O O’u Taumafanafana i talaane o le Malumalu
E alala le tusitala i Iuta, ISA.
Na oo mai faamanuiaga e tele a o faaaoga e lo’u aiga le taimi o le matou faigamalologa e auai atu ai i le malumalu i taumafanafana taitasi.
Ata o le Malumalu o Stockholm Suetena na pueina e Stefan Hallberg, e le mafai ona kopiina; ata pito i tua ma le si’o © Thinkstock/iStockphoto
Sa ou ola ae i Nouei. O le malumalu aupito latalata o Stockholm, Suetena, o se malaga i le taavale e 8 i le 10 itula le mamao. E mautinoa lava, o soo se malaga i le malumalu e manaomia ai ona fuafuaina ma le faaeteete ma ni talanoaga. Sa fuafua e le matou siteki ni malaga se lua i le malumalu i tausaga taitasi mo le autalavou; o nisi o uarota e togipau se pasi e o atu ai i le malumalu i se faaiuga o se vaiaso. Sa faafiafiaina le o faatasi ma isi talavou, ae o nisi taimi sa ou manao ai ma le matou aiga matou te o faatasi i le malumalu.
O se tasi la tausaga sa tonu ai matou te o atu i Stockholm i le taimi o le matou malologa i le taumafanafana. Sa avea o se aafiaga maoae, ma sa le’i umi ae avea ma se mamanu mo a matou taumafanafana. Matou te tolauapi i se nofoaga mo tolauapiga e lata i le malumalu. O taeao taitasi matou te fealapo ai mo se sauniga papatisoga faatasi ma isi aiga mai Nouei o e foi sa o mai i le malumalu. A uma lena ona matou taaalo soka lea ma o e taeele i le lotoa o tolauapiga.
O nei taumafanafana o ni taimi paia ia te a’u. E ui ina matou te le’i nonofo latalata i le malumalu e o atu ai iina i masina taitasi, ae sa avea o se taimi faapitoa i taimi uma e mafai ai ona matou o. Ma e ui foi o le tietie i le taavale sa umi ma ‘iva, ae sa faamanuiaina i matou e le Alii mo le matou ositaulaga. O aafiaga faaleagaga sa ou maua i le malumalu sa fesoasoani e atiae ai lo’u fiafia i le malumalu ma ona sauniga. Sa faapea foi ona matou atili vavalalata ai o se aiga.
O se aafiaga faapitoa ou te manatua, sa tupu i le taimi sa fai ai foi si o’u faalogogata. Sa foliga mai e pei sa mafai ona ou vaai i le anoano o faaletonu o o’u matua, ma sa ou lagonaina e pei sa leai se la aiā e fautua mai ai i le auala e tatau ona ou ola ai i lo’u olaga. E ui ina sa ou ola agavaa e alu i le malumalu, ae sa ou fesiligia le matafaioi a lo’u tamā o se ulu o le matou aiga. Ae ina ua matou o atu faatasi i le malumalu e fai papatisoga ma faamauga, sa ou lagonaina le i ai o se agaga matagofie. A o tuu e lo’u tama ona lima i luga o lo’u ulu e faamau au e fai ma sui o tagata o e ua maliliu, sa ou lagonaina le faamautu mai e le Agaga ia te a’u e faapea, sa galue o ia e ala i le pule moni o le perisitua. O lenei mea na ou iloa ai, e ui ina sa le atoatoa lo’u tamā, ae o ia o se tamā lelei ma sa faamanuiaina a’u e avea ma ona atalii. Sa ou lagonaina e tatau ona ou salamo i lo’u faalogogata, ae taumafai ia iloa le poto ma le alofa o ana apoapoaiga.
O nei tausaga e tele mulimuli ane, o na taumafanafana i talaane o le malumalu e tumau pea le susulu i lo’u mafaufau. O le malumalu ua avea ma se tasi o nofoaga e matuai matagofie i le lalolagi, e pei ona sa i ai le Vai o Mamona i le nuu o Alema: “Sa matua matagofie i latou i le vaai a i latou o e na o atu i le malamalama o lo latou Togiola” (Mosaea 18:30).