Mensahe sa Visiting Teaching

Pagpaningkamot sa Kaugalingon

Tun-i kini nga materyal sa mainampuon nga paagi ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi. Alang sa dugang nga impormasyon, adto sa reliefsociety.lds.org.

Hugot nga Pagtuo, Pamilya, Kahupayan

Ang pagpaningkamot sa kaugalingon mao ang abilidad, pasalig, ug paningkamot sa pagsangkap alang sa espiritwal ug temporal nga kaayohan sa kaugalingon ug sa atong mga pamilya.¹

Samtang kita nagkat-on ug naggamit sa mga baruganan sa pagpaningkamot sa kaugalingon diha sa atong mga panimalay ug mga komunidad, kita adunay mga oportunidad sa pag-atiman sa kabus ug timawa ug sa pagtabang sa uban nga mahimong mapaningkamuton sa kaugalingon aron sila makalahutay panahon sa kalisdanan.

Kita adunay pribilehiyo ug katungdanan sa paggamit sa atong kabubut-on aron mahimong mapaningkamuton sa kaugalingon sa espiritwal ug temporal nga paagi. Namulong kabahin sa espiritwal nga mapaningkamuton sa kaugalingon ug sa atong pagsalig sa Langitnong Amahan, si Elder Robert D. Hales sa Korum sa Napulog Duha ka mga Apostoles mitudlo: “Makabig kita ug espirituhanong makabarug sa kaugalingon kon mainampoon kitang magsunod sa atong mga pakigsaad—pinaagi sa takus nga pag-ambit sa sakrament, takus sa rekomend sa templo, ug pagsakripisyo aron moserbisyo sa uban.”²

Si Elder Hales mitambag kanato nga magmapaningkamuton sa kaugalingon sa temporal nga paagi, “nga naglakip sa dugang nga edukasyon o pagkat-on og bokasyonal o panarbaho, ug paggasto sa unsay kinitaan. Sa paglikay sa utang ug sa pagtigom karon, maandam unya kita sa full-time nga pagserbisyo sa Simbahan. Ang tuyo sa temporal ug espirituhanon nga pagbarug sa kaugalingon mao ang paglig-on sa atong kaugalingon aron makatabang kita sa uban nga nanginahanglan.”³

Gikan sa mga Kasulatan

Mateo 25:1–13; 1 Timoteo 5:8; Alma 34:27–28; Doktrina ug mga Pakigsaad 44:6; 58:26–29; 88:118

Gikan sa Atong Kasaysayan

Sa dihang ang mga Santos sa Ulahing mga Adlaw nagpundok sa Walog sa Salt Lake, usa ka hilit nga disyerto, gusto ni Presidente Brigham Young nga sila molambo ug mohimo og permanenteng mga balay. Kini nagpasabut nga ang mga Santos kinahanglang magkat-on og mga kahanas nga makapahimo kanila nga makabarug sa kaugalingon. Niini nga paningkamot, si Presidente Young adunay dakong pagsalig sa mga kapasidad, talento, kamatinud-anon, ug kaandam sa mga babaye, ug miawhag siya kanila sa piho nga mga katungdanan sa temporal. Samtang ang piho nga buluhaton sa Relief Society sister managlahi karon, ang mga baruganan nagpabiling makanunayon:

1. Pagkat-on nga maganahan sa pagtrabaho ug likayi ang katapulan.

2. Pagbaton og diwa sa kaugalingong pagsakripisyo.

3. Pagdawat sa personal nga responsibilidad alang sa espiritwal nga kalig-on, panglawas, edukasyon, panarbaho, panalapi, pagkaon, ug uban pang makapatunhay sa kinabuhi nga mga kinahanglanon.

4. Pag-ampo alang sa hugot nga pagtuo ug kaisug sa pagsagubang sa mga hagit.

5. Paglig-on sa uban nga nanginahanglan og tabang.⁴

Mubo nga mga sulat

1. Tan-awa sa Handbook 2: Administering the Church (2010), 6.1.1.

2. Robert D. Hales, “Pag-ila sa Kaugalingon: Ang Sakrament, ang Templo, ug Sakripisyo sa Pagserbisyo,” Liahona, Mayo 2012, 34.

3. Robert D. Hales, “Pag-ila sa Kaugalingon,” 36.

4. Tan-awa sa Anak nga mga Babaye sa Akong Gingharian: Ang Kasaysayan ug Buhat sa Relief Society (2011), 62.

Unsa Ang Akong Mahimo?

1. Unsaon man nako sa pagtabang sa mga sister nga akong giamuma sa pagpangita og mga solusyon sa ilang temporal ug espiritwal nga mga panginahanglan?

2. Napalambo ba nako ang akong espiritwal nga mapaningkamuton sa kaugalingon pinaagi sa pag-andam alang sa sakrament ug sa pagsakripisyo aron makaserbisyo?

Paghulagway sa litrato pinaagi ni Robert Casey © 2005