Savali a le Au Peresitene Sili
E Manaomia E Le Lalolagi Ni Paionia I Le Taimi Nei
Mo le toatele, o le savaliga a paionia o le 1847 sa le’i amataina i Navu, Katelani, Fa Uesi, po o Niu Ioka, ae sa amata mai se mea mamao i Egelani, Sikotilani, Scandinavia, po o Siamani. Sa le mafai ona malamalama atoatoa fanau laiti i le malosi o le faatuatua sa faaosofia ai o latou matua e tuua o latou aiga, uo, le saogalemu, ma le puipuiga.
Atonu e fesili se tamaitiiti laitiiti, “Tina, aisea ua tatou o ese ai mai lo tatou fale? O fea a tatou o i ai?
“Sau ia, oe le pele; tatou te o i Siona, le aai o lo tatou Atua.”
I le va o le saogalemu o le aiga ma le folafolaga o Siona na tutu ai vai matamataita ma le taufaasese o Atelana malosi. O ai e mafai ona faamatalaina le mata’u na tumu ai le loto o le tagata i na sopoaga lamatia? O le uunaia ai e musumusuga filemu a le Agaga, sa lagolagoina ai e se faatuatua faatauvaa ae tumau na Au Paia paionia na faalagolago i le Atua ma tuuvaa atu ai i la latou malaga.
Sa iu ina latou taunuu atu i Navu ae na toe sauni foi e fetaiai ma faigata i le ala. O maafaamanatu o laau manogi ma maa sa faailogaina ai tuugamau o le auala atoa mai Navu e oo atu i le Aai o Sate Leki. E faapena le tau sa totogiina e nisi o paionia. Ua tanumia o latou tino i le filemu, ae o o latou igoa e ola pea lava e faavavau.
Sa savavali tautevateva povi, o uili o taavaletoso sa ʻo’i, sa galulue malolosi pea alii totoa, sa olo tagipalau o le taua, ma sa fetagisi ia luko. Sa agai pea i luma o tatou tuaa na musuia i le faatuatua ma afatia i afa. Sa masani ona latou pepese:
O mai, o mai, outou le Au Paia;
Galulue fiafia.
E ui ina mata faigata,
O le a manuia. …
Ua Lelei! Ua Lelei!1
Sa manatua e nei paionia fetalaiga a le Alii: “E ao ina tofotofoina lo’u nuu i mea uma, ina ia latou saunia e maua le mamalu ua ia te A’u mo i latou, o le mamalu lava lea o Siona.”2
O le aluga o le taimi ua itiiti ai mea tatou te manatua ma faaitiitia ai lo tatou talisapaia o i latou o e sa savalia le ala o le tiga, ma tuua ai se ala ua faailogaina i loimata o tuugamau e leai ni igoa. Ae e faapefea luitau o aso nei? Pe ua leai ea ni auala gaoa e uia, leai ni mauga faigata e aea, leai ni vanu e sopoia, leai ni auala e tatuuina ma faailoga, leai ni vaitafe e asaina? Pe o i ai ea se manaomia moni i le taimi nei mo lena agaga paionia e taitai ese ai i tatou mai mea matautia ua taufaamata’u mai e siomia i tatou ma taitai atu ai i tatou i se Siona o le saogalemu?
I le tele o tausaga talu mai le faaiuga o le Taua Lona Lua a le Lalolagi, ua faafia ma faafia ona tuu maualalo ia tulaga faatonuina o le amio mama. Ua pe’a i luga le alu o solitulafono; o amioga lelei ua faiifo lava i lalo. O le toatele ua i ai i luga o se taavale faasee tele o faalavelave, i le sailia o le fiafiaga mo le taimi lava lea ae ua saisaitia ai le olioli o le faavavau. O lea ua tatou le maua ai le filemu.
Ua galo ia i tatou le auala sa manumalo maoae ai tagata Eleni ma tagata Roma i se lalolagi taufeai ma le auala na muta ai lena manumalo—le auala na iu ai ina faatoilaloina i latou seia oo ina faaumatiaina ona o le paie ma le faatamala. I le faaiuga, sa sili atu i lo latou mananao i le saolotoga, sa latou mananao ai i le puipuiga ma se olaga toafimalie; ma na latou maimaua uma ai—toafimalie ma le puipuiga ma le saolotoga.
Aua nei gauai atu i faatosinaga a Satani; ae, ia tutu mausali mo le upumoni. O moomooga le mafaamalieina o le loto o le a le tupu i se sailiga e le muta o le olioli i le totonugalemu o tuinanauga ma uiga leaga. O uiga leaga e le taitai atu lava i amioga mama. O le ita e le siitia ai le alofa. O le loto palaai e le maua ai se lototele. O le masalosalo e le musuia ai le faatuatua.
E faigata i ni isi ona onosaia faamatalaga taufaifai ma faalumaluma a tagata valea o e faatauemu i le legavia, faamaoni, ma le usiusitai i poloaiga a le Atua. Peitai ua loa lava ona ta’ufaatauvaaina e le lalolagi le usitaia o mataupu faavae. Ina ua faatonuina Noa e fau se vaa, sa vaai atu tagata valea i le lagi lē āuaoa ona tauemu ma taufaifai lea—seia oo ina oo mai timuga.
Pe tatau ea ona tatou aoao pea lava pea i lesona ogaoga faapea? E sui taimi, ae e tumau pea le upumoni. A le mafai ona tatou aoao mai aafiaga o aso ua mavae, ua malaia i tatou i le toe faia foi o na mea ma o latou lototiga uma, puapuaga, ma mafatiaga. Pe ua le o ia i tatou ea le poto e usitai ai ia te Ia o lē ua silafia le amataga mai le iuga—lo tatou Alii, o lē na mamanuina le ata o le faaolataga—ae le o lena gata, o lē sa inoino i lona matagofie?
Ua faamatalaina e se lomifefiloi se paionia o se “tasi e alu muamua e saunia pe tatala le ala mo isi e mulimuli atu ai.”3 Pe faamata e mafai ona tatou aofai mai le lototele ma le tumau mausali o le faamoemoega lea sa faamatalaina ai paionia o se augatupulaga na muamua atu? Pe mafai e oe ma au, i se tulaga moni lava, ona avea ma paionia?
Ou te iloa e mafai ona avea ai i tatou. Oka, e matuai manaomia lava e le lalolagi ni paionia i le taimi nei!
Aoao Atu mai Lenei Savali
Ua faamalamalama mai e tusitusiga paia e faapea o faiaoga o aiga e tatau ona “lapatai atu, faamalamalama atu, apoapoai atu, aoao atu, ma valaau atu i tagata uma ia o mai ia Keriso” (MF&F 20:59). Mafaufau e faailoa atu lapataiga ma valaaulia o loo i le savali a Peresitene Monson ia i latou e te asia. Atonu e te manao e talanoa ma i latou i ni auala e iloa ma mulimuli ai i faataitaiga amiotonu, aloese mai mea taufaasese ma aoao mai mea sese a isi. Fesili atu ia i latou e te aoaoina pe faapefea ona avea i latou ma ni paionia i aso nei.
Atonu o le a fiafia atu tamaiti e aoao e uiga i paionia e ala i le faitau i le faasologa o le I Luga o le Ala o loo i le itulau e 62 o le lomiga lenei.
Ata na tusia e Welden C. Andersen