Ang Oposisyon sa Akong Misyon
Ang tagsulat nagpuyo sa Manaus, Brazil.
Human mointerbyu nako sa pagserbisyo og misyon, ang akong presidente sa stake miingon, “Talagsaong mga butang ang mahitabo sa imong kinabuhi aron sa pagpaningkamot sa pag-usab sa imong hunahuna.”
Paghulagway pinaagi ni Greg Newbold
Miapil ko sa Simbahan sa edad nga 15, ug paglabay sa upat ka tuig akong gisumiter ang akong missionary application. Sa interbyu uban sa akong presidente sa stake, midayeg siya nako sa pagdesisyon nga moserbisyo sa Ginoo isip full-time nga misyonaryo. Dayon kadtong dinasig nga lider miingon og usa ka butang nga nakahatag og lawom nga impresyon ngari nako: “Brother, gikan karon, talagsaong mga butang ang mahitabo sa imong kinabuhi aron sa pagpaningkamot sa pag-usab sa imong hunahuna kabahin sa imong desisyon sa pagserbisyo sa Ginoo.”
Samtang naghulat sa akong mission call, nagtrabaho ko isip usa ka trainee sa Xerox. Kini nga trabaho nakatabang nako nga makuha ang mga butang nga akong gikinahanglan alang sa mission field ug sa pagtabang sa akong inahan sa mga galastuhan sa balay. Maayo ra ang tanan.
Subo lang, “talagsaong mga butang” nagsugod sa pagkahitabo. Una, dunay miataki sa akong inahan ug hapit mamatay sa iyang mga angol, apan ang usa ka mabination nga Langitnong Amahan milagrosong miluwas sa iyang kinabuhi.
Nianang higayuna, ang akong inahan, duha ka manghud nga mga babaye, ug ako nagpuyo sa usa ka inabangan nga balay. Kami nabuhi sa akong kinitaan ug sa gamay nga benepisyo nga nadawat sa akong inahan tungod sa kamatayon sa akong amahan pipila ka tuig na ang milabay.
Pipila ka mga tawo, lakip ang mga miyembro sa Simbahan, mangutana, “Aduna ka bay kaisug sa pagbiya sa imong inahan nga ingon niini ug magmisyon?” Ang balik-balik nga makadungog niini nga pangutana nakasugod og pagduha-duha sa akong kasingkasing.
Usa ka adlaw ang akong presidente sa stake mitawag ug misulti kanako nga ang akong call sa misyon miabut ug mihangyo nga moadto sa iyang opisina nianang gabhiona aron iyang mahatag nako ang sobre nga gipaabut gikan sa punoang buhatan sa Simbahan. Nakuyawan ug nalipay ko sa balita.
Sa samang adlaw, ang akong manedyer sa trabaho miingon nga makig-istorya siya nako sa dili pa ang paniudto. Sa dihang misulod ko sa iyang opisina, giabi-abi ko sa mahigalaon nga paagi, ug kami nag-istoryahanay sulod sa pipila ka minuto mahitungod sa akong pagbansay ug unsa ang akong nakat-unan sa kompanya. Dayon, kanang gamhanan nga tawo sa organisasyon miingon og usa ka butang nga maoy damgo sa kadaghanang mga tawo sa siyudad: “Maayo ang imong trabaho dinhi isip usa ka trainee, ug kami gusto nga mo-hire nimo ug ipabilin ka sa team. Unsay imong hunahuna?”
Kini mao ang usa sa labing lisud nga desisyon sa akong kinabuhi. Ang mga segundo ingon og kahangturan. Ingon og akong madungog ang mga tawo nangutana nako kon biyaan ba nako ang akong inahan nga walay pinansyal nga suporta ug moadto sa mission field.
Bisan pa niana, ako nahinumdom sa mga butang nga akong nakat-unan gikan sa mga kasulatan ug mga lider sa Simbahan, ug sa usa ka sagrado kaayo nga paagi, ako nasayud uban sa usa ka dili matarug nga kasigurohan nga ang Dios gusto nga ako moserbisyo isip full-time nga misyonaryo sa Iyang Simbahan. Ako nasayud nga Siya moatiman sa akong pamilya, nga ako makasalig Kaniya, ug nga ang tanan mamaayo ra.
Akong gipasabut ang sitwasyon sa akong manedyer, ug ang iyang tubag lanog pa gihapon sa akong hunahuna: “Abi nako usa ka ka batan-on nga makamaong maghunahuna, ug dinhi imong gisalikway ang oportunidad sa imong kinabuhi.”
Kinasingkasing akong mipasalamat kaniya sa iyang tanyag, ug paglabay sa 28 ka adlaw mireport ko ngadto sa missionary training center sa São Paulo, Brazil.
Sa panahon sa akong misyon, ang Ginoo mihatag sa mga panginahanglan sa akong pamilya pinaagi sa mga higala sa Simbahan ug sa milagroso nga mga paagi. Nabalik ang maayong panglawas sa akong inahan ug bag-ong mga oportunidad sa trabaho ang miabut alang sa akong igsoong mga babaye ug sa akong inahan.
“Talagsaong mga butang” ang mahitabo gayud kon kita mohukom sa pagserbisyo sa Ginoo. Apan ako mapainubsanong modugang sa akong pagpamatuod ngadto sa mga pagpamatuod sa liboan ka mga tawo kinsa miapil sa pagserbisyo sa Dios nga ang misyonaryo nga pagserbisyo dunay dakong epekto sa akong kinabuhi.