Nag-alagad Karon aron Moalagad Unya
Ang tagsulat nagpuyo sa Utah, USA.
“Mag-alagad kamo sa Ginoo sa bug-os ninyong kasingkasing” (1 Samuel 12:20).
“Makiglumba ko nimo padulong sa simbahan!” Miingon si Mórmon, nagtudlo sa panting [tower] sa simbahan ibabaw sa mga kahoy nga anahaw. Dayon midagan siyag kusog kutob sa iyang mahimo aron mag-una sa iyang manghud nga lalaki, nga si Morian.
Ang batang mga lalaki ug ang ilang mga ginikanan nakalakaw na og usa ka milya gikan sa ilang panimalay, apan si Mórmon ug Morian naglumba gihapon sa dihang miabut sila sa puthaw nga ganghaan sa meetinghouse sa ilang ward. Mihunong sila aron pagginhawa.
Sa wala pa sila makadesisyon kinsay nakadaog, usa ka batang lalaki misinggit ngadto kanila, “Gusto mong modula og futebol?”
Si Mórmon ganahan og futebol, apan siya ug ang iyang pamilya manglimpyo sa building sa ward aron kini maandam alang sa pagsimba sa sunod nga adlaw.
Milingo-lingo si Mórmon. “Dili karon—tingali unya!” mitubag siya.
Sa wala madugay si Mórmon ug Morian nagtrabaho pag-ayo. Si Mórmon mibalhin sa mga lingkuranan ug misilhig salog uban sa iyang papa samtang si Morian nag-mop sa salog uban sa iyang mama.
Sa wala madugay ang batang mga lalaki nanghugas sa salamin sa banyo. “Ako wala magtuo nga ako ganahan nga manglimpyo sa simbahan, apan kini makalingaw,” miingon si Morian. “Ikaw, Mórmon? Mao ba kana nganong miapil ka imbis magdula og futebol?”
Naghunahuna si Mórmon sa iyang papa. Siya ang bishop sa ilang ward, apan siya migahin gihapon og panahon sa paglimpyo sa meetinghouse.
“Ako ania tungod kay gusto kong mahimong sama ni Papa,” miingon si Mórmon.
Dayon siya naghunahuna mahitungod sa mga misyonaryo sa iyang ward. Busy sila sa pagpanuktok ug pagpakigbahin sa Basahon ni Mormon ngadto sa uban. Modapit sila sa mga tawo sa pagsimba didto sa building nga gilimpyohan sa batang mga lalaki.
“Ania ko tungod kay sa umaabut gusto ko nga magmisyon usab,” naghunahuna si Mórmon. “Makatabang ko sa mga misyonaryo pinaagi sa pag-andam sa simbahan.”
Naghunahuna si Mórmon sa ugma, dihang siya ug ang iyang igsoong lalaki mobangon og alas 6:00 sa buntag, maglakaw padulong sa simbahan sa ilang puti nga polo ug kurbata, ug moandam sa lingkuranan ug mga songbook diha sa kwarto sa Primary.
“Ako ania dinhi tungod kay ako gusto nga moserbisyo sa usa ka calling sa Simbahan,” naghunahuna siya.
Si Mórmon naghunahuna nga sa dili madugay siya mahimong usa ka deacon. Siya mopaambit sa sakrament ug mobuhat og daghan pa nga mga butang sa pagserbisyo.
“Ako ania dinhi tungod kay sunod tuig ako modawat sa priesthood, ug gustong nakong buhaton ang tanan nga akong mahimo karon aron mahimong andam.”
Si Mórmon nakahimo na og usa ka butang sa pagpangandam alang sa priesthood: iyang naangkon ang Ganti sa Hugot nga Pagtuo diha sa Dios. Siya nagkat-on na sa pagsunod sa ebanghelyo ug pagserbisyo sa uban.
Sa katapusan iyang gitan-aw ang iyang igsoong lalaki diha sa salamin ug mipahiyom.
“Ako ania dinhi tungod kay nahigugma ako sa Ginoo,” siya miingon, “ug tungod kay ang pag-alagad karon makatabang nako nga maandam sa pag-alagad unya.”
Mga paghulagway pinaagi ni Adam Koford