ia latou iloa ai po o le a le faamaoni po o le le faamaoni. Tuu atu ia i latou e talanoa i a latou tali. Afai e i ai uma sau fanau talavou ma tamaiti laiti ifo, fuafua e tuu atu i le fanau talavou e fesoasoani i tamaiti laiti ifo i le suega puupuu.

Ata na tusia e Taia Morley