Ang Priesthood Kinahanglang Gamiton sa Takus nga Paagi

Ang Langitnong Amahan naghatag og bahin sa Iyang gahum ug awtoridad ngadto sa takus nga mga miyembro nga lalaki sa Simbahan. Kining gidelegar nga awtoridad gitawag og priesthood. Kadtong nanaghupot sa priesthood gitugutan sa paglihok sa ngalan sa Ginoo sa pagdumala sa Iyang Simbahan, pagtudlo sa ebanghelyo, pagpanalangin sa masakiton, ug pagpahigayon sa sagradong mga ordinansa nga gikinahanglan sa kaluwasan.

Ang priesthood kinahanglang gamiton sa takus nga paagi tungod kay, sama sa gipadayag sa Ginoo ngadto kang Joseph Smith, “ang katungod sa pagkapari dili mabulag gikan sa mga gahum sa langit, ug … ang mga gahum sa langit dili madumala ni madala gawas lamang diha sa mga baruganan sa pagkamatarung” (D&P 121: 36). Busa, dunay kalainan tali sa awtoridad ug gahum sa priesthood. “Ang awtoridad sa priesthood, nga mao ang pagtugot sa paglihok diha sa ngalan sa Dios, … ihatag pinaagi sa pagpandong sa mga kamot. Ang gahum sa priesthood moabut lang kon kadtong naggamit niini takus ug naglihok subay sa kabubut-on sa Dios.”¹

Tungod ang priesthood mao ang gahum sa Dios, Siya mihimo sa mga sumbanan sa katakus alang sa paggamit niini ug mipadayag niadtong mga sumbanan ngadto sa Iyang mga propeta ug apostoles. Ang mga naghupot sa priesthood mahimong takus pinaagi sa paghinulsol sa ilang mga sala ug sa pagpakabuhi sumala sa ebanghelyo ug sa mga sugo ni Jesukristo. Ang pagpakig-uban sa Espiritu Santo sa ilang kinabuhi makatabang kanila nga masayud sa ilang katakus.

Ang mga naghupot sa priesthood makaangkon og gahum sa priesthood pinaagi sa hugot nga pagtuo ug pagkamasulundon:

Pagtratar sa inyong asawa, mga anak, ug sa uban sa mabinationg paagi.
Pag-ambit sa sakrament sa takus nga paagi.
Pagsimba diha sa templo.
Pagserbisyo nga matinud-anon sa inyong calling.
Paggamit sa priesthood kon tawagon.

Panalipdi ug Pagpakabuhi nga Takus sa Priesthood

“Ang atong kinaiya diha sa publiko kinahanglang nindot gyud kaayo. Ang atong kinaiya sa pribado mas importante. Kinahanglang nahiuyon kini sa mga sumbanan nga gihan-ay sa Ginoo. Dili kita mahigam sa pagpakasala, ni mosulay sa pagtabon sa atong mga sala. Dili kita magtagbaw sa atong garbo. Dili kita moambit sa walay kapuslanan nga pangandoy. Dili kita mogamit og gahum, o kamandoan, o pagpamugos sa atong mga asawa o mga anak, o sa bisan unsa nga matang nga dili matarung.

“Kon mobuhat kita sa bisan hain niining mga butanga, ang gahum sa langit mobiya. Ang Espiritu sa Ginoo maguol. Mawala ang hiyas sa priesthood. Ang awtoridad niini mawala. …

“… [Ang priesthood] nagsilbi isip giya sa pagpakabuhi. Sa kahingpitan niini, ang awtoridad niini molapas sa kamatayon ngadto sa kahangturan nga anaa sa unahan.

“Walay bisan unsang butang sa kalibutan ang makakompara niini. Panalipdi kini, amumaha kini, higugmaa kini, pagpakabuhi nga takus niini.”

Presidente Gordon B. Hinckley (1910–2008), “Personal Worthiness to Exercise the Priesthood,” Liahona, Hulyo 2002, 58, 61.