Ang Batan-ong mga Lalaki Karon Nagkinahanglan og Matarung nga mga Ehemplo
Ang matarung nga mga ehemplo makapanalangin sa mga batan-on atol sa mahinungdanon nga panahon sa ilang kinabuhi.
Panahon sa high school, si Todd Sylvester adunay duha ka tumong: mahimong maayo sa basketball ug mailhan nga pinakasikat nga tig-party sa eskwelahan.
Sa edad nga 14, si Todd nagsugod sa pag-inom ug paggamit og drugas. Dili pa siya miyembro sa Simbahan, ug wala siya tudloi sa iyang mga ginikanan, sama sa iyang paghulagway niini nga, “buhata kini o ayaw kini buhata” kabahin sa iyang batasan. Sa mga katuigan, ang iyang pagkaadik sa drugas ug pagkapalahubog migun-ob sa iyang nindot nga career sa basketball ug nakapahunahuna niya nga maghikog.
Makaguol, ang mga elemento sa istorya ni Todd makita usab sa kinabuhi sa daghang batan-ong mga lalaki karon, bisan mga miyembro sa Simbahan. Apan, adunay usa ka butang nga aduna ang batan-ong mga lalaki sa Simbahan nga wala si Todd: matarung nga mga ehemplo. Ang hamtong nga mga lider sa Simbahan mahimong dakong panalangin sa mga batan-on atol sa mahinungdanon nga panahon sa ilang kinabuhi. Tungod sa iyang nasinati, si Todd, kinsa namiyembro sa Simbahan sa edad nga 22, karon naningkamot nga mahimong positibong ehemplo sa mga batan-on sa iyang ward.
Ang kausaban ni Brother Sylvester nahitabo, atol sa iyang labing lisud nga panahon, siya yanong nag-ampo: “Dios, nagkinahanglan ko og tabang.” Usa ug tunga sa bulan ang milabay, usa ka dugay nang higala, kinsa miyembro sa Simbahan, mitawag niya ug miingon, “Todd, nadasig ko sa pagsulti nimo nga nagkinahanglan mi nimo. … Makatabang ka og daghang mga tawo, ilabi na sa mga batan-on ug mga bata.”
Mga pipila ka tuig ang milabay, human sa iyang bunyag ug sa iyang kaminyoon diha sa templo, si Brother Sylvester gitawag sa pagserbisyo diha sa Young Men—usa ka calling nga nakapahimo niya sa pagserbisyo og 14 ka tuig sa batan-ong mga lalaki.
Gigamit ang iyang kaagi sa pagdasig sa batan-ong mga lalaki nga iyang giserbisyohan, si Brother Sylvester nakakaplag og paagi nga makasabut sa mga panlimbasug nga nasinati sa mga batan-on. “Sa akong hunahuna kadaghanan sa mga batan-on mahadlok hisgutan ang ilang mga panlimbasug,” miingon siya. “Apan akong gipakigbahin ang akong istorya niining mga batan-on matag tuig. Tingali tungod niana, sila mibati nga komportabling moduol nako nga moingon, ‘Nanlimbasug ko sa pornograpiya o pagkapalahubog o naghunahuna nga maghikog.’” Si Brother Sylvester makasuporta kanila samtang sila maghinulsol, nga naglakip sa pagduol sa bishop.
Ang mga lider nga maminaw ug makahatag og mahigugmaong feedback ngadto sa mga batan-on atol sa mahinungdanon nga mga panahon makamugna og epektibong koneksyon nga makatabang sa paghulma sa pagkatawo sa mga batan-on. Si Mat Duerden, luyo-luyong propesor sa Brigham Young University kinsa nakadawat og PhD sa youth development, miingon, “Ang pagkabatan-on mao [ang panahon nga ang mga indibidwal] momugna sa ilang pagkatawo: mga mithi, pagtuo, tahas, ubp. Kini ang proseso sa pagsuta. Kabahin niining proseso mao ang pagkuha og feedback gikan sa mga kaedad o mga ginikanan o sa ubang mga hamtong, ug mahimo kining epektibo kon kini gikan sa tinahud ug gimanggad nga hamtong.”
Si Brother Duerden mipadayon, “Ang labing epektibo nga tahas sa pagtudlo natukod diha sa komon nga pagtahud sa usag usa ug sa pagbati sa mga batan-on nga adunay usa ka tawo nga tinuod nga nabalaka kanila dili igsapayan kon unsa siya magsinina o manulti.”
“Kadaghanan sa mga lalaki nangandoy nga masuod sa ilang papa,” miingon si Brother Sylvester. “Kon wala sila niini, ang sunod nga ilang maayong buhaton mao ang pagpangita og hamtong nga lalaki nga ilang makaistorya, makapagawas sa ilang mga ideya, ug dili hukman, kataw-an, o sawayon tungod sa ilang mga problema. Wala ko diha aron pulihan ilang papa, apan ganahan kong maanaa para nila aron sila makasulti kanako sa tinarung nga paagi.”
Samtang ang mga lider sa Simbahan adunay mahinungdanong tahas nga motabang sa pagtudlo sa usa ka batan-on, ang mga propeta ug apostoles miingon nga ang nag-una nga ehemplo para sa mga kabatan-onan mao ang ilang ginikanan. Sama pananglit, si Elder M. Russell Ballard sa Korum sa Napulog Duha ka mga Apostoles miingon: “Mga amahan, kamo ang nag-una nga sumbanan sa pagkalalaki alang sa inyong mga anak nga lalaki. Kamo ang ilang labing makahuluganong tigmatuto, ug motuo kamo ug sa dili, kamo ang ilang bayani sa dili maihap nga paagi. Ang inyong mga pulong ug ang inyong ehemplo dako og impluwensya nganha kanila” (“Mga Amahan ug mga Anak nga Lalaki: Usa ka Talagsaon nga Relasyon,” Liahona, Nob. 2009, 47).
Walay lig-ong relasyon nga namugna ni Brother Sylvester uban sa batan-ong mga lalaki nga nahitabo diha-diha dayon; iyang giamuma kadto nga relasyon sa daghang tuig sa pagserbisyo. Sa 20 ka batan-ong mga lalaki nga iyang gitudloan, 17 ang nag-misyon. Mga 5 kanila walay intensyon nga mag-misyon sa wala pa nila makaistorya si Brother Sylvester.
“Ang rason nganong nagmalampuson ko niining batan-ong mga lalaki kay sila nasayud nga gihigugma gyud nako sila,” miingon si Brother Sylvester. “Sila nasayud niini—dili kay gisulti nako apan akong gibuhat. Nag-focus gyud ko nga sila adunay relasyon uban sa ilang Manluluwas. Mibati ko nga kini ang yawe aron ilang mabuntog ang tanan ug magpadayon sa kinabuhi ug magmalampuson.”
Pinaagi sa pagtabang sa batan-ong mga lalaki nga makapalambo og relasyon sa Manluluwas, si Brother Sylvester naglaum nga ang ilang pagpamatuod mogiya kanila nga mag-misyon, maminyo diha sa templo, ug mag-amuma og matarung nga pamilya. “Kana mao ang plano sa kalipay,” siya miingon. “Mao nga ang [pagtabang sa mga batan-on] importante kaayo.”
Mga paghulagway sa litrato pinaagi ni Welden C. Andersen