Gawasnon nga Kabubut-on o Matarung nga Kabubut-on?
Ang maalamong paggamit sa kabubut-on makapabukas sa atong mga pagpili ug makapalambo sa atong abilidad sa pagpili sa husto nga paagi.
PAGHULAGWAY SA LITRATO PINAAGI NI Christina Smith, Mga paghulagway pinaagi ni Bryan Beach
Nakahinumdom gihapon ko nga gikulbaan samtang nangandam ko sa pagpakigkita sa akong bishop mahitungod sa pagserbisyo og misyon. Naghunahuna ko kon angay na ba gyud ko. Sama ni Propeta Joseph Smith, ako wala “masayop sa usa ka dako o bug-at nga mga sala” (Joseph Smith—Kasaysayan 1:28), apan nakulbaan gihapon ako.
Nakulbaan ko tungod kay dili ko kapugong sa paghunahuna kabahin sa akong higala nga si Danny (ang pangalan giusab). Sa daghang mga bulan si Danny naghisgot mahitungod sa iyang kahinam nga magmisyon. Apan kana nausab human siya nakigkita sa bishop.
Tungod kay si Danny adunay dili takus nga binuhatan uban sa daghang batan-ong mga babaye, sa kaulahian misulti siya kanako, siya dili angayan sa full-time nga misyonaryo nga pagserbisyo. Dili na siya gawasnon nga magmisyon.
Si Danny, sa mga pulong ni Presidente Boyd K. Packer, Presidente sa Korum sa Napulog Duha ka mga Apostoles, nahulog sa tintasyon ni Satanas “sa sayop nga paggamit sa [iyang] moral nga kabubut-on.”1
Ang tinuod nga kagawasan, sa gitudlo sa Alang sa Kalig-on sa mga Kabatan-onan moabut kon atong gamiton ang atong kabubut-on sa pagpili sa pagkamasulundon. Ang pagkawala sa kagawasan, sama sa nakat-unan ni Danny, resulta sa pagpili sa pagkamasinupakon.
“Samtang kamo gawasnon sa pagpili sa inyong pagabuhaton, kamo dili gawasnon sa pagpili sa sangputanan. Maayo man o dautan, ang mga sangputanan mosunod isip natural nga resulta sa pagpili nga inyong gihimo.”2
Mga Tinugyanan sa Atong mga Kaugalingon
Tungod kay ang mga kasulatan nagtudlo nga kita “gawasnon sa pagpili”, “gawasnon sa paglihok”, ug gawasnon sa pagbuhat sa mga butang “sa [atong] kaugalingon nga gawason nga kabubut-on” (2 Nephi 2:27; 10:23; D&P 58:27; Helaman 14:30), kita kanunay naggamit og mga termino nga “gawasnon nga kabubut-on.”
Apan nasayud ba kamo nga ang hugpong sa mga pulong nga “gawasnon nga kabubut-on” dili makita diha sa mga kasulatan? Hinoon, ang mga kasulatan nagtudlo “nga matag tawo mahimo nga mobuhat diha sa doktrina ug baruganan … sumala sa matarung nga kabubut-on nga Ako mihatag ngadto kaniya, aron ang matag tawo mao ang manubag sa iyang kaugalingon nga mga sala” (D&P 101:78; emphasis gidugang).
Si Elder D. Todd Christofferson sa Korum sa Napulog Duha ka mga Apostoles mitudlo: “Ang pulong kabubut-on makita [sa mga kasulatan] nga kini mismo o uban sa ighuhulagway nga matarung.… Kon gamiton nato ang termino nga matarung nga kabubut-on, atong gihatagan og gibug-aton ang pagkamaytulubagon nga mahinungdanong bahin sa balaang gasa sa kabubut-on. Kita matarung nga mga binuhat ug mga tinugyanan sa atong mga kaugalingon, gawasnon sa pagpili apan responsable usab sa atong mga pagpili.”3
Si Presidente Packer midugang, “Ang kabubut-on gihulagway sa kasulatan nga “matarung nga kabubut-on,’ nga nagpasabut nga kita makapili tali sa maayo ug sa dautan.”4 Kining hinatag sa Dios nga gasa nagpasabut nga kita “gawasnon sa pagpili sa kalingkawasan ug sa kinabuhi nga dayon, pinaagi sa halangdon nga Tigpataliwala sa tanan nga mga tawo, o pagpili sa pagkabihag ug sa kamatayon, sumala sa pagkabihag ug sa gahum sa yawa” (2 Nephi 2:27).
Ang Gubat ni Satanas batok sa Kabubut-on
Tungod kay ang matarung nga kabubut-on dunay importanting bahin diha sa plano sa kaluwasan, si Satanas nagtinguha sa paglaglag niini didto sa kinabuhi nga wala pa dinhi sa yuta. Siya gisalikway tungod sa iyang pagrebelde ug karon nagtinguha “pag-ilad ug pagbuta sa mga tawo, ug pagdala kanila nga ulipon sa iyang pagbuot” (Moises 4:3–4).
Gusto ni Satanas nga kita mohimo og mga pagpili nga nagpugong sa atong kagawasan, mosangpot ngadto sa ngil-ad nga mga kinaiya ug mga pagkaadik, ug naghimo kanato nga walay gahum sa pagbuntog sa iyang mga tintasyon. Ang nakanindot sa ebanghelyo mao nga kini nagpahibalo kanato sa atong mga pagpili ug sa mga sangputanan niadto nga mga pagpili. Ang maalamong paggamit sa kabubut-on makapabukas sa atong mga pagpili ug makapalambo sa atong abilidad sa pagpili sa husto nga paagi.
Ang Ehemplo sa Manluluwas
Sa dihang ang plano sa kaluwasan gipresentar diha sa Dakong Konseho sa Langit, ang Manluluwas mipakita kanato unsaon sa paggamit sa atong matarung nga kabubut-on sa saktong paagi. Siya miingon, “Amahan, ang imong pagbuot mao ang matuman, ug ang himaya imo sa kahangturan” (Moises 4:2). Tungod kay Siya andam sa pagbuhat sa kabubut-on sa Amahan kaniadto ug sa wala madugay diha sa Tanaman sa Getsemani ug didto sa krus (tan-awa sa Mateo 26:39; Lucas 22:42), si Jesus mibayad sa bili sa atong dautan nga mga pagpili ug mihatag og paagi alang kanato nga mapasaylo pinaagi sa paghinulsol.
Kon kita mosunod sa ehemplo sa Manluluwas, imbis moingon, “Akong buhaton unsay akong gusto,” kita mopahayag, “akong buhaton kon unsay gusto sa Amahan.”5 Ang paggamit sa atong matarung nga kabubut-on niini nga paagi makahatag kanato og kagawasan ug kalipay.
Sa akong pagpakigkita sa akong bishop alang sa akong unang interbyu sa misyon, mapasalamaton ko nga nakahimo ko og maayong mga pagpili. Pipila ka bulan ang milabay ako nagserbisyo sa Ginoo didto sa Guatemala—nagtudlo sa uban sa plano sa kaluwasan ug sa mahinungdanong tahas sa matarung nga kabubut-on diha niana nga plano.