Ang Wali sa luyo sa Pulpito

Jeff Fullmer, Idaho, USA

Samtang ang akong pamilya naglingkod mga pipila ka laray sa luyo sa mga deacon sa sakrament miting, ang ako lang gyud nga gihunahuna sa wala pa ang pangbukas nga himno mao ang wala matarung nga pagkakurbata ug pagsuksuk sa nangunot nga polo sa usa sa mga deacon. Naghunahuna ko nga kinahanglang adunay motabang niya. Importante, nga kon mopasa sa sakrament, ang mga deacon kinahanglang nagsunod sa ehemplo sa Manluluwas sa lihok ug sininaan.

Ang miting nagpadayon, ug ako nakalimot na niya. Human mapaambit sa mga deacon ang sakrament, gisugdan ang pakigpulong. Ang ikaduha nga mamumulong mao ang inahan sa batan-ong lalaki. Siya namulong kabahin sa iyang pagkakabig, sa iyang mga pagsulay samtang nagtubo, ug sa iyang mga panlimbasug isip single nga inahan. Nindot kaayo ang iyang pakigpulong nga nakapahilak kini niya. Siya milingkod ug nagpadayon sa paghilak samtang ang choir sa ward nagpundok aron mokanta.

Diha-diha dayon ang iyang anak nga lalaki, uban sa naghibat nga pagkakurbata ug wala masuksuk nga polo, mibarug ug milakaw padulong sa pulpito. Iyang gigakos iyang inahan ug milingkod tupad niya aron sa paghupay kaniya. Nakahilak ko samtang nagtan-aw sa eksena; natandog ko og maayo. Dayon aduna koy naamguhan, ug miduko ko tungod sa kaulaw. Naglingkod nga nagsul-ob uban sa maayong pagkaplantsa nga amerikana, uban sa maayong pagkakurbata ug sinaw nga mga sapatos, nakaamgo ko nga adunay kulang sa akong pagpangandam sa sakrament.

Ang batan-ong lalaki ug ang iyang inahan nanaug gikan sa atubangan ug tupad nga naglingkod sa dihang ang choir misugod sa pagkanta. Naglingkod ko didto, wala makatarung sa pagpaminaw sa musika tungod kay ang wali nga gitudlo niini nga deacon mipuno sa akong kasingkasing uban sa mensahe sa Kristohanong gugma.

Iyang gihimo iyang buhat uban sa kalumo ug pag-amuma. Walay gamay nga timailhan sa kaulaw sa iyang batan-ong nawong—tiunay nga gugma lang. Ang sunod-sunod nga mga mensahe diha sa pulpito niadtong adlawa maayo, apan kanunay nakong mahinumdom ang wali sa luyo sa pulpito.

Uban sa naghibat nga pagkakurbata ug pagkasuksuk nga polo, mibarug ug milakaw siya padulong sa pulpito. Iyang gigakos iyang inahan ug milingkod tapad niya aron sa paghupay kaniya.