Mahimong Kahayag sa Inyong mga Higala
Nagtubo ako uban sa sama nga mga higala sa unang 12 ka tuig sa akong kinabuhi. Managsilingan kami. Pareho ang among gieskwelahan ug mitambong sa salo-salo sa adlawng natawhan sa usag usa. Usahay mokaon ko sa ilang balay, sila moadto sa amoa, ug lingaw kaayo mi. Apan sa dihang nahimo na kaming mga tin-edyer, nagsugod na sa pagkausab. Dili sila mga miyembro sa Simbahan, ug mamalikas, manigarilyo, ug moinom og makahubog. Lahi kaayo ang ilang pagtan-aw sa balaod sa kaputli kay kanako.
Gihunahuna nako pag-ayo ang problema, ug dayon nakigsulti ko sa akong papa kon unsay buhaton. Miingon siya, “Kinahanglan kang mohukom. Kining maayong mga higala lahi kay kanimo. Dili ka makasulti sa una, apan karon adunay dako kaayo nga kalainan.”
Misalig ko sa tambag sa akong papa. Ang akong mga higala nasayud nga ako miyembro sa Simbahan, busa kon ako mohukom nga dili kanunay moadto bisan asa, sila makasabut.Sa wala madugay, dili na kaayo kami magkapundok bisan kami managhigala pa gihapon.
Usa kadto ka pagsulay alang nako nga mobiya sa akong mga higala, apan nasayud ko nga importante ang pagsunod sa mga baruganan sa ebanghelyo sa akong kinabuhi. Naghunahuna ko sa tambag ni Alma ngadto sa iyang mga anak nga lalaki sa dihang siya mitudlo kanila sa pagbaton og hugot nga pagtuo sa Dios. Miingon siya “Kinsa ang mobutang sa ilang pagsalig diha sa Dios pagabuligan sa ilang mga pagsulay” (Alma 36: 3).
Usa sa mga butang nga nakatabang nako nga makasugakod niining malisud nga panahon mao ang pagtambong matag semana sa mga kalihokan sa Simbahan, lakip sa Mutual. Miapil usab ako sa sayaw, mga sport, ug mga komperensya sa kabatan-onan.
Nakaamigo ko og dili miyembro sa Simbahan, ug usahay imbitaron ko niya sa pag-adto sa mga party. Kini nga mga party gihimo sa samang adlaw sa Mutual, busa giingnan nako siya, “pasayloa ko. Gusto kong moadto, apan duna koy laing mga plano.”
Nangutana siya kon unsay akong buhaton. Giingnan nako siya, “Moadto ko sa Mutual.”
“Unsa ang Mutual?” Nangutana siya.
Gipasabut nako nga kami adunay makalingaw nga mga kalihokan sa Mutual ug nga ako nagserbisyo isip magtatambag sa kapangulohan. Human ako mibalibad katulo sa iyang mga party, siya miingon, “Imbitara ko sa Mutual.”
Mao nga mikuyog siya nako, gitudloan siya sa mga misyonaryo, ug siya nabunyagan.
Moimbitar ako ninyo sa paghimog desisyon karon aron kamo mahimong kahayag sa inyong mga higala. Usa ka butang nga inyong mahimo mao ang pagtambong sa seminary. Ang inyong mga magtutudlo sa seminary mibuhat sa ilang mahimo; naningkamot pag-ayo sa pag-andam sa mga leksyon alang ninyo. Ang seminary mahimong panalangin ninyo kon kamo mobuhat sa inyong bahin: mobasa sa mga buluhaton, mag-ampo ug magpuasa, modawat sa mga pagtulun-an. Ang pagkat-on mahitabo kon ang duha ka habig mobuhat unsay ilang angay nga buhaton.
Sa high school pa ko, usa sa akong mga higala miimbitar nako sa usa ka party ug miingon, “Atong hangyoon ang akong papa kon makahulam ba ta sa iyang sakyanan.” Dili mosugot ang iyang papa nga mohulam siya sa sakyanan. Dayon, sa dihang ang iyang amahan nakakita nako, miingon siya, “OK, pahulamon ko ikaw sa sakyanan, basta si Benjamín lang ang modrayb.”
Kining tawhana nasayud nga ang akong pamilya ug ako miyembro sa Simbahan, nga dili kami moinom og alkohol, ug nga ako luwas nga drayber.
Ang reaksyon sa amahan sa akong higala nakatabang nako sa pagpasalamat sa mga pagtulun-an ug ehemplo sa akong mga ginikanan nga ilang gipakita. Kami dunay family home evening ug pag-ampo sa pamilya. Ang Dominggo mao ang adlaw nga pahulay alang namo. Kining matanga sa mga butang mao ang naglihok nga ebanghelyo alang namo, ug nalingaw kami niini. Ang akong amahan moimbitar kanunay sa ubang mga miyembro sa Simbahan sa pag-adto sa among balay aron mag-istorya sa ebanghelyo sa mga hapon sa Dominggo. Kami mangaon og dungan, kami maghisgut sa ebanghelyo, ug kami suod nga managhigala.
Pangandam karon sa pagtukod sa inyong lig-ong pamilya sa umaabut.Mahimo ninyo kana kon aktibo kamo sa pagkat-on sa ebanghelyo. Hinumdumi nga kon mosalig kamo sa Dios; mag-ampo kada adlaw; mobasa sa kasulatan; magmalimpyo sa kaugalingon; ug mobuhat sa inyong Katungdanan ngadto sa Dios o sa Personal nga Kauswagan, kamo mapanalipdan gikan sa kadaut, mahimong kahayag sa inyong mga higala, ug makakaplag og kalipay sa inyong kinabuhi.
Paghulagway pinaagi ni Scott Greer