Namulong Karong Adlawa

Si Elder Perry Misulti sa Migradwar sa Unibersidad sa Pagbalanse sa Kinabuhi

Si Elder L. Tom Perry sa Korum sa Napulog Duha ka mga Apostoles namulong sa gradwasyon sa Brigham Young University didto sa Provo, Utah, USA, niadtong Abril 2013. Naghisgot siya sa panginahanglan sa pagbalanse sa kinabuhi ug mipasabut sa panginahanglan sa paghatag og panahon sa pamilya, panahon sa trabaho, panahon sa pagtuon, panahon sa pagserbisyo, panahon sa kaugalingon, ug ilabi na panahon sa ebanghelyo ni Jesukristo.

Iyang gitambagan ang mga migradwar sa pagdaginot. “Usa sa labing importante nga mga leksyon nga inyong makat-unan mao ang seguridad ug kalinaw nga moabut sa pagpakabuhi sumala sa inyong kinitaan,” miingon siya.

Gihatagan usab niya og gibug-aton ang kaimportante sa pag-establisar og panimalay nga nagsentro ni Kristo. “Pag-ampo ug pagtuon sa kasulatan kada adlaw kinahanglang kabahin sa panimalay sa Santos sa Ulahing mga Adlaw,” miingon siya. “Himoa ang ebanghelyo ni Jesukristo nga importante, aktibo nga bahin sa inyong kinabuhi.”

Si Elder Nelson Mibisita sa Asia North Area

Gikan sa Pebrero 23 ngadto sa Marso 3, 2013, si Elder Russell M. Nelson sa Korum sa Napulog Duha ka mga Apostoles mibisita sa Asia North Area. Miingon si Elder Nelson nga bisan asa siya moadto sa kalibutan, ang iyang mensahe mao ra. “Ania kami sa pagtudlo ug pagpamatuod ni Ginoong Jesukristo ug sa Iyang ebanghelyo nga gipahiuli,” iyang giingnan ang mga miyembro sa maong dapit. “Ang among mensahe kabahin sa kalinaw ug kalipay, sa pagpalig-on sa mga pamilya, pagkasuod sa bana ug asawa, mga anak ngadto sa ilang mga ginikanan, ug ang mga tawo ngadto sa ilang mga katigulangan … aron silang tanan makaangkon og kinabuhing dayon sa presensya sa Dios kon mahuman na ang ilang pagpuyo dinhi sa yuta.”

Dugang sa miting sa mga lider sa priesthood ug mga miyembro sa tibuok dapit ug sa espesyal nga district alang sa kasundalohan sa Okinawa, si Elder Nelson nakigkita usab sa duha ka lokal nga mga opisyal sa gobyerno sa Japan.

Gililtratohan ni Jeffrey D. Allred