Pagserbisyo diha sa Simbahan
Salamat, Brother Jay
Ang tagsulat nagpuyo sa Nevada, USA.
Mapasalamaton kaayo ko sa espiritu, pasalig, pagpangandam, ug gugma sa daghan nga kugihang mga sulugoon sa tibuok Simbahan.
“Dominggo ugma,” giingnan nako ang akong singko anyos nga anak nga babaye samtang nagpasabak siya. Adunay pahiyom sa iyang tibuok nawong.
“Ah, maayo,” siya miingon. “Dayon akong makita si Brother Jay.”
Napuno akong kasingkasing sa pasalamat. Dako akong pasalamat para sa mahigugmaon, mapinanggaon nga magtutudlo sa Primary kinsa nakapagaan sa among pag-adjust sa pagbalhin sa bag-ong ward. Ang pagbiya sa among panimalay diha sa U.S. Midwest ug ang pagbalhin og 1,350 ka milya (2,173 km) ang gilay-on nakapa-stress sa tibuok pamilya ilabi na sa among preschooler, si Season. Maulawon siya, mahadlok siya og bag-o nga mga sitwasyon ug nabalaka sa pagsimba sa unang semana sa bag-ong ward.
Si Brother Jay, usa ka buotan, kugihan nga tawo, mihiusa sa pagpakatawa ug paghigugma aron makuha ang pagsalig ni Season. Sa unang Dominggo siya mipungko, migunit sa iyang kamot, mitan-aw sa iyang mga mata, ug miingon, “Ari na, palangga. Malingaw ka sa among klase.”
Sa paglabay sa mga semana, si Season naghinam-hinam sa Dominggo labaw pa kay sa bisan unsa nga adlaw sa semana. Inig-abut namo sa simbahan, iyang pangitaon iyang magtutudlo diha sa kongregasyon. Siya mopahiyom sa pagtimbaya.
Sa daghang katuigan hinumduman ni Brother Jay ang kada estudyante pinaagi sa paghatag og gamayng mga gasa para sa mga holiday ug birthday. Sa dihang nagkaduol ang birthday ni Season, ang pinakaimportante niya nga bisita mao si Brother Jay.
Aduna ba siyay ideya kon unsa ka dako ang iyang impluwensya sa kinabuhi sa among gamayng anak nga babaye? Makatag-an ba siya kon unsa ka dako nga nasabtan ang iyang mga pulong ug aksyon sa iyang pundok sa mga estudyante nga mga singko anyos? Posible ba nga nasayud siya kon unsa ka makahuluganon niini ngari kanako, isip inahan, nga siya nahimong kabahin sa kinabuhi sa akong anak nga babaye?
Sa wala madugay, si Season mibalhin sa klase ni Brother Edward, ug nagpadayon ang iyang talagsaon nga kasinatian sa Primary. Dako akong pasalamat sa tanang mahunahunaon, andam, mapaubsanon nga mga lalaki ug babaye kinsa adunay positibong espirituhanon nga impluwensya sa kinabuhi ni Season.
Ang among tibuok pamilya napanalanginan sa mapahinunguron nga mga tawo kinsa nakaserbisyo kanamo sa among dalan sa espirituhanong pag-uswag. Nakahinumdom ko sa usa ka batid nga Scoutmaster, mainantuson nga magtatambag sa korum sa priest, mapailubon nga magtutudlo sa Seminary, talagsaon nga mga kapangulohan sa Young Women, ug mapinanggaon nga bishop.
Ingon nga napanalanginan gayud ang among pamilya, ako nasayud nga kami dili talagsaon. Adunay daghang tawo nga sama ni “Brother Jay”, kay adunay daghan nga mapahinunguron nga mga kaigsoonan kansang pagserbisyo nakatandog sa kinabuhi sa mga pamilya sama kanamo. Mapasalamaton kaayo kami para sa ilang espiritu, pasalig, pagpangandam, ug gugma.
Salamat sa daghang kugihan nga mga sulugoon sa tibuok Simbahan nga mitabang sa among pamilya.
Happy Birthday!
Gilitratohan ni Nikolai Sorokin/Hemera/Thinkstock