Galue mo le Alii

Mary Jane Lumibao Suya, Filipaina

Sa ma faaipoipo ma lo’u toalua o Cyrus, i le malumalu i le aso 23 o Me, 2006. Ae ma te le’i faaipoipo, o lana galuega i se falesuesue sa manaomia ai le faigaluega o Cyrus i Aso Sa. O ona taimi faigaluega sa fai sifi, ae e masani ona faigaluega mai le vaeluapo seia oo i le 8:00 i le taeao. A manava ona alu lea i le fale e sui ona ofu faigaluega i ofu o le Aso Sa ona faasasao atu lea i le lotu, lea e amata i le 9:00 i le taeao. Sa ia faia pea lenei faiga masani seia oo ina uma ona ma faaipoipo.

O isi taimi ou te alu toatasi ai i le lotu ona sa tuai mai o ia mai le galuega. Sa ma moomoo i taimi uma, maimau pe ana faapea e le tatau ona faigaluega i le Sapati. O le Aso Sa muamua o Iuni 2006, sa fai ai le ma anapogi muamua o se ulugalii faaipoipo. Sa ma tatalo ma le faatuatua ina ia faamanuiaina Cyrus i se galuega o le a le manaomia ai ona faigaluega i Aso Sa.

O ni nai aso mulimuli ane pe tusa o le 10:00 i le taeao, sa ou faapea po o fea o i ai Cyrus aua e masani lava ona oo mai i le fale i le va o le 8:00 ma le 9:00 i le taeao. Sa faafuasei ona oo mai se manatu ia te a’u: “Atonu ua siitia lona tulaga faalegaluega.” Sa taunuu mai Cyrus i se mea o le 11:00 i le taeao. A o ulu mai o ia i totonu o le ma fale, sa ia faapea mai e i ai sa na tala fou fiafia ma se tala fou faanoanoa.

Sa ou fai atu i ai e ta’u muamua mai ia te a’u le tala fou faanoanoa. Sa ia faapea mai, e le o toe mamao ae ma tuua Iligan, Filipaina, ae ma o atu i Panay, Filipaina. O le taimi muamua, ou te le’i fiafia i le tala fou aua ua ma alolofa i tagata o le matou siteki. Sa latou agalelei ia i maua ma fai i maua e pei lava o ni o latou aiga, i le iloaina na leai ni o ma’ua aiga ma Cyrus na latalata atu.

Ina ua ou fesili atu pe aisea e tatau ai ona ma siitia atu i Panay, sa ia fai mai ona o le tala fou fiafia. Sa faatalanoa o ia e lona pule mo se isi galuega i Panay. Sa vave lava ona ou fesili atu ia te ia e le faatatau i lona totogi, ae pe mata o le a manaomia ai ona faigaluega i Aso Sa. Ina ua ia tali mai, “Leai!” Sa matuai ou fiafia lava. Sa ou fusiina o ia ma fai atu i ai o lana galuega fou o le tali lea i a ma tatalo ma le anapogi. O le lua masina mulimuli ane, na amata ai Cyrus i lana galuega i Panay.

O loo silafia e le Tama Faalelagi i tatou, ma Na te faamanuiaina i tatou pe a tatou faaaoga le faatuatua ma usitai i Ana poloaiga. Ou te faafetai mo mataupu faavae o le tatalo ma le anapogi. O le galuega a lo’u toalua o se faamanuiaga ia i ma’ua. O lea ua maua lona taimi e faalautele ai lona valaauga i totonu o le matou uarota, ma na pau lava le galuega na te faia i Aso Sa o le galuega a le Alii.