Mana i Feagaiga
O se feagaiga o se folafolaga, ma o se mea foi e tele naua isi mea e aofia ai.
A e faalogo i le upu feagaiga, o le a se mea e oo atu i lou mafaufau? Afai e te fai mai, “O se folafolaga e ala lua faatasi ma le Atua,” o le a e sa’o.
Ae o se feagaiga ma lo tatou Tama Faalelagi e faapea foi ona sili atu ni mea e aofia ai. I lena folafolaga paia, e i ai le mana, malosiaga, saogalemu, ma le filemu. A faaavanoa lou taimi e te mafaufau ai e uiga i feagaiga ua e faia ma o le a e faia i lou olaga, ma pe a e tausia lau vaega, e amata ona ese lava ou lagona ma le tulaga e te ola ai. O feagaiga e faatosina ai le auala e te galue ai ma musuia ai oe i au filifiliga.
O ni faataitaiga nei o le ala ua faia ai e feagaiga se eseesega i olaga o nisi o le autalavou.
“O se feagaiga e faatumau ai oe i le ala sa’o ma le vaapiapi, e fesoasoani e te ola ai i se olaga sili atu, ma tuuina atu ia te oe se malamalamaaga sili atu.
Marcus A., 17 tausaga, Iuta, ISA
“O le mea moni e faapea ua uma ona ma osifeagaiga ma le Tama Faalelagi, ua tuuina mai ai ni avanoa ou te tuputupu a’e ai faaleagaga, ma ia avea ma se tagata o le ekalesia e sili atu le faamaoni. O taimi uma lava o le a ou faia ai se mea, ou te mafaufau i feagaiga ua ou faia ma lo tatou Tama Faalelagi ma fesili ifo ia te a’u lava, pe o o’u tausia ia folafolaga sa faia ma Ia ina ua ou papatiso ma ina ua ou maua le perisitua. O feagaiga sa ou osia ma lo tatou Tama Faalelagi e fesoasoani ou te tumau malosi ai i le talalelei ma foi atu ai ia te Ia i se aso.”
Efraín V., 14 tausaga, Niu Sila
“Ou te manatua le aso na ou papatiso ai—o se taimi sili lea ona ou lagonaina ai le fiafia ona o la’u feagaiga muamua lena. O le isi mea na sosoo ai o le taimi na ou maua ai le perisitua. Sa tutusa lava le fiafia na ou maua. Sa telē se ataata sa vaaia i o’u foliga ina ua ou iloaina na ou faia se feagaiga ma le Atua. Pe a ou faalogo i tamaiti o ula i le Ekalesia, ou te manatua le fiafia ma ou te manatua o se feagaiga ma le Atua ae le ma tagata.”
Bradford A., 16 tausaga, Arisona, ISA
“O le osia o feagaiga e aumai ai ia i tatou ma o tatou aiga le tele o faamanuiaga. Mo se faataitaiga, o le papatisoina e aumai ai ia i tatou le gafatia e sui ai, ia avea ma se tagata lelei atu. O feagaiga tatou te faia ma lo tatou Tama Faalelagi, e fausia ai le faatuatua tatou te manaomia e tumau faamaoni ai i le talalelei.”
Naomi A., 15, Guadalajara, Mekisiko
“O le taumafanafana na te’a atu nei, sa masani ona ou alu ai i le malumalu e fai papatisoga mo e ua maliliu. O le tausia o a’u feagaiga e ala i le alu i le malumalu ma le faia o le mea sa’o, sa faamanuiaina ai a’u. Sa matuai o’u popolevale lava i suega faaiu. Sa ou alu i le malumalu, ma sa lelei ai mea uma. O le tausia o a’u feagaiga e matuai faigofie ma matuai fiafia ai le olaga.”
McKenna M., 18 tausaga, Kalefonia, ISA
“O lo’u aso muamua o se tiakono e tufaina le faamanatuga, sa matuai o’u atuatuvale ai lava. Ona ou manatua ai lea o le aso na ou papatiso ai, ma sa ou lagonaina le Agaga Paia. Sa otometi lava ona ou lagonaina le toafilemu ma sa mafai ona faia lelei ai.”
Seth A., 12 tausaga, Aai o Mekisiko, Mekisiko
“Ua ou maua le tele o faamanuiaga mai le tausia o a’u feagaiga. Ona o a’u feagaiga o le papatisoga, ua fesoasoani mai ai le Agaga Paia e fai [a’u] faaiuga. O le feagaiga pe a e maua le perisitua o se tautinoga e faaaoga le perisitua e fesoasoani ai i isi ma auauna atu ai. E fesoasoani i lau molimau ia tuputupu a’e a o e auauna atu.”
Erik N., 15 tausaga, Alberta, Kanata
E le faapea e te faia soo se mea e te manao i ai ma faamoemoe o le a tausisia e le Atua ia Lana itu o le folafolaga. Na te faamoemoe mai ni mea se tele mai ia te oe ona ua Ia silafia le gafatia o loo ia te oe. E taofia moni ai a’u i se tulaga maualuga atu.”
Jolee H., 15 tausaga, Colorado, ISA
Lesona i Aso Sa
O Le Autu o le Masina Lenei: O Sauniga ma Feagaiga
Mai le agavale: ata na tusia e Christina Smith ma Craig Dimond © IRI; faamatalaga mai le Keriso o Loo Valaauina Peteru ma Anetelea, saunia e Harry Anderson © IRI