Unsaon sa Pagkakaplag og Kalig-on ug Kalampusan
Ni Elder Jeffrey R. Holland
Sa Korum sa Napulog Duha ka mga Apostoles
Gikan sa usa ka fireside sa Brigham Young University nga gihatag niadtong Marso 2, 1997.
Pipila kaninyo nasayud unsay gusto nga kamo mamahimo ug asa kamo gustong moadto sa inyong kinabuhi, ug ang pipila kaninyo wala masayud. Pipila kaninyo ingon og dunay daghan kaayong mga panalangin ug daghang talagsaong mga pagpili sa unahan. Ang uban ninyo mibati, sa usa ka higayon ug sa bisan unsang rason, nga wala kaayoy swerte ug gamay ra nga maanindot nga mga dalan sa unahan.
Apan bisan kinsa kamo ug bisan asa kamo sa inyong pagpaningkamot sa inyong kinabuhi, akong itanyag kaninyo “ang dalan, ang kamatuoran, ug ang kinabuhi” (Juan 14:6). Bisan asa pa kamo gusto nga moadto, ako mohangyo kaninyo sa “pagduol ngadto Kaniya” (tan-awa sa Mateo 11:28–30) isip importanting unang lakang sa pag-adto didto, sa pagkakaplag sa inyong indibidwal nga mga kalipay ug kalig-on ug kalampusan.
Sa dihang si Andres ug Felipe unang nakadungog ni Kristo nga misulti, sila natandog pag-ayo, nadani pag-ayo nga sila misunod Kaniya samtang mibiya Siya sa pundok. Nakamatikod nga Siya gisundan, si Kristo milingi ug nangutana sa duha ka mga tawo, “Unsay inyong gipangita?” (Juan 1:38). Ang ubang mga paghubad yanong misulat niini nga, “Unsay inyong gusto?”
Sila mitubag, “Diin ka magpuyo?” o “Asa ka magpuyo?”
Ug si Kristo miingon, “Umari ka ug makita ninyo.” Wala madugay Siya pormal nga mitawag ni Pedro ug sa uban sa bag-ong mga Apostoles uban sa samang espiritu sa pagdapit, “Sumunod kamo kanako” (tan-awa sa Mateo 4:19).
Alang kanako ang kahulugan sa atong kinabuhi makita niining duha ka mubo nga mga elemento niining nag-unang mga talan-awon sa mortal nga pangalagad sa Manluluwas. Usa ka elemento mao ang pangutana, sa matag usa kanato, “Unsay inyong gipangita? Unsay inyong gusto?”Ang ikaduha mao ang Iyang tubag kon unsaon pag-angkon niana. Bisan kinsa kita, ug bisan unsa pa man ang atong mga problema, ang Iyang tubag mao ra gihapon kanunay, hangtud sa kahangturan: “Duol ngari kanako.” Duol tan-awa unsay akong gibuhat ug giunsa nako paggahin ang akong panahon. Pagkat-on kanako, sumunod kamo kanako, ug ako mohatag kaninyo sa mga tubag sa inyong mga pag-ampo ug kapahulayan sa inyong mga kalag.
Akong minahal nga batan-ong mga higala, wala akoy laing nasayran nga paagi alang kaninyo nga magmalampuson o magmalipayon o maluwas. Wala akoy laing nahibaloan nga paagi alang kaninyo aron makadala sa inyong mga palas-anon o makita unsay gitawag ni Jacob “kana nga kalipay nga giandam alang sa mga santos” (2 Nephi 9:43). Mao kana nganong kita mohimo og maligdong nga mga pakigsaad base sa maulaong sakripisyo ni Kristo, ug mao kana ngano nga kita modala diha kanato sa Iyang ngalan.
Si Jesus mao ang Kristo, ang Anak sa Dios nga buhi. Kini mao ang Iyang tinuod ug buhi nga Simbahan. Gusto Niya nga kita moduol ngadto Kaniya, mosunod Kaniya, ug mahupay pinaagi Kaniya. Dayon Siya gusto nga kita mohupay sa uban. Hinaut nga kita adunay igong hugot nga pagtuo sa pagdawat sa kaayo sa Dios ug sa kalooy sa Iyang Bugtong Anak. Hinaut nga kita moduol ngadto Kaniya ug sa Iyang ebanghelyo ug mamaayo.