Ang mga Propeta sa Daang Tugon
Jeremias
“Nagpuyo si Jeremias sa malisud nga panahon ug dapit, apan ang Ginoo mitugot kaniya nga makapanglantaw sa ‘usa ka higayon sa paglaum sa panahon sa ulahing mga adlaw nga pagpundok sa Israel.’”1 —Linda K. Burton, kinatibuk-ang presidente sa Relief Society
Litrato sa linukot nga papel pinaagi sa dimdimich/iStock/Thinkstock; Jeremias, ni Walter Rane © IRI
Anak ko ni Hilcias, usa ka priest sa Anathoth, duol sa Jerusalem. Sa akong kabatan-onan, “ang pulong sa Ginoo miabut kanako, nga nag-ingon,
“Sa wala pa ikaw buhata nako diha sa tiyan naila ko na ikaw; ug sa wala pa ikaw mogula sa tagoangkan gibalaan ko na ikaw, gitudlo ko ikaw nga manalagna alang sa mga nasud.”
Mibati ko nga dili andam niini nga calling, ug mitubag ko, “Ania karon, ako dili mahibalo nga mosulti: kay ako usa ka bata lamang.”
Ang Ginoo mitubag, “Ayaw pag-ingon, Ako usa ka bata: kay kang bisan kinsa ikaw paadtuon ko ikaw moadto, ug bisan unsa nga akong igasugo kanimo igasulti mo.
“Ayaw pagkahadlok tungod kanila: kay ako magauban kanimo sa pagluwas kanimo.” Dayon ang Ginoo “mihikap sa akong ba-ba” ug nagbutang og mga pulong niini.2
Ako nanagna sa Jerusalem sulod sa 40 ka tuig, gikan sa 626 ngadto sa 586 b.c., atol sa mga paghari nilang Josias, Joachin ug Sedecias.3 Kadungan nako si Lehi ang propeta diha sa Basahon ni Mormon. Kaming duha nanghimaraut sa pagkadautan sa mga katawhan sa Jerusalem ug nanagna sa kalaglagan niining dako nga siyudad.4
Ang Ginoo misugo nako sa pagrekord sa akong mga panagna diha sa “linukot nga basahon.”5 Sa dihang si Haring Joachin nakadungog sa mga panagna, iyang gisunog ang linukot nga basahon. Ang Ginoo misugo nako sa pagsulat sa mga panagna pag-usab ug gidugangan kini og daghan.6
Nakasinati ko og padayon nga oposisyon samtang akong gisangyaw ang pulong sa Ginoo. Si Pashur, ang anak sa labaw nga gobernador, mibunal ug mibutang nako diha sa silutanan [stocks]. Ang mga manggugubot gustong ipapatay ko tungod sa akong pagsangyaw. Dili ko inila nga propeta, kanunay ko nga itambug sa bilanggoan. Nagpuyo ko sa panahon nga grabe gyud ang kadautan.7
Apan bisan nga nagpuyo taliwala sa mga kalisdanan, ang Ginoo mitugot nako nga makakita sa mga Israelite nga pagapundukon sa ulahing adlaw, nga ang Ginoo mosulat sa Iyang balaod “diha sa ilang mga kasingkasing”, ug nga Siya mohatag og “usa ka siyudad, ug duruha sa usa ka panimalay” sa Zion.8
Samtang nagpadayon ko sa pagsangyaw sa pulong sa Ginoo—bisan kon lisud kaayo—nakat-unan nako nga ang personal nga pasalig sa ebanghelyo makahatag og kalinaw. Samtang kita nagpalambo sa indibidwal nga pagpakigdait ngadto sa Ginoo, kitang tanan makasinati og paglaum taliwala sa mga pagsulay ug kalisdanan.