Fo’i Mai ma le Mamalu
O le tusitala e alala i Niu Ioka, ISA.
Ou te le’i manao e avea ma se gaoi, e tusa lava pe o se mea e tupu faafuasei.
Ata na tusia e Greg Newbold
Ina ua uma a’u vasega ina o le a oo i le afiafi, sa ou afe ai i se tamai faleoloa o ni oloa tuai ae ou te le’i alu i le fale—o se feau sa ou manao e faauma e ui lava i le mamafa o le maligi o timuga. Sa na o a’u le tagata sa i totonu o le faleoloa, ma o le tamaitai sa faigaluega iina sa fesoasoani mai ia te a’u i le molī sa ou manao e faatau.
A o ia tatalaina se ato e tuu ai faatauga, sa ou matauina ni taulima lanu sesega sa i luga o le fata. Sa ou aapa atu mo le taulima e tasi, a o ia tuuina le molī i totonu o le ato. Sa manatu māmā o ia i mea sa faaalia, ma pe a ma le afa o taulima na toulu i le fola. Sa fai si ona faalefiafia ae sa faauma lava le tāina o la’u faatau. Sa ou tuua le faleoloa, faamalu i le isi lima, ma le ato sa i ai i totonu le molī i le isi lima.
Sa ou savali i le fale, aveese o’u seevae pa’u susū, ma tātā ni musika. A o o’u aveina ifo i fafo le molī, sa ou vaaia ai se mea i le pito i lalo o le ato. O se taulima lanumumu. E masalo sa pa’ū mai le mea sa tautau ai ma palasi i totonu o la’u ato. Sa ou ataata, ma mafaufau i le foliga mai o lea taimi sa amata ai ona tuufaatasia se tala mai le tusi lesona a Tamaitai Talavou: “Ona mafaufau lea o Valelia i le lesona na faatoa uma ona latou faia i le vasega o le Lora.”
Na tilotilo atu Peni i fafo o le faamalama. Sa ou togiina le taulima i luga o lo’u moega ma sulu la’u molī. Sa oo mai ai se susulu mafanafana i le aoauli puaoa. Sa ou tilotilo atu i fafo o le faamalama. Sa atili ona mamafa timuga, ae o le kiona sa i luga o le eleele sa liu vaivai palapalā.
Sa ou tilotilo atu i le taulima. Sa lanumumu e pei o le sieli (cherry). Sa ou faamauluina i lo’u tapulima. Sa tautau mai ai lona tau e—$20. Ioe o le a ou toe faafoiina. Ou te le’i mafaufau lava faapea e le toe faafoia. Sa ou toe tatalaina ma tuu i le pito i luga o se faaputuga tusi sa ou fuafua lava e teu ese. Sa ou toe savali atu i totonu o le isi potu e fai sa’u ipu koko vevela.
Ona ou toe savali mai ai lea i totonu.
O le a foi le umi sa ou tolopoina ai le teuina o na tusi? Na fai sina umi. O le a le umi o le a i ai lena taulima iina pe afai ou te tolopoina le toe faafoiina atu?
O lo’u faamoemoega ia toe faafoiina atu. Ae o afea la? Pe o le a ou faatali umi ea lea o le a ou lagona ai le le mautonu i le faafoiina atu? Mata o le a galo ia te a’u?
Sa ou toe faatalitali teisi. Sa ou toe tilotilo atu i fafo o le faamalama. Sa ou mafaufau i le faatoa mafanafana ai o o’u vae. Sa ou mafaufau i la’u ipu koko vevela manaia.
Ona ou uu maia lea o le taulima, toe faamaulu o’u seevaepa’u, ma ou toe alu atu i fafo.
Ina ua ou taunuu atu i le faleoloa, o loo fesoasoani le tamaitai i se isi tagata. Sa ou tutu ma faatalitali. Ina ua uma, sa ou aveifo i fafo le taulima mai le taga o lo’u pulupulu, ma faamatala atu i ai le auala na oo mai ai iina. Sa foliga e pei na te’i o ia, ma sina nenefu, ma fai mai faafetai, ona pau ai lava lea. Na te le’i ofoina mai mo a’u se taui mo lo’u faamaoni. Sa le’i tele foi ni ana upu i lana faafetai. Ma sa leai se isi tagata iina e vaai i ai.
A o o’u savali atu i le fale, sa ou mafaufau lava e uiga i taimi uma ou te manatu ai lava ia te au o se tagata faamaoni. O se uiga faaalia ou te faatauaina ma sueina i isi. Ae o le faamaoni moni, e pei o le alofa moni ma le alofa mama moni, o se uiga ola. Po o a lava o’u faamoemoega faamamaluina ma le moni, na pau le taimi na avea ai a’u ma se tagata faamaoni o le taimi lea na ou toe faamāuluina ai na seevaepa’u ma faatino loa lo’u faamoemoega.
Sa ou lagonaina lo’u tapulima e leai se mea na pipii ai i totonu o lo’u pulupulu ma sa ou ataata lemu.